جانتۇرشىگەرلىك وقيعا 11 قىركۇيەك كۇنى ماڭعىستاۋ وبلىسى قاراقيا اۋدانى سەنەك ەلدى مەكەنىنەن 90 شاقىرىم قاشىقتىقتا ورنالاسقان اۆتوجولدا بولعان, دەپ جازادى Egemen.kz.
ماڭعىستاۋ وبلىستىق پوليتسيا دەپارتامەنتىنىڭ حابارلاۋىنشا, الدىن الا مالىمەتتەر بويىنشا, «Toyota Hiace» ماركالى اۆتوكولىكتىڭ جۇرگىزۋشىسى رولگە يە بولا الماي, سالدارىنان كولىك جول شەتىنە اۋدارىلىپ كەتكەن. كولىكتىڭ ىشىندە جولاۋشىلار بولعان.
— جول اپاتىنىڭ سالدارىنان 8 ادام وقيعا ورنىندا كوز جۇمدى, تاعى ەكى ادام اۋرۋحاناعا جەتكىزۋ بارىسىندا قايتىس بولدى. جۇرگىزۋشى مەن ەكى جولاۋشى ءتۇرلى جاراقاتتارمەن اۋرۋحاناعا جاتقىزىلدى, — دەلىنگەن حابارلامادا.
اتالعان دەرەك بويىنشا قىلمىستىق ءىس قوزعالعان. قازىرگى ۋاقىتتا وقيعانىڭ ءمان-جايىن انىقتاۋعا باعىتتالعان سوتقا دەيىنگى تەرگەۋ امالدارى جۇرگىزىلىپ جاتىر. قاجەتتى سوت-مەديتسينالىق ساراپتامالار تاعايىندالعان.