مادەنيەت جانە اقپارات ءمينيسترى ايدا بالاەۆا قازاقستاندىقتاردى وتباسى كۇنىمەن قۇتتىقتاپ, وتباسى قۇندىلىقتارىنىڭ قوعامداعى ماڭىزىنا توقتالدى, دەپ جازادى Egemen.kz.
— وتباسى – ۇرپاقتار ساباقتاستىعىن جالعايتىن, ادامعا مىنەز-ق ۇلىق پەن بولمىس قالىپتاستىراتىن ءارى ومىرگە ءمان بەرەتىن كۇش. قوعامنىڭ بولاشاعى دا, ەلدىڭ كەلىسىم مەن وركەندەۋگە جەتەر جولى دا بەرىك وتباسىلارعا بايلانىستى. حالقىمىز تەگىننەن-تەگىن «وتان – وتباسىنان باستالادى» دەمەگەن, — دەدى مينيستر.
ول بالالارعا قامقورلىق, ۇلكەندەرگە قۇرمەت, ءداستۇر مەن رۋحاني قۇندىلىقتاردىڭ ساباقتاستىعى حالقىمىزدى ءبىرتۇتاس ءارى قۋاتتى ەتەتىنىن اتاپ ءوتتى.
پرەزيدەنت قاسىم-جومارت توقاەۆتىڭ ءسوزىن كەلتىرە وتىرىپ, ايدا بالاەۆا بەرىك وتباسى ەلدىڭ تۇراقتى دامۋىنىڭ كەپىلى ەكەنىن جانە مەملەكەت انا مەن بالاعا قامقورلىق جاساۋعا ايرىقشا نازار اۋداراتىنىن ايتتى.
ءمينيستردىڭ مالىمەتىنشە, قازاقستاندىقتاردىڭ باسىم بولىگى (85–89%) ءۇشىن باستى قۇندىلىق — ەرلى-زايىپتىلار مەن بالالار اراسىنداعى سۇيىسپەنشىلىك, سىيلاستىق پەن تۇسىنىستىك. بۇل قۇندىلىقتار بەرەكەلى وتباسىنىڭ نەگىزىن قالايدى.
سوڭعى بەس جىلدا اجىراسۋلار سانى شامامەن 16 پايىزعا ازايعان. 2019 جىلدان باستاپ جوعارعى سوتپەن بىرلەسىپ جۇزەگە اسىرىلىپ كەلە جاتقان «باقىتتى وتباسى» جوباسى كوپتەگەن داۋلاردى شەشۋگە ىقپال ەتتى. 2024 جىلى ىستەردىڭ 37,5 پايىزى تاتۋلاسۋمەن اياقتالدى.
سونىمەن قاتار, نەكە قۇرعالى جاتقان جۇپتارعا ارنالعان وقىتۋ باعدارلامالارى, اتا-انا جاۋاپكەرشىلىگىن ارتتىرۋعا باعىتتالعان «اتا-انالار اكادەمياسى» جوباسى ىسكە اسىرىلىپ كەلەدى.
بۇگىندە ەلىمىزدە 131 وتباسى قولداۋ ورتالىعى جۇمىس ىستەپ تۇر. جىل باسىنان بەرى 40 مىڭنان استام ازامات ورتالىقتارعا جۇگىنىپ, 15 مىڭنان استام كەڭەس بەرىلدى, 4 مىڭعا جۋىق ادام كەشەندى قولداۋعا الىندى.
— ءار شاڭىراقتا بەيبىتشىلىك, سۇيىسپەنشىلىك پەن كەلىسىم ورناسىن. سىزدەردىڭ وتباسىلارىڭىزعا باقىت, دەنساۋلىق پەن بەرەكە تىلەيمىن. ال ءوسىپ كەلە جاتقان ۇرپاق قامقورلىق پەن ءوزارا قۇرمەتكە تولى ورتادا بوي تۇزەسىن, — دەپ قۇتتىقتاۋىن قورىتىندىلادى ايدا بالاەۆا.