«قايرات» فۋتبول كومانداسى تاريحىندا العاش رەت چەمپيوندار ليگاسىنىڭ جالپى كەزەڭىندە باق سىنايدى. «قايرات» فك ۋەفا چەمپيوندار ليگاسىنىڭ جالپى كەزەڭىندە ءوز الاڭىنداعى ماتچتارعا بيلەت ساتۋ ءتارتىبى مەن مەرزىمدەرىن جاريالادى, دەپ جازادى Egemen.kz.
جانكۇيەرلەر اسىعا كۇتكەن «قايرات» – «رەال مادريد» ماتچىنىڭ بيلەتى 23 قىركۇيەك كۇنى 17: 00-دە ساتىلىمعا شىعادى. بيلەتتەر كلۋبتىڭ رەسمي سايتى مەن Ticketon پلاتفورماسىندا قولجەتىمدى بولادى.
ءبىر جسن بويىنشا ءبىر ادامعا ەكى بيلەتتەن ارتىق ساتىلمايدى. «قايرات» فۋتبول كومانداسى دەرەكتەر ساتىپ الۋ جانە ستاديونعا كىرگىزۋ كەزىندە مۇقيات تەكسەرىلەتىنىن اتاپ وتكەن.
ال بيلەت باعاسى 30 000 - 250 000 تەڭگە ارالىعىندا بەلگىلەنگەن.
«باعا ساياساتى تۋرنير تالاپتارىنا جانە چەمپيوندار ليگاسى ماتچتارىن ۇيىمداستىرۋدىڭ حالىقارالىق تاجىريبەسىنە سايكەس كەلەدى. بيلەتتەردىڭ ءبىر بولىگى ءداستۇرلى تۇردە بەكىتىلگەن الەۋمەتتىك جانە كلۋب كۆوتالارى اياسىندا بولىنەدى. ولار «قايرات» اكادەمياسىنىڭ جانە كلۋب فيليالدارىنىڭ باپكەرلەرى مەن تاربيەلەنۋشىلەرىنە, پاراليمپيادالىق سپورت تۇرلەرىنىڭ سپورتشىلارىنا, سونداي-اق كلۋبتىڭ قىزمەتكەرلەرى مەن ارداگەرلەرىنە بەرىلەدى», دەلىنگەن رەسمي حابارلامادا.
سونداي-اق كلۋب جەلىدە بيلەتتىڭ الدىن الا ساتىلىمى تۋرالى جالعان اقپارات تارالىپ جاتقانىن ەسكەرتىپ, بيلەتتەردى Qairat SuperApp ءموبيلدى قوسىمشاسى جانە Ticketon سەرۆيسى ارقىلى ساتىپ الۋعا كەڭەس بەرىپ وتىر.