قوستاناي وبلىسى بەيىمبەت مايلين اۋدانىندا 96 ملن تەڭگە سۋبسيديا جىمقىرىلعان, دەپ حابارلايدى وبلىستىق پروكۋراتۋرا.
بۇل سۋبسيديا مال ازىعى قۇنىن ارزانداتۋعا جانە سەلەكتسيالىق جۇمىستاردى جۇرگىزۋگە باعىتتالعان.
اۋدان پروكۋراتۋراسى قىلمىستىق كودەكستىڭ 190-بابىنىڭ 4-بولىگى 2) تارماعى "اسا ءىرى مولشەردە جاسالعان الاياقتىق" بويىنشا سوتقا دەيىنگى تەرگەۋ جۇرگىزدى.
- قىلمىستىق ءىس قوستاناي وبلىسى پروكۋراتۋراسىنىڭ باقىلاۋىمەن تەرگەلىپ, ناتيجەسىندە ءۇش ماماننىڭ قىلمىستىق ارەكەتى دالەلدەنىپ, ءىس سوتقا جولداندى. سوتتالۋشىلاردىڭ ءوز كىناسىن تولىق مويىنداۋىنا بايلانىستى قىلمىستىق ءىس قىسقارتىلعان تارتىپپەن قارالدى, - دەيدى ۆەدومستۆو.
قىلمىستىق ءىستى بەيىمبەت مايلين اۋداندىق سوتى قارادى. سوت ۇكىمىمەن كىنالىلەر ءارتۇرلى مەرزىمگە باس بوستاندىعىنان ايىرىلدى.
سونىمەن قاتار مەملەكەتكە كەلتىرىلگەن ماتەريالدىق زالالدى وتەۋ ماقساتىندا سوتتالۋشىلاردان 96 ميلليون تەڭگەدەن استام سوما ورتاق تارتىپپەن ءوندىرىلدى.