بيىل ەلوردادا جالپى ۇزىندىعى شامامەن 12,5 شاقىرىم بولاتىن جاڭا جولدار سالىنىپ, ۇزىندىعى 58 شاقىرىمدى قۇرايتىن 50 كوشە جوندەۋدەن وتەدى. بۇل تۋرالى استانا قالاسىنىڭ اكىمى جەڭىس قاسىمبەك ءوزىنىڭ Instagram پاراقشاسىندا مالىمدەدى, دەپ جازادى Egemen.kz.
قالا اكىمدىگىنىڭ ايتۋىنشا, اتالعان جۇمىستار جول جابىندىسىنىڭ ساپاسىن ارتتىرۋعا, كولىك كەپتەلىسىن ازايتۋعا جانە قوزعالىس جاعدايىن جاقسارتۋعا مۇمكىندىك بەرەدى.
«بۇگىنگە دەيىن ۇزىندىعى 49 شاقىرىم بولاتىن 41 كوشەدە جۇمىس اياقتالدى. ماسەلەن, ابىلاي حان داڭعىلى ا.پۋشكين كوشەسىنەن ماناس كوشەسىنە دەيىن, فاحد بەن ابدۋل ازيز كوشەسى بايسەيىتوۆا كوشەسىنەن بەيسەكوۆا كوشەسىنە دەيىن, سەيفۋللين كوشەسى سارىارقا داڭعىلىنان رەسپۋبليكا داڭعىلىنا دەيىن, جۇماباەۆ كوشەسى مومىش ۇلى داڭعىلىنان قوشقارباەۆ داڭعىلىنا دەيىن, بوكەي كوشەسى وقجەتپەس كوشەسىنىڭ سوڭىنا دەيىن, اقبيداي كوشەسى ق.كەمەڭگەر ۇلى كوشەسىنەن ءوندىرىس كوشەسىنە دەيىن جانە تاعى باسقا», دەدى جەڭىس قاسىمبەك.
نەگىزگى جوبالاردىڭ قاتارىندا:
ش.بەيسەكوۆا كوشەسى مەن ن.تىلەنديەۆ داڭعىلى قيىلىسىنداعى كولىك ايرىعى. مۇندا بيىل جول وتپەسى مەن سەزدەردىڭ ارالىقتارى تولىق ورناتىلماق. بۇقار جىراۋ كوشەسى (جوشى حاننان تاۋەلسىزدىك داڭعىلىنا دەيىن) – جوبا اياسىندا تروتۋارلار, جارىقتاندىرۋ, باعدارشامدار جانە ينجەنەرلىك جەلىلەر قامتىلعان. اسفالت توسەلىپ, جارىق تىرەكتەرى قويىلدى, ەندى كابەل تارتۋ جانە تۇرعىن ءۇي كەشەندەرى ماڭىن اباتتاندىرۋ جۇمىستارى جۇرگىزىلۋدە. نىسان جىل سوڭىنا دەيىن تولىق ىسكە قوسىلادى. قايسەنوۆ كوشەسى ( ۇلى دالا داڭعىلىنان بۇقار جىراۋعا دەيىن) – ينجەنەرلىك جەلىلەر تارتىلىپ, جيەكتاستار مەن جارىق باعانالارى ورناتىلدى. اسفالتتىڭ العاشقى قاباتى توسەلگەن, تولىق اياقتالۋ قاراشا ايىنا بەلگىلەنگەن. ايتەكە بي كوشەسى (ق.مۇحامەدحانوۆتان سىعاناققا دەيىن) – قۇرىلىس پەن اباتتاندىرۋ جۇمىستارى ءجۇرىپ جاتىر, قازان ايىنىڭ سوڭىنا دەيىن اياقتاۋ جوسپارلانعان. مۇحامەدحانوۆ كوشەسى (قورعالجىن تاسجولىنان ايتماتوۆقا دەيىن) – وتكەن جىلى باستالعان جوبا بيىل جول قوزعالىسىن قامتاماسىز ەتۋدى كوزدەيدى. قازىر اسفالت توسەۋ جۇرگىزىلۋدە. 2025 جىلى ينجەنەرلىك جەلىلەر تولىق ورناتىلىپ, قوزعالىس قورعالجىن تاسجولىنا دەيىن اشىلادى. ت.رىسقۇلوۆ كوشەسى (ماڭگىلىك ەلدەن نۇراعا دەيىن) – اباتتاندىرۋ اياقتالىپ, ۆەلوجولاق سالىندى, اسفالتتىڭ ۇستىڭگى قاباتى توسەلدى. باعدارشامدار ورناتىلىپ, جاڭا ترانسفورماتورلىق قوسالقى ستانسا سالىندى. جوبانىڭ تولىق اياقتالۋى 2026 جىلعا جوسپارلانعان.