پەتروپاۆل. 20 ناۋرىز. وبلىس ورتالىعىنداعى № 20 قازاق مەكتەبىندە تۇعىرى بولەك, ۇلت ءۇشىن تۋعان جامپوز جۇمابەك تاشەنەۆكە ەسكەرتكىش-ءمۇسىن قويىلىپ, مۇراجاي اشىلدى. بۇل تۋرالى وبلىستىق اكىمدىكتىڭ ءباسپاسوز قىزمەتى حابارلادى.
ن. حرۋششەۆتىڭ قۇرىق بويلامايتىن زىمياندىق ساياساتى سالدارىنان قازاقتىڭ ۇلان-بايتاق جەرى بولشەكتەنىپ كەتە جازداعان تۇستا ارىستانداي ايبات, جولبارىستاي قايرات كورسەتىپ, ەل تۇتاستىعىنىڭ ساقتالىپ قالۋىنا بىردەن-ءبىر سەبەپكەر بولعان بەلگىلى مەملەكەت جانە قوعام قايراتكەرىن سولتۇستىكقازاقستاندىقتار دا ەرەكشە قۇرمەتتەيدى. 1947-1952 جىلدارى-وبلاتكوم توراعاسىنىڭ ورىنباسارى, توراعاسى بولعان كەزەڭدە ءوڭىر ەكونوميكاسىن, مادەنيەتىن, رۋحانياتىن دامىتۋعا قوسقان ۇلەسى ولشەۋسىز. كوپتەن بەرى ەسىمى ەلەۋسىز بولىپ كەلگەن نار تۇلعانىڭ 100 جىلدىق مەرەيتويى قارساڭىندا پەتروپاۆل قالاسىنداعى № 20 مەكتەپكە اتىن بەرۋ تۋرالى كوپشىلىكتىڭ ۇسىنىستارى ۇكىمەت تاراپىنان قولداۋ تاپتى. ەندى, مىنە, وسى وقۋ ورداسى الدىنا ەسكەرتكىش-ءمۇسىن ورناتىلىپ, مۇراجاي اشىلىپ, مارقۇمنىڭ تۋعان-تۋىستارىنىڭ, زيالى قاۋىم وكىلدەرىنىڭ, جاستاردىڭ, وقۋشىلاردىڭ قاتىسۋمەن سالتاناتتى جاعدايدا ءوتتى.
وبلىس اكىمى ەرىك سۇلتانوۆ جينالعانداردى ايتۋلى وقيعامەن قۇتتىقتادى. مارقۇمنىڭ ۇلى سايان جۇمابەك ۇلى اكە جايلى جىلى ەستەلىكتەرمەن, ءار جىلدارى قىزمەت اتقارعان سولتۇستىك قازاقستان وبلىسىنىڭ قۇرمەتتى ازاماتى جاقسىلىق ىسقاقوۆ جارقىن بەينە جايلى اسەرلەرىمەن ءبولىستى.
ەسكەرتكىش-ءمۇسىننىڭ اۆتورى, بۇگىندە ت. جۇرگەنوۆ اتىنداعى قازاق ۇلتتىق ونەر اكادەمياسىندا كافەدرا مەڭگەرۋشىسى قىزمەتىن اتقاراتىن مالىك جۇنىسباەۆتىڭ ەسىمى دە قىزىلجارلىقتارعا جاقسى تانىس.كەزىندە ۇكىلى ىبىرايدىڭ ءمۇسىنىن تاماشا سومداعان شەبەرگە تاڭداۋدىڭ ءتۇسۋى بەكەر ەمەس. ونىڭ وزىنە جۇكتەلگەن مىندەتتى ۇلكەن جاۋاپكەرشىلىكپەن اتقارىپ شىققان. پاراساتتى كەلبەت, قايسار رۋح مۇسىندەكەلىسىم تاپقان.
مارتەبەلى قوناقتار مۇراجايدىڭ تۇساۋكەسەرىنە قاتىسىپ, قايراتكەردىڭ جەكە زاتتارىمەن, ەڭبەك, ءومىر جولدارىنان سىر شەرتەتىن شىعارمالارمەن, جازبالارمەن, ەستەلىكتەرمەن تانىستى.
س. مۇقانوۆ اتىنداعى امبەباپ كىتاپحانادا «ماڭگىلىك ەلدىڭ پاراساتتى تۇلعاسى – جۇمابەك تاشەنەۆ» تاقىرىبى بويىنشا دوڭگەلەك ۇستەل ۇيىمداستىرىلىپ, باياندامالار تىڭدالدى.
ءومىر ەسقالي.
دەرەك, سۋرەت: سولتۇستىك قازاقستان وبلىسى اكىمدىگىنىڭ باسپاسوز قىزمەتى.