باتىس قازاقستان وبلىسىندا مەملەكەتتىك سىيلىقتىڭ يەگەرى, قازاقستاننىڭ حالىق جازۋشىسى, اقىن قادىر مىرزا ءالىنىڭ تۋعانىنا 90 جىل تولۋىنا وراي مەرەيتويلىق ءىس-شارالار باستالدى. بۇل كۇنى ورال قالاسىندا اقىن اتىنداعى وبلىستىق مادەنيەت جانە ونەر ورتالىعىنىڭ اشىلعانىنا دا 10 جىل تولىپ جاتىر دەپ حابارلايدى Egemen.kz.
پاراساتتى پوەزيا پايعامبارىنىڭ تويىنا الماتىدان اقىننىڭ جارى سالتانات, ۇلى عازيز, نەمەرەلەرى ارنايى كەلدى. سونداي-اق جازۋشىلار وداعى باسقارماسى توراعاسى مەرەكە قۇلكەنوۆ, مەملەكەتتىك سىيلىقتىڭ يەگەرى, اقىن اقۇشتاپ باقتىگەرەەۆا, پۋبليتسيست, جۋرناليست قاينار ولجاي دا تويدىڭ تورىنەن تابىلدى. 90 جىلدىق تويدىڭ شىمىلدىعى اقىننىڭ ەسكەرتكىشىنە گۇل شوقتارىن قويۋمەن باستالدى. مەيماندارعا باتىس قازاقستان وبلىسىنىڭ اكىمى ناريمان تورەعاليەۆ باستاعان جەرگىلىكتى باسشىلار, بەلگىلى قوعام قايراتكەرلەرى, زيالى قاۋىم وكىلدەرى قۇرمەت كورسەتتى.
ەڭ ۇلكەن ءىس-شارا عاريفوللا قۇرمانعاليەۆ اتىنداعى وبلىستىق فيلارمونيانىڭ «اتامەكەن» ونەر ورداسىندا جالعاستى. فيلارمونيا ۇجىمى ۇسىنعان كونتسەرتتىك باعدارلاما تەك قانا قادىر شىعارمالارىنان تۇردى. قاتيموللا بەردىعاليەۆ باستاعان ءدۇلدۇل انشىلەرگە داۋلەتكەرەي اتىنداعى ۇلت-اسپاپتار وركەسترى دەم بەرىپ وتىردى.
قادىر اقىننىڭ تويى – حالىقتىڭ تويى. قازاقتىڭ ەڭبەكتەگەن بالاسى جاتتايتىن تاقپاقتان باستاپ, ەڭكەيگەن قارياسى ايتاتىن باتا-ناقىل سوزگە دەيىن قادىر اعامىزدىڭ قالامىنان تىس قالعان جوق. بيىل قازاقتىڭ ءۇش اقىنىنىڭ 90 جىلدىعى. ولار – تۇمانباي مولداعاليەۆ, قادىر مىرزا ءالى جانە جۇمەكەن ناجىمەدەنوۆ. وسى ۇشەۋى – قازاق پوەزياسىنىڭ, قازاق ادەبيەتىنىڭ التىن شەگەلەرى, - دەيدى قازاقستان جازۋشىلار وداعىنىڭ باسقارما توراعاسى مەرەكە ابدەش ۇلى.
«قازاق رۋحانياتىنىڭ قامباسىنا قيساپسىز قازىنا قوسقان قادىر اعامىزدىڭ جۇلدىزى ماڭگىلىك جارقىراي بەرمەك» دەپ ءسوز سويلەگەن باتىس قازاقستان وبلىسىنىڭ اكىمى ناريمان تورەعاليەۆ اقىننىڭ جارى سالتانات قادىرقىزىنا سىي-قۇرمەت كورسەتتى. وسى ساتتە اقىن شىعارماشىلىعى جايىندا «قادىردىڭ قاناتتى سوزدەرى» جانە «جۇرەگىمە جەتكەن جىر» اتتى كىتاپتاردىڭ تۇساۋى كەسىلدى.
- مەن ءحىح عاسىردىڭ ۇلى تۇلعاسى ابايدىڭ ەلىندە تۋىپ-ءوستىم. ال حح عاسىردا قازاق قانداي بولدى, قانداي بولۋى كەرەك ەدى, قازاققا نە كەرەك ەدى دەگەن ساۋالعا جۇگىنسەك, – وسىنىڭ ءبارى قادىردا بار. قادىردىڭ شىعارماشىلىعى – قازاقتىڭ قازىعى. قادىردى تەرەڭ وقۋ كەرەك, ءبىلىپ وقۋ كەرەك, سوندا قادىردان تابىلمايتىن قازىنا جوق. ول – اسقان كورەگەن ادام. سوناۋ 1970 جىلدارى, سول سوۆەت زامانىندا-اق ءبىزدىڭ بولاشاق گيمنىمىزدىڭ, گەربىمىزدىڭ قانداي بولاتىنىن بولجاپ ايتىپ كەتكەن. قادىردىڭ پوەزياسى, قادىردىڭ شىعارماشىلىعى وسى كەزگە دەيىن قازاققا قىزمەت ەتىپ كەلەدى, قىزمەت ەتە دە بەرمەك! – دەدى قاينار ولجاي.
مەرەيتويلىق باعدارلاما شەڭبەرىندە اقىن شىعارماشىلىعىنا ارنالعان رەسپۋبليكالىق عىلىمي-پراكتيكالىق كونفەرەنتسيا ءوتتى. ءبىر توپ ونەر جانە مادەنيەت قايراتكەرلەرى قادىر مىرزا ءالىنىڭ 90 جىلدىعىنا وراي ارنايى شىعارىلعان مەرەيتويلىق توسبەلگىگە يە بولدى. ەرتەڭ اقىننىڭ تۋعان جەرىندە, جىمپيتى توپىراعىندا قادىر مىرزا ءالى اتىنداعى رۋحانيات زالى, اقىن رۋحىنا ارنالعان مۇرال اشىلماق. حاديشا بوكەەۆا اتىنداعى قازاق دراما تەاترى ۇجىمى ساحنالايتىن «قادىر – ادام» اتتى قويىلىمنىڭ پرەمەراسى دا ەرتەڭگە جوسپارلانعان.
باتىس قازاقستان وبلىسى