«استانا وپەرا» XIII تەاتر ماۋسىمىن م.اۋەزوۆتىڭ ليبرەتتوسىنا ا.جۇبانوۆ پەن ل.ءحاميديدىڭ «اباي» وپەراسىمەن اشتى. 6-7 قىركۇيەكتە وپەرا سوليستەرى, حور, بالەت جانە ميمانس ارتىستەرى, سيمفونيالىق وركەستر مۋزىكانتتارى تەاتردىڭ باس ديريجەرى – قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ لاۋرەاتى الان بورىباەۆتىڭ جەتەكشىلىگىمەن ونەر كورسەتتى.
«استانا وپەرانىڭ» جاڭا تەاتر ماۋسىمىنىڭ اشىلۋى – ۇجىم ءۇشىن عانا ەمەس, بارشا كورەرمەن ءۇشىن دە ۇلكەن مەرەكە. بۇل ەلوردالىقتار مەن قالا قوناقتارىنىڭ سۇيىكتى تەاتر اتموسفەراسىنا قايتا بويلايتىن, ارتىستەرمەن ساعىنىسىپ قاۋىشاتىن كەرەمەت ءسات.
– شىعارماشىلىق ۇجىمىمىز جاڭا تەاتر ماۋسىمىنا تىڭ يدەيالارمەن جانە كورەرمەندەر اۋديتورياسىنىڭ سۇرانىسىنا ساي اۋقىمدى جوبالارمەن قادام باسقالى تۇر. بۇل عالامات پرەمەرالارمەن, سان الۋان فەستيۆالدارمەن, مازمۇندى گاسترولدەرمەن, وپەرالىق جانە بالەتتىك قويىلىمدارمەن ەستە قالاتىن كەزەڭ بولماق. ءبىزدىڭ ماڭىزدى باستامالارىمىزدى جۇزەگە اسىرۋعا مادەنيەت جانە اقپارات مينيسترلىگى ۇلكەن قولداۋ ءبىلدىرىپ جاتقانىن اتاپ وتكىم كەلەدى. سونىمەن, وسى كۇزدە ساحنامىزدا وپەرا ونەرىنىڭ جاۋھارى دج.ۆەرديدىڭ «ريگولەتتو» وپەراسىنىڭ كوپتەن كۇتكەن پرەمەراسىن ۇسىنامىز, ال جىلدىڭ سوڭىندا العاش رەت كورەرمەندەرگە تىلەۋعازى بەيسەمبەكتىڭ ليبرەتتوسىنا س.ءابدىنۇروۆ پەن ءا.ءابدىنۇروۆتىڭ «قىپشاق قىزى اپپاق» سپەكتاكلىن تانىستىرماقشىمىز. بۇدان بولەك, دارىندى جاستارىمىزدى قولداۋعا, وڭىرلەردەگى جانە شەتەلدەگى ارىپتەستەرىمىزبەن مادەني قارىم-قاتىناستى نىعايتۋعا باعىتتالعان جوبالارىمىز ءارى قاراي جەمىستى جالعاسىن تابادى. مەن «استانا وپەرانىڭ» كورەرمەندەرىنە دايىنداعان توسىنسىيلارىنىڭ ازعانتاي بولىگىنە عانا توقتالىپ ءوتتىم. ۇجىمىمىزعا جاڭا ماۋسىمدا شالقار شابىت پەن تولاعاي تابىس تىلەي وتىرىپ, بارلىق ونەر سۇيەر قاۋىمدى تەاترىمىزدىڭ ەلەۋلى جەتىستىكتەرىنىڭ كۋاسى بولۋعا شاقىرامىن, – دەپ اتاپ ءوتتى «استانا وپەرا» ديرەكتورى الەكساندر سوۆوستيانوۆ.
«استانا وپەرانىڭ» جاڭا XIII تەاتر ماۋسىمى ايگىلى «اباي» ۇلتتىق وپەراسىمەن اشىلعانى كەزدەيسوقتىق ەمەس. ءبىر جاعىنان بۇل اباي قۇنانباي ۇلىنىڭ رۋحىنا قۇرمەت بولسا, ەكىنشى جاعىنان اقىننىڭ 180 جىلدىق تويىن مەرەكەلەۋ, سونىمەن قاتار وسى قىركۇيەكتە «اباي» وپەراسىنىڭ ەلوردالىق تەاتر ساحناسىندا قويىلعانىنا 10 جىل تولادى. 2015 جىلى قىركۇيەكتە وسىناۋ ۇلتتىق كلاسسيكا جاۋھارى ديريجەر الان بورىباەۆ پەن الەمگە ايگىلى رەجيسسەر دجانكارلو دەل موناكونىڭ جاڭا قويىلىمىندا كورەرمەنگە العاش ۇسىنىلدى. اراعا ءۇش جىل سالىپ تەاتر وسى ەڭبەگى ءۇشىن قازاقستان رەسپۋبليكاسىنىڭ مادەنيەت پەن ونەر سالاسىنداعى مەملەكەتتىك سىيلىعىنا يە بولدى.
«اباي» وپەراسى – ۇلتتىق وپەرا ونەرى جەتىستىكتەرىنىڭ ءبىرى سانالادى. بىلتىر ۇجىم وسى وپەرانى «مۋزىكانى كورۋ» حالىقارالىق فەستيۆالى اياسىندا ماسكەۋدەگى ۇلكەن تەاتر ساحناسىندا زور تابىسپەن ۇسىنعان. ءار جىلدارى ۇلتتىق جاۋھار يتاليادا, وزبەكستاندا شىرقالىپ, شەتەلدىك كورەرمەندەردىڭ وسىناۋ ماڭگىلىك تۋىندىعا دەگەن سۇيىسپەنشىلىگىن وياتتى.
ۇلى ابايدىڭ پاراساتتىلىق پەن دانالىققا تولى بەينەسى ارقىلى قازاق حالقىنىڭ بولمىسى بەينەلەنگەن سپەكتاكل ەشكىمدى بەيجاي قالدىرمايدى. قويىلىم ماحاببات, جاقسىلىق پەن ز ۇلىمدىقتىڭ كۇرەسى تۋرالى بايانداپ قانا قويمايدى, حالقىمىزدىڭ فيلوسوفيالىق وي-تولعامدارىن جانە مادەنيەتى مەن ونەرىنىڭ بىرەگەي داستۇرلەرىن اشادى. وپەرانىڭ وسى ۇلتتىق بوياۋىنىڭ ءبىرتۋار شەبەرلەر ەتسيو فريدجەريو مەن «وسكار» سىيلىعىنىڭ لاۋرەاتى فرانكا سكۋارچاپينو جاساعان تاماشا ستسەنوگرافيامەن جانە كوستيۋمدەرمەن جاراسىمدى ۇيلەسىم تابۋى شىمىلدىق اشىلعان ساتتەن باستاپ سوڭعى كورىنىستەرىنە دەيىن كورەرمەندەردى اباي ءومىر سۇرگەن ءداۋىر اتموسفەراسىنا بويلاتادى. ەسكە سالا كەتەيىك, رەجيسسەردىڭ كەڭەسشىسى – قازاقستاننىڭ حالىق ءارتىسى ەسمۇقان وباەۆ, باس حورمەيستەر – قازاقستاننىڭ ەڭبەك سىڭىرگەن قايراتكەرى ەرجان ءداۋىتوۆ.
ءتۇرلى كۇندەرى سپەكتاكل كەيىپكەرلەرىنىڭ بەينەلەرىن «استانا وپەرانىڭ» دارىندى ارتىستەرى جۇزەگە اسىرادى. وسى جولى اباي پارتياسىن قازاقستاننىڭ ەڭبەك سىڭىرگەن قايراتكەرلەرى جانات شىبىقباەۆ پەن تالعات مۇساباەۆ دايىنداپتى. ايداردى رامزات بالاكيشيەۆ پەن قازاقستاننىڭ ەڭبەك سىڭىرگەن قايراتكەرى جان تاپين ورىندادى. اجار – قازاقستاننىڭ ەڭبەك سىڭىرگەن قايراتكەرى سالتانات احمەتوۆا جانە نازىم ساعىنتاي, ءازىم – بەيىمبەت تاڭارىقوۆ, جيرەنشە – التىنبەك ءابىلدا, تالعات عالەەۆ. قارلىعاشتىڭ بەينەسىن سالتانات مۇراتبەكوۆا مەن تاتيانا ۆيتسينسكايا سومدايدى. كوكباي – دىنمۇحامەد كوشكىنباەۆ پەن سۇلتان باقىتجان. سىرتتاننىڭ رولىندە – بولات ەسىمحانوۆ پەن شىڭعىس راسىلحان. نارىمبەتتى ارتۋر عابديەۆ پەن نۇرسۇلتان انۋاربەك, ال مەستى ءاليحان زەينوللا تانىستىرادى.