ەلىمىزدە ەكىنشى نارىقتاعى ۇيلەردى راسىمدەۋگە ارنالعان «تسيفرلىق يپوتەكا» پيلوتتىق جوباسى ىسكە قوسىلدى. جوبا ادىلەت جانە تسيفرلىق دامۋ مينيسترلىكتەرىنىڭ بىرلەسكەن بۇيرىعىمەن بەكىتىلدى. ەندى جىلجىمايتىن م ۇلىكتى ساتىپ الۋ-ساتۋ جونىندەگى نوتاريالدىق مامىلەلەردى تولىقتاي ونلاين راسىمدەۋگە بولادى, دەپ جازادى Egemen.kz.
جاڭا جۇيە يپوتەكالىق نەسيەگە ءوتىنىم بەرۋدەن باستاپ, تۇرعىن ءۇيدى راسىمدەۋگە دەيىنگى بارلىق پروتسەستى قامتيدى. ازاماتتار بانك سايتى نەمەسە ءموبيلدى قوسىمشا ارقىلى «تسيفرلىق يپوتەكانى» تاڭداپ, ونلاين كالكۋلياتوردا ءۇيدىڭ قۇنى, باستاپقى جارنا جانە نەسيە مەرزىمىن ەنگىزەدى. اي سايىنعى تولەم اۆتوماتتى تۇردە ەسەپتەلىپ كورسەتىلەدى.
ءوتىنىش بەرۋشى جسن مەن تەلەفون ءنومىرىن ەنگىزىپ, SMS ارقىلى راستاۋ جاسايدى. وسىلايشا كەلىسىمدەرگە قول قويىلىپ, ساتىپ الۋ-ساتۋ شارتى ەلەكتروندى تۇردە راسىمدەلەدى.
ايتا كەتەيىك, بۇعان دەيىن Freedom Bank «ورلەۋ» مەملەكەتتىك باعدارلاماسى اياسىندا شاعىن جانە ورتا بيزنەسكە ارنالعان العاشقى تسيفرلىق كرەديتتى ۇسىنعان ەدى. ەندى جەكە تۇلعالار ءۇشىن دە قولجەتىمدى ونلاين يپوتەكالىق ءونىم پايدا بولدى.
بۇل باستاما تۇرعىن ءۇي نارىعىندا راسىمدەردى جەڭىلدەتىپ, ۋاقىتتى ۇنەمدەۋگە مۇمكىندىك بەرەدى.