كادەتتەر اراسىنداعى شاحماتتان الەم چەمپيوناتى باستالدى

بيىلعى چەمپيوناتقا 88 ەلدەن 850-دەن استام جاس شاحماتشى تىركەلدى. ءۇندىستاننان 28, قىتايدان 25, اقش-تان 24 ويىنشى قاتىسىپ وتىر.  قازاقستان چەمپيونات يەسى رەتىندە 200-دەن استام سپورتشىنى جارىسقا قوستى.

ءتۋرنيردى قازاقستان رەسپۋبليكاسىنىڭ تۋريزم جانە سپورت مينيسترلىگى, الماتى قالاسىنىڭ اكىمدىگى, حالىقارالىق شاحمات فەدەراتسياسى (FIDE) جانە قازاقستان شاحمات فەدەراتسياسى (KazChess) ۇيىمداستىرىپ وتىر. اشىلۋ سالتاناتىنا قر پرەمەر-ءمينيسترىنىڭ ورىنباسارى ەرمەك كوشەرباەۆ, الماتى قالاسىنىڭ اكىمى دارحان ساتىبالدى, فيدە پرەزيدەنتى اركادي دۆوركوۆيچ جانە KazChess پرەزيدەنتى تيمۋر تۋرلوۆ قاتىستى.

«ەشبىر شاحمات ءتۋرنيرى, ءتىپتى ەلىمىزدەگى وزگە سپورتتىق شارالاردىڭ ەشقايسىسى دا مۇنداي اۋقىمدى قاتىسۋشىلار قۇرامىن جيناماعان. بۇل – قازاقستاندىق شاحمات پەن تۇتاس ەلىمىز ءۇشىن تاريحي ءسات. ءبىز قوناقتاردى تەك قوناقجاي رەتىندە عانا ەمەس, سونىمەن قاتار الەمنىڭ ەڭ مىقتى شاحمات دەرجاۆالارىنىڭ ءبىرى ءارى ءتۋرنيردىڭ باستى ءفاۆوريتى مارتەبەسىندە قارسى الىپ وتىرمىز», دەدى تيمۋر تۋرلوۆ.

قازاقستان بۇعان دەيىن دە شاحماتتان ەڭ جوعارى دەڭگەيدەگى حالىقارالىق جارىستاردى, سونىڭ ىشىندە الەم چەمپيوناتتارى مەن ەرلەر اراسىنداعى الەم چەمپيونى اتاعى ءۇشىن ماتچتى وتكىزگەن. وتكەن جىلى يتاليانىڭ مونتەسيلۆانو قالاسىندا وتكەن چەمپيوناتقا 77 ەلدەن 700-دەن استام سپورتشى قاتىسسا, بيىلعى كورسەتكىش 88 ەلدەن 851 ويىنشىعا جەتتى. ونىڭ ىشىندە 231 قازاقستاندىق بار.

اشىلۋ راسىمىنەن كەيىن العاشقى تۋر باستالىپ كەتتى. جارىس شۆەيتسار جۇيەسى بويىنشا 11 تۋردان تۇرادى. ۋاقىتتى باقىلاۋ فورماتى – 90+30 ء(ار ويىنشىعا 90 مينۋت جانە العاشقى جۇرىستەن باستاپ ءار قادامعا 30 سەكۋند قوسىلادى). قورىتىندىسى بويىنشا الەم چەمپيوندارى مەن جۇلدەگەرلەر انىقتالادى. جارىس ۇلدار (Open) مەن قىزدار (Girls) اراسىندا التى جاس ساناتىندا ءوتىپ جاتىر: O8, G8, O10, G10, O12 جانە G12.

25 قىركۇيەك دەمالىس كۇنى بولىپ بەلگىلەنگەن. بۇل كۇنى جاس سپورتشىلار ءۇشىن مادەني-سپورتتىق باعدارلاما ۇيىمداستىرىلادى. ولار شىمبۇلاق تاۋ-شاڭعى كۋرورتىنا ەكسكۋرسياعا بارىپ, شەشىم شىعارۋ بويىنشا الەم چەمپيوناتىنا جانە جۇلدە قورى 2000 اقش دوللارىن قۇرايتىن بليتس-تۋرنيرگە قاتىسادى.

سونىمەن قاتار 27–28 قىركۇيەكتە Satbayev University-دە ء«بىلىم بەرۋدەگى شاحمات» اتتى III حالىقارالىق كونفەرەنتسيا وتەدى. جيىنعا FIDE-ءنىڭ «Chess in education» كوميسسياسىنىڭ توراعاسى, اقش وكىلى دجەرري نەش قاتىسادى.