بۇل كۇنى وسكەمەندەگى ونەر مۋزەيىندە ادەت-عۇرىپ, سالت-داستۇرىمىزدەن كورىنىستەر قويىلىپ, رۋحانياتقا تولى ۇلكەن ءىس-شارا بولدى. سوناۋ شىمكەنت قالاسىنان كەلگەن «ادەت-عۇرىپ جانە سالت-ءداستۇر ورتالىعى» ۇجىمى قالا تورىندە سالتىمىزدىڭ سان ءتۇرىن ساحنالادى.
قازاق حالقىنىڭ ۇلتتىق مۇراسىن زاماناۋي ۇلگىدە جاڭعىرتىپ, كونە داستۇرلەردى بۇگىنگى قوعام ومىرىنە بەيىمدەپ, جاستاردىڭ ۇلتتىق قۇندىلىقتارعا دەگەن قىزىعۋشىلىعىن ارتتىرۋدى ماقسات ەتكەن ءىس-شاراعا جەرگىلىكتى قولونەر شەبەرلەرى دە قاتىستى. مۋزەيگە كىرگەن بويدا وسكەمەندىك ونەرپازدار اۋەلەتە ءان سالىپ, الىستان كەلگەن مەيمانداردى قارسى الدى. ءا دەگەندە وڭتۇستىك وڭىردەن كەلگەن قوناقتار ساپاردىڭ ماقساتىن ءتۇسىندىرىپ, ونەر مۋزەيىنە دەپ الىپ كەلگەن سىيلىقتارىن تابىستادى.
– جاھاندانۋ داۋىرىندە ۇلتتىق بولمىستى ساقتاۋ – ەل بولاشاعى ءۇشىن اسا ماڭىزدى مىندەت. قازىرگى تاڭدا جاس ۇرپاقتىڭ ساناسىندا ءداستۇر مەن سالتقا دەگەن كوزقاراستىڭ السىرەپ, كەيبىر ۇلتتىق قۇندىلىقتاردىڭ ۇمىت بولا باستاۋى بايقالادى. وسىنداي جاعدايدا حالىقتىڭ تاريحي جادى مەن رۋحاني تۇتاستىعىن ۇمىتپاۋىمىز كەرەك. سول ءۇشىن دە وسىناۋ يگىلىكتى ساپارىمىزدى باستادىق, – دەدى شىمكەنت قالاسىنان كەلگەن «ادەت-عۇرىپ جانە سالت-ءداستۇر ورتالىعى» ديرەكتورى جۇماباي عاپپار ۇلى.
مادەني ءىس-شارادا قۇرساق شاشۋ, ات قويۋ, شىلدە كۇزەتۋ, تۇساۋ كەسۋ, جاقسىنىڭ ورنىنا اۋناتۋ سەكىلدى عۇرىپتار كورسەتىلدى. قوعامداعى ءداستۇر, ادەت-عۇرىپ تال بەسىكتەن جەر بەسىككە دەيىن جالعاسسا, بۇل كۇنگى قويىلىمدا شاڭىراققا كەلىن تۇسىرۋدەن باستاپ, كىشكەنتايدىڭ ءتاي-ءتاي باسقانعا دەيىنگى شاق قانا كورسەتىلدى. سونىڭ وزىندە قانشاما ماعىنا, ۇلكەن تاربيە جاتىر؟
كەش سوڭىندا ەكى تاراپ ءبىر-بىرىنە ريزاشىلىعىن ءبىلدىردى. شىعىستىڭ مادەنيەتىنە, رۋحانياتىنا بەيجاي قارامايتىن ازاماتتار بىزگە دە «ادەت-عۇرىپ ورتالىعى» كەرەك ەكەن دەسىپ تارقاستى.
شىعىس قازاقستان وبلىسى,
وسكەمەن قالاسى