قازاقستاندا العاشقى بوكس-پارك اشىلادى

«الماتى» الەۋمەتتىك-كاسىپكەرلىك كورپوراتسياسى حابارلاپ وتىرعانداي, بوكس-پاركتە جاڭا فورماتتاعى دۇكەندەر, كافە, سپورت ستۋديالارى, كەڭسە مەن دەمالىس ورىندارى توعىستىرىلعان. كەشەن تولە بي كوشەسى مەن روزىباكيەۆ كوشەسىنىڭ قيىلىسىندا ورنالاسقان, جالپى اۋماعى – 2,7 مىڭ شارشى مەتر. مۇندا جاسىل اللەيالار, بالالار الاڭدارى جانە مادەني ءىس-شارالارعا ارنالعان اشىق اسپان استىنداعى امفيتەاتر بار.

العاشقى بوكس-پاركتە 17 ساۋدا-كەڭسە ءمودۋلى قاراستىرىلعان. جوبا قالانىڭ ىسكەرلىك ينفراقۇرىلىمىن دامىتۋ باعدارلاماسىنىڭ ءبىر بولىگى. ساراپشىلاردىڭ ايتۋىنشا, بۇل فورمات ەكولوگيالىق تيىمدىلىگىمەن, قۇرىلىس قارقىنىنىڭ جەدەلدىگىمەن جانە كەڭىستىكتى ۇيىمداستىرۋدىڭ زاماناۋي تاسىلىمەن ەرەكشەلەنەدى.

جوبانى «اق-وردا» جشس كومپانياسى جۇزەگە اسىرىپ وتىر. قارجىلاندىرۋدى «Almaty Finance» جشس – «الماتى» اكك-ءنىڭ ەنشىلەس ۇيىمى قولدادى. «Almaty Business – 2025» باعدارلاماسى اياسىندا 500 ملن تەڭگە ءبولىنىپ, 6% جىلدىق مولشەرلەمەمەن 7 جىلعا نەسيە بەرىلدى. جىل سايىن كەشەن قالا بيۋدجەتىنە شامامەن 30 ملن تەڭگە سالىق ءتۇسىمىن اكەلەدى.

«ەل مەن قالا ءۇشىن تىڭ فورماتتاعى پرومەناد تۇرعىنداردى تارتا تۇسەتىن جاڭا ورتالىققا اينالادى. ول ىڭعايلى قالالىق ورتا مەن زاماناۋي ساۋلەتتى, بيزنەسكە قولايلى جاعدايلاردى ۇشتاستىرادى. سونىمەن بىرگە, جوبا اياسىندا قالا بيۋدجەتىنە جىل سايىن شامامەن 30 ملن تەڭگە سالىق تۇسەدى», – دەدى «Almaty Finance» جشس باسقارما توراعاسى بەرىك قۇسايىنوۆ.