جاساندى ينتەللەكت قۇزىرەتتەرىن وقۋشى كەزدەن باستاپ قالىپتاستىرۋ – ەلىمىزدىڭ ادام كاپيتالىن دامىتۋدىڭ ستراتەگيالىق باعىتى. قازىردىڭ وزىندە ىبىراي التىنسارين اتىنداعى ۇلتتىق ءبىلىم اكادەمياسى «تسيفرلىق ساۋاتتىلىق», «ينفورماتيكا» وقۋ پاندەرىنە جي تاقىرىپتارىن كىرىكتىردى. 2025–2026 وقۋ جىلىنان باستاپ اتالعان پاندەردى وقىتۋدا جي نەگىزدەرى, قاعيداتتارى, قولدانۋ ەرەجەسى, ت.ب. تاقىرىپتار قامتىلادى. وقۋشىعا جي قولدانۋدىڭ ەتيكالىق تالاپتارى دا تۇسىندىرىلەدى. جاساندى زەردەنى قولدانۋشى ادام اكادەميالىق ادالدىق تالاپتارىن ساقتاۋعا ءتيىس. وقۋشىلار دا وسى تالاپتاردى ءبىلۋى قاجەت.
ودان بولەك MIT-پەن سەرىكتەستىكتە «Day of AI» كۋرسى قازاق جانە ورىس تىلدەرىنە اۋدارىلىپ, بەيىمدەلىپ جاتىر. اتالعان باعدارلامانى قازاق جانە ورىس تىلىندە اۋدارىپ قانا قويماي, ونىڭ ىشكى كونتەنتى مەن تابيعاتى وتاندىق ءبىلىم مازمۇنىمەن قامتىلۋى كەرەك.
تاعى ءبىر ايتا كەتەرلىگى, 180 مىڭنان استام پەداگوگ «Ustaz» پلاتفورماسىندا جي بويىنشا بىلىكتىلىكتى ارتتىرۋدان ءوتتى. 2025 جىلدىڭ جازىندا «ورلەۋ» ورتالىعى مۇعالىمدەرگە جاساندى ينتەللەكتىنى وقۋ ۇدەرىسىندە قولدانۋ جولدارىن ۇيرەتتى. ويتكەنى وقۋشىلارعا ءبىلىم مەن تاربيە بەرەتىن ۇستازدار جاساندى زەردەنىڭ قىر-سىرىن وقۋشىلاردان كەم بىلمەۋى كەرەك.
سونىمەن قاتار «كەلەشەك مەكتەپتەرى» جوباسى اياسىندا 1300-دەن استام مەكتەپتە تسيفرلىق كابينەتتەر, STEM جانە روبوتتەحنيكا زەرتحانالارى اشىلىپ جاتىر. وسى كابينەتتەر مەن زەرتحانالاردا ۇيىرمە ساباقتارى جۇرەدى. ۇيىرمە ساباقتارى ناقتى عىلىم سالالارى (ماتەماتيكا, فيزيكا, حيميا, ت.ب. پاندەرمەن) تىعىز بايلانىستى. وسى عىلىم سالالارىندا جي يگىلىكتەرىن قولدانۋ – زامان تالابى.
جولداۋدا ايتىلعانداي, اۋىل مەكتەپتەرىنە ارنالعان «Qazaq digital mektebi» ۇلگىسىن ەنگىزۋ ارقىلى قاشىقتان وقىتۋ مۇمكىندىگىن كەڭەيتۋ جوسپارلانىپ وتىر. شالعايداعى ەلدى مەكەندەردىڭ جانە شاعىن جيناقتى اۋىل مەكتەپتەرىنىڭ وقۋشىلارىنا قاشىقتان وقىتۋ تەحنولوگياسى كومەگىمەن ساپالى ءبىلىم الۋىنا جاعداي جاسالادى. بىلىكتى, شەبەر ءارى تاجىريبەلى ۇستازدار شالعايداعى اۋىل بالالارىنا قاشىقتان ساباق جۇرگىزەدى.
كاسىپكەرلەردى تارتا وتىرىپ, وڭىرلەردە بالالاردى دامىتۋ ورتالىقتارىن اشۋ دا نازاردان تىس قالماق ەمەس. قوسىمشا ءبىلىم سالاسى (ۇيىرمەلەر) نىساندارىن كوپتەپ اشۋ بالالاردىڭ بوس ۋاقىتىن ءتيىمدى ءارى پايدالى ۇيىمداستىرۋعا مۇمكىندىك بەرەدى. اتالعان ورتالىقتار بالالاردىڭ شىعارماشىلىق, سىن تۇرعىسىنان ويلاۋ, سپورتتىق قابىلەتىن دامىتادى. بارلىق مەكتەپكە بىرتىندەپ جي رەسۋرستارعا تەڭ قولجەتىمدىلىكتى قامتاماسىز ەتۋگە ءتيىسپىز. ورتا ءبىلىم ۇيىمدارىنىڭ (مەكتەپ, ليتسەي, گيمنازيا, ت.ب.) بارلىق ءتۇرى جي رەسۋرسىنا قول جەتكىزۋى كەرەك. ياعني پرەزيدەنتتىڭ جولداۋدا ايتقان ۇسىنىستارى ناقتى قادامدارمەن ۇشتاسىپ وتىر جانە بۇل ءبىلىم بەرۋدە ساپا مەن تەڭدىكتى قامتاماسىز ەتۋ ءۇشىن اسا ماڭىزدى.
راشيت بەلگىباەۆ,
ى.التىنسارين اتىنداعى ۇلتتىق ءبىلىم اكادەمياسىنىڭ ۆيتسە-پرەزيدەنتى