استانا. 20 ناۋرىز. بۇگىن اقوردادا قازاقستان پرەزيدەنتى نۇرسۇلتان نازارباەۆ رەسەي فەدەراتسياسىنىڭ پرەزيدەنتى ۆلاديمير پۋتينمەن كەزدەستى. بۇل تۋرالى اقوردا ءباسپاسوز قىزمەتىنىڭ دەرەگىنە سۇيەنگەن egemen.kz ءتىلشىسى حابارلادى.
مەملەكەتتەر باسشىلارى ساۋدا-ەكونوميكالىق, ينۆەستيتسيالىق, ترانزيتتىك-كولىكتىك ىنتىماقتاستىقتىڭ باسىمدىعى بار سالالارىن قاراستىردى.
قازاقستان مەن رەسەي پرەزيدەنتتەرى, سونداي-اق, حالىقارالىق جانە وڭىرلىك كۇن تارتىبىندەگى وزەكتى ماسەلەلەرگە توقتالدى.
نۇرسۇلتان نازارباەۆ ءوزارا ءىس-قيمىلدىڭ قازىرگى اۋحالى مەن ەكىجاقتى قارىم-قاتىناستاردىڭ ودان ءارى دامۋ جايىن تالقىلاۋ ءۇشىن بۇل كەزدەسۋدىڭ ماڭىزدىلىعىن اتاپ ءوتتى.
«الدا الۋان ءتۇرلى وقيعالار تۇر, سونىڭ ەڭ باستىسى – ۇلى وتان سوعىسىنداعى جەڭىستىڭ 70 جىلدىعى. سونىمەن قاتار, ءبىزدىڭ ەلىمىز تمد-عا توراعالىق ەتەدى, سوعان بايلانىستى استانادا دوستاستىق مەملەكەتتەرى باسشىلارىنىڭ كەزدەسۋى وتەتىن بولادى. بۇدان بولەك, قازاقستان مەن رەسەيدىڭ وڭىرارالىق ىنتىماقتاستىعى فورۋمىن وتكىزۋ جوسپارلانعان. جالپى, ەكىجاقتى ءىس-قيمىلدىڭ كوپتەگەن ماسەلەلەرى تيىسىنشە شەشىلۋدە», – دەدى مەملەكەت باسشىسى.
قازاقستان پرەزيدەنتى ءۇش مەملەكەت باسشىسىنىڭ كەزدەسۋى وڭىردە جانە الەمدە بولىپ جاتقان وقيعالار جونىندە پىكىر الماسۋعا, سونداي-اق جاھاندىق ەكونوميكاداعى داعدارىس كورىنىستەرىنە قارسى تۇرۋ شارالارىن پىسىقتاۋعا مۇمكىندىك بەرەتىنىن ايتتى.
ۆلاديمير پۋتين ۇشجاقتى كەزدەسۋ وتكىزۋ تۋرالى باستاماسى ءۇشىن نۇرسۇلتان نازارباەۆقا العىس ايتتى.
«ءبىز ءۇشىن جاقىن سەرىكتەس جانە وداقتاستىڭ ءبىرى بولىپ سانالاتىن قازاقستانعا ءاردايىم زور ىقىلاسپەن كەلەمىن. الەمدىك ەكونوميكاداعى احۋال وڭاي بولىپ تۇرعان جوق. قازاقستاندا جانە بۇكىل پوستكەڭەستىك كەڭىستىكتە, سونىڭ ىشىندە ءسىزدىڭ تىكەلەي قاتىسۋىڭىزبەن قۇرىلىپ جاتقان ەكونوميكا مەن الەۋمەتتىك سالا جۇمىسىنىڭ نەگىزدەرى قيىندىقتاردى ەڭسەرۋگە سەپتىگىن تيگىزەدى دەپ سەنەمىن. ارينە, ءبىز مۇنى بۇدان بۇرىنعى جىلدارداعىداي بىرلەسىپ اتقارساق, بۇگىنگى قالىپتاسقان قيىن جاعدايدان وڭاي شىعا الامىز», – دەدى رەسەي پرەزيدەنتى.
ساكەن مايلىباي.