10 قىركۇيەك, سارسەنبى كۇنى ءماجىلىس كۋلۋارىندا قر ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا قازاقستاندىقتاردىڭ شەتەلدە جۇمىس ىستەۋىنە مەملەكەت تاراپىنان كورسەتىلىپ جاتقان قولداۋ شارالارى تۋرالى ايتتى, دەپ حابارلايدى Egemen.kz.
ءمينيستردىڭ ايتۋىنشا, بۇگىندە شەتەلدە ەڭبەك ەتكىسى كەلەتىن قازاقستاندىقتاردى اقپاراتتاندىرۋ جۇمىستارى بەلسەندى جۇرگىزىلىپ كەلەدى. اتاپ ايتقاندا, migration.enbek.kz پورتالى ىسكە قوسىلعان. وندا ازاماتتار وزىنە قاجەتتى ەل تۋرالى مالىمەت, ەڭبەك زاڭناماسى, سونداي-اق ەڭبەك قۇقىعىن قورعاۋ ءۇشىن قانداي قادام جاساۋ كەرەكتىگى جونىندە اقپارات الا الادى.
سۆەتلانا جاقىپوۆا ەڭ الدىمەن زاڭسىز ميگرانتتاردىڭ جاعدايى الاڭداتاتىنىن جەتكىزدى.
ء«بىزدىڭ الاڭداتارلىق جايت – شەتەلدە جۇرگەن زاڭسىز ميگرانتتارىمىزدىڭ جاعدايى. مەن ولاردى ەلگە ورالىپ, قۇجاتتارىن تولىق راسىمدەپ, زاڭدى تۇردە جۇمىس ىستەۋگە شاقىرامىن», دەدى ول.
سونىمەن قاتار, مينيستر قازاقستاندىقتاردىڭ شەتەلدە ەڭبەك قۇقىقتارىن قورعاۋ ءۇشىن مەملەكەتارالىق كەلىسىمدەر جاسالىپ جاتقانىن اتاپ ءوتتى. جاقىندا كاتارمەن كەلىسىم راتيفيكاتسيالاندى. بۇل قۇجات قازاقستان ازاماتتارىنا رەسمي تۇردە جۇمىس ىستەۋگە مۇمكىندىك بەرىپ, ولاردىڭ قۇقىقتارىنىڭ قورعالۋىنا كەپىلدىك بەرەدى.
«مۇنداي كەلىسىمدەر – العاشقىسى دا, سوڭعىسى دا ەمەس. قازىرگى تاڭدا كەزەكتە توعىز كەلىسىم تۇر. ونىڭ ىشىندە جاقىن جانە الىس شەتەل مەملەكەتتەرىمەن جاسالعان قۇجاتتار بار, كەيبىرى قول قويىلىپ, كۇشىنە ەندى», دەدى سۆەتلانا جاقىپوۆا.