اتىراۋ وبلىسىنداعى قۇلسارىدا «كەلەشەك مەكتەبى» سالىنىپ جاتىر. وسى ءبىلىم ورداسىنىڭ شاتىرى قۇلاپ قالدى, دەپ جازادى Egemen.kz.
«Samruk-Kazyna Construction» اق-نىڭ مالىمەتىنشە, مەكتەپتىڭ قۇرىلىسىن «Turan Ascent» جشس جۇرگىزىپ جاتىر. مەكتەپ 1200 ورىنعا ەسەپتەلگەن. قۇرىلىستى جىل سوڭىنا دەيىن اياقتاۋ كوزدەلگەن.
«الدىن الا مالىمەت بويىنشا وقيعانىڭ سەبەبى قۇرىلىس ماتەريالدارىن دۇرىس ساقتاماۋ جانە ورنالاستىرۋ تالاپتارىنىڭ بۇزىلۋىنان بولعان. اتاپ ايتقاندا, سپورت زالىنىڭ شاتىرىنا 6 توننادان استام اۋىر ماتەريالدار قويىلىپ, كونسترۋكتسياعا زاقىم كەلتىرگەن. وقيعاعا بايلانىستى تاپسىرىس بەرۋشى تاراپىنان باسشىلىق, تەحنيكالىق جانە اۆتورلىق قاداعالاۋ وكىلدەرى كىرەتىن كوميسسيا قۇرىلدى. جوبالىق شەشىمدەرگە سايكەستىگىن جانە كونسترۋكتسيالاردىڭ كوتەرۋ قابىلەتىن تەكسەرۋ ءۇشىن ارنايى تەحنيكالىق ساراپتاما ۇيىمى تارتىلدى», دەپ حابارلادى كومپانيادان.
قورىتىندى شەشىمدى ساراپتامانىڭ ناتيجەسىنە سايكەس قابىلداۋ كوزدەلىپ وتىر. مەردىگەر انىقتالعان بارلىق كەمشىلىكتى جويۋعا مىندەتتى بولادى.