استانا. 20 ناۋرىز. بۇگىن قازاقستان رەسپۋبليكاسى, بەلارۋس رەسپۋبليكاسى جانە رەسەي فەدەراتسياسى پرەزيدەنتتەرى كەزدەسۋىنىڭ قورىتىندىسىنا ارنالعان بىرلەسكەن بريفينگ بەردى. بۇل تۋرالى اقوردا ءباسپاسوز قىزمەتىنىڭ دەرەگىنە سۇيەنگەن egemen.kz ءتىلشىسى حابارلادى.
قازاقستان پرەزيدەنتى ءۇش ەل ەكونوميكاسىنىڭ بيىلعى دامۋى بۇدان ارعى ىقپالداستىقتىڭ ماسەلەلەرىن ەگجەي-تەگجەيلى قاراستىرۋدى جانە تۋىندايتىن ماسەلەلەردى شەشۋدى قاجەت ەتەتىنىن اتاپ ءوتتى.
«ەكونوميكالارىمىزداعى داعدارىس قۇبىلىستارىن ەڭسەرۋ جونىندەگى ءىس-قيمىلداردىڭ بىرلەسكەن جوسپارىن ازىرلەۋ ماڭىزدى. بۇگىنگى كەزدەسۋ ناق وسى تاقىرىپقا ارنالدى. ءبىز ساۋدا-ەكونوميكالىق جانە ينۆەستيتسيالىق ىنتىماقتاستىقتى دامىتۋعا ۋاعدالاستىق. ۇكىمەتتەرىمىزگە ءوزارا ساۋدا ءوسىمىن قايتا جاڭعىرتۋ جونىندە شارالار قابىلداۋدى تاپسىردىق», – دەدى قازاقستان باسشىسى.
نۇرسۇلتان نازارباەۆ ۋكراينانىڭ وڭتۇستىك-شىعىسىنداعى قاقتىعىستى رەتتەۋ ماسەلەسى دە تالقىلانعانىن ايتتى.
«بۇل ماسەلە جونىندە مەملەكەتتەرىمىزدىڭ ارقايسىسىنىڭ ۇستانىمى بەلگىلى. ءبىز ماسەلەگە ناقتى قارايمىز. ۋكراينادا قالىپتاسقان احۋالدان ديپلوماتيالىق جولمەن شىعۋ قاجەت, بۇل ماسەلە اسكەري جولمەن شەشىمىن تاپپايدى. وسى ورايدا, قابىلداناتىن كەز-كەلگەن شەشىم ىرگەلى حالىقارالىق قۇقىق قاعيداتتارىنا نەگىزدەلگەنى ماڭىزدى. ءبىز ۋكراينانىڭ تۇراقتى, تاۋەلسىز جانە اۋماعى ءبىرتۇتاس مەملەكەت بولىپ قالۋىنا مۇددەلىمىز. قازاقستان مينسك كەلىسىمدەرىن جانە قول جەتكەن ۋاعدالاستىقتاردى بارلىق تاراپتىڭ ورىنداۋىن قولدايدى», – دەدى قازاقستان پرەزيدەنتى.
رەسەي پرەزيدەنتى مەملەكەتتەر باسشىلارى ءوزارا قارىم-قاتىناستاردىڭ كەشەندى ماسەلەلەرىن تالقىلاعانىن ايتتى.
«ءبىزدىڭ ەلدەرىمىزدى ساۋدا جانە ينۆەستيتسيالىق تىعىز بايلانىستار بىرىكتىرەدى. «ۇشتىكتىڭ» ىشكى جالپى ءونىمنىڭ جيىنتىق كولەمى تمد-نىڭ جالپى ءونىمىنىڭ 85 پايىزىن قۇرايدى. ءبىز وراسان وندىرىستىك جانە عىلىمي الەۋەتى بار ءىرى نارىق قالىپتاستىرۋدامىز. رەسەي قازاقستان مەن بەلارۋستىڭ سىرتقى ساۋداسىندا ءبىرىنشى ورىن الادى. وتكەن جىل قورىتىندىسىن بويىنشا رەسەيدىڭ وسى ەكى ەلمەن تاۋار اينالىمى 60 ميلليارد دوللاردى قۇرادى. ال بەلارۋس پەن قازاقستان رەسەي فەدەراتسياسىنىڭ ساۋدا تەڭگەرىمىندە ءۇشىنشى ورىندى يەلەنىپ وتىر», – دەدى ۆ.پۋتين.
رەسەي پرەزيدەنتى ءۇش ەلدىڭ ونەركاسىپتىك-تەحنولوگيالىق كووپەراتسيا, ماشينا جاساۋ, عارىش جانە ەنەرگەتيكا سالالارىنداعى بايلانىستارى نىعايىپ كەلە جاتقانىنا نازار اۋداردى.
ۆ.ءپۋتيننىڭ ءمالىم ەتكەنىندەي, كەلىسسوزدەر بارىسىندا ۋكرايناداعى احۋال جونىندە دە اڭگىمە بولدى.
«قازاقستان مەن بەلارۋس پرەزيدەنتتەرىنىڭ بۇل پروبلەمانى رەتتەۋگە بەلسەنە قاتىسقانىن اتاپ ايتقىم كەلەدى. مينسكىدە قول جەتكەن كەلىسىمنىڭ ارقاسىندا قارۋلى قاقتىعىستى ۋشىقتىرماۋدىڭ مۇمكىندىگى تۋدى», – دەدى رەسەي پرەزيدەنتى.
ا.لۋكاشەنكو كەزدەسۋ بارىسىندا ءۇش ەلدىڭ ءوزارا ىقپالداستىق باعىتى, سونداي-اق ورنىقتى ءارى ءوزارا ءتيىمدى ىنتىماقتاستىقتى نىعايتۋ ماقساتىندا ساۋدا, اقشا-نەسيە جانە باسقا سالالاردا قابىلدانۋى قاجەت شارالار تالقىلانعانىن ايتتى.
«بۇدان ارعى ءىس-قيمىلداردىڭ بارلىق باعىتتارى بويىنشا ۇستانىمداردىڭ سايكەس كەلۋى ءبىزدىڭ كەزدەسۋىمىزدىڭ قورىتىندىسى بولدى. ءبىز ساۋدا-ەكونوميكالىق ىنتىماقتاستىقتى الەمدىك كونيۋنكتۋرانىڭ جاڭا جاعدايلارى مەن ەلدەرىمىزدىڭ ەكونوميكالارىنداعى قازىرگى احۋالدى ەسكەرە وتىرىپ دامىتۋ ءۇشىن قوسىمشا شارتتار قالىپتاستىرۋ جونىندە ناقتى قادامداردى بەلگىلەدىك», – دەدى بەلارۋس پرەزيدەنتى.
ساكەن مايلىباي.