ەلورداداعى سارايشىق اۋدانىندا قازاقستان پرەزيدەنتى جاريالاعان 2025 جىل – جۇمىسشى ماماندىقتار جىلى اياسىندا «جۇمىسشى ماماندىقتار اللەياسىنىڭ» سالتاناتتى اشىلۋى ءوتتى, دەپ حابارلايدى قالا اكىمدىگىنىڭ رەسمي سايتى.
جاڭا اللەيا اۋدان تۇرعىندارى ءۇشىن دەمالىس ورنى عانا ەمەس, سونىمەن قاتار ەل دامۋىنا جۇمىسشى مامانداردىڭ قوسقان ۇلەسىن ناسيحاتتايتىن سيمۆولدىق كەڭىستىككە اينالدى.
سكۆەر اۋماعى جاڭارتىلدى: بالالار الاڭدارى, سپورتتىق جاتتىعۋ ورىندارى, كولەڭكەلى شاتىرلار مەن ارت-عيماراتتار ەرەكشە اسەر بەرەدى.
اشىلۋ بارىسىندا 300 ءتۇپ اعاش وتىرعىزىلدى, ارنايى تەحنيكا كورمەسى مەن تاقىرىپتىق فوتوكورمە ۇيىمداستىرىلدى. سونداي-اق «ەڭبەك جولى» بايقاۋىنىڭ جەڭىمپازدارىن ماراپاتتاۋ ءراسىمى ءوتىپ, كونتسەرتتىك باعدارلاما ۇسىنىلدى.
شاقىرىلعان سۋرەتشىلەر ءىس-شارا بارىسىندا جۇمىسشى ماماندىق يەلەرىنىڭ پورترەتتەرىن live فورماتىندا سالدى.
مەرەكەلىك ءىس-شاراعا اۋدان تۇرعىندارى, ءتۇرلى سالا وكىلدەرى, دەپۋتاتتار مەن قوعام قايراتكەرلەرى قاتىستى.
ايتا كەتەيىك, بيىل ەلوردادا شامامەن 170 اۋلا مەن قوعامدىق كەڭىستىك (ساياباقتار, گۇلزارلار, جەلەكجولدار) اباتتاندىرىلىپ جاتىر. بۇل جۇمىس قالانىڭ بارلىق اۋدانىن, ونىڭ ىشىندە تۇرعىن الاپتاردى دا قامتىدى. قازىرگى تاڭدا بۇل جۇمىستىڭ باسىم بولىگى اياقتالدى.
سونىمەن قاتار اباتتاندىرۋ اياسىندا قالانى كوگالداندىرۋعا ەرەكشە ءمان بەرىلىپ وتىر. بيىل ەلوردادا 1 ميلليوننان استام جاسىل جەلەك وتىرعىزۋ جوسپارلانعان. كوگالداندىرۋ مەن كورىكتەندىرۋ شارالارى بارلىق اۋداندى قامتيدى.