ماسكەۋدە وتەتىن حالىقارالىق مۋزىكالىق «ينتەرۆيدەنيە-2025» بايقاۋىنا امىرە ەسىمىمەن تانىلىپ جۇرگەن ءانشى ەرنار سادىرباەۆ قاتىسادى. فينال بۇگىن تۇنگى ساعات 22:30-دا «پەرۆىي كانال ەۆرازيا» ارناسىنان تىكەلەي ەفيردە كورسەتىلەدى.
الەمنىڭ ءتۇرلى ەلىنەن 23 ورىنداۋشى قاتىساتىن حالىقارالىق بايقاۋدا قازاق ءانشىسى «دالا تاڭى» اتتى كومپوزيتسياسىن ورىندايدى. مۋزىكاسىن امىرەنىڭ ءوزى, ال ءسوزىن اقىن سايات راحىمجانوۆ جازعان. ءبىزدىڭ ۇمىتكەردىڭ ونەر كورسەتۋى ادەتتەگىدەن ەرەكشە بولماق. سەبەبى ساحناعا ونەرپازبەن بىرگە سەگىز جاستاعى جاسمين قايراتقىزى دا شىعادى. ول – قازاقستاندىق دەلەگاتسيانىڭ ەڭ جاس قاتىسۋشىسى. وسى ماڭىزدى رولگە ارنايى كاستينگ جاريالانىپ, 100 ۇمىتكەردىڭ ىشىنەن جاسمين ەڭ ۇزدىك دەپ تانىلعان. قالعان جايتتار ازىرگە قۇپيا. بىزگە بەلگىلىسى قازاق دەلەگاتسياسىنىڭ باس پروديۋسەرى التىنبەك راحمەتوۆتىڭ مىنا پىكىرى: «بۇل ءان بارلىق قاتىسۋشىنىڭ جۇرەگىن جاۋلاپ الدى. ولار بىرگە شىرقاپ, اۋەنىن ايتىپ ءجۇر. ءبىزدىڭ ەڭ باستى ماقساتىمىز – ءانىمىزدىڭ ەلىمىزدە كەڭ تارالعانى», دەپتى ول.
حالىقارالىق بايقاۋ قازىردىڭ وزىندە ميلليونداعان كورەرمەننىڭ نازارىن اۋدارىپ وتىرعان كورىنەدى. ۇيىمداستىرۋشىلاردىڭ حا- بارلاۋىنشا, تىكەلەي ەفير ءتورت قۇرلىققا تاراتىلادى. «ينتەرۆيدەنيە-2025» بايقاۋىنا قاتىسۋشىلار جانە دەلەگاتسيالارمەن جۇمىس ىستەۋ دەپارتامەنتىنىڭ باسشىسى تاتيانا سەليۆەرستوۆانىڭ ايتۋىنشا, قاتىسۋشى ەلدەردىڭ بارلىعىندا بايقاۋدىڭ تىكەلەي ەفيرى نەمەسە ءبىر تاۋلىك ىشىندە جازباسى كورسەتىلەدى. «بۇل – بايقاۋدا 2 ميللياردتان استام ادام تاماشالاي الادى دەگەن ءسوز» دەيدى.
بايقاۋ داۋىس بەرۋ ارقىلى شەشىلەدى. ول تۋرالى امىرەنىڭ ءوزى:
«ماعان ادامدار قالاي داۋىس بەرەتىنى وتە قىزىق. ادەتتە, ءبىز قانداي دا ءبىر ەلگە بارساق, وندا تەك سول ەلدىڭ وكىلدەرى عانا بولادى دا, ءوز باعالارىن قويادى. ال مۇندا 20-دان استام ەلدىڭ وكىلدەرى بار, ولار ءبىر-بىرىمەن ونشا تانىس ەمەس. سول سەبەپتى باعا اناعۇرلىم ءادىل بولادى دەپ ويلايمىن», دەيدى.