قاسىم-جومارت توقاەۆتىڭ توراعالىعىمەن استانادا وتەتىن VIII الەمدىك جانە ءداستۇرلى دىندەر ليدەرلەرىنىڭ سەزى بۇرىنعىدان دا مازمۇندى فورماتتا ۇيىمداستىرىلىپ جاتىر. جاھاندىق دەڭگەيدەگى بەدەلدى ءدىني قايراتكەرلەر مەن ساياساتكەرلەردى توعىستىرعان فورۋم قازىرگى كەزەڭدەگى ەڭ وزەكتى ماسەلەلەردى تالقىلاۋعا ارنالادى, دەپ حابارلايدى Egemen.kz.
سەزد دىندەر اراسىنداعى تىكەلەي ديالوگ پەن سەنىمدى نىعايتۋعا باعىتتالعان. قاتىسۋشىلار پاندەميادان كەيىنگى كەزەڭدە جانە جاڭا گەوساياسي سىن-قاتەرلەر جاعدايىندا ادامزات الدىنداعى جاھاندىق مىندەتتەردى شەشۋدىڭ ورتاق جولدارىن قاراستىرادى.
فورۋمعا دۇنيەجۇزىلىك يسلام ليگاسىنىڭ باس حاتشىسى مۇحاممەد بەن ابدۋلكاريم ءال-يسا, ماسكەۋ جانە بۇكىل رۋس پاتريارحى كيريلل, يەرۋساليم پاتريارحى فەوفيل ءىىى, ءيزرايلدىڭ باس راۆۆيندەرى, بۇۇ باس حاتشىسىنىڭ ورىنباسارى ميگەل انحەل موراتينوس جانە وزگە دە الەمدىك دەڭگەيدەگى ليدەرلەر جينالادى.
سەزد جۇمىسىنا ءتورت سەكتسيالىق وتىرىس, دىندەر ديالوگىنا ارنالعان پلەنارلىق ماجىلىستەر, بۇۇ وركەنيەتتەر اليانسىنىڭ ءدىني نىسانداردى قورعاۋ جونىندەگى ارنايى سەسسياسى جانە جاس ءدىني كوشباسشىلاردىڭ II فورۋمى ەندى. سونىمەن قاتار, ساراپتامالىق دوڭگەلەك ۇستەلدە عىلىم مەن ءدىني ديپلوماتيانى ۇشتاستىرۋ ماسەلەلەرى تالقىلانادى.
فورۋم اياسىندا ەسىل جاعاسىندا بەيبىتشىلىك پەن كەلىسىم ساياباعى اشىلادى. ونىڭ ورتالىعىندا ورنالاسقان ء«ومىر اعاشى» مونۋمەنتى وتكەن, بۇگىن جانە بولاشاقتى ساباقتاستىراتىن سيمۆول رەتىندە ۇسىنىلادى. بۇعان قوسا, «تۋرين پلاششانيتساسى» مەن «قاسيەتتى كىتاپتار» كورمەلەرى اشىلىپ, قۇران, ءتاۋرات, ءىنجىل, بۋددا جازبالارى سىندى سيرەك جادىگەرلەر كوپشىلىك نازارىنا كورسەتىلەدى.