پرەزيدەنت جولداۋدا جاساندى ينتەللەكت پەن يننوۆاتسيانى دامىتۋدى مەملەكەتتىڭ وركەندەۋىندەگى شەشۋشى فاكتورلاردىڭ ءبىرى رەتىندە اتاپ ءوتتى. بۇل كەزدەيسوق ايتىلعان ءسوز ەمەس. عىلىمى دامىعان, تەحنولوگياسى ورىستەگەن ەل عانا الەمدىك باسەكەدە العا وزادى. ال ەلىمىز ءۇشىن بۇل باعىت ەڭ نەگىزگى سەرپىلىس بولۋعا ءتيىس.
وسى ورايدا كوپتەن بەرى ويىمىزدا جۇرگەن, ەندى جۇزەگە اسىرۋعا بەل بۋعان ۇلتتىق «IQ Test Center» جوباسى ءدال پرەزيدەنت كۇتكەندەي يننوۆاتسيالىق باستاما دەپ نىق سەنىممەن ايتا الامىز. يننوۆاتسيا دەگەن – قوعامعا ناقتى پايدا اكەلەتىن, ومىرگە ەنگىزىلگەن جاڭالىق. ول ادامداردىڭ ءومىر ساپاسىن جاقسارتۋى كەرەك, ەكونوميكانى دامىتۋى قاجەت, عىلىمعا تىڭ سەرپىن بەرۋگە ءتيىس. وسى تۇرعىدان قاراساق, «IQ Test Center» – كادىمگى وقۋ ورتالىعى ەمەس, ۇلتتىق دەڭگەيدە ينتەللەكتۋالدىق الەۋەتتى دامىتۋدىڭ جاڭا جولىن ۇسىناتىن ەرەكشە باستاما.
«IQ Test Center» نەگە قاجەت؟ ەلىمىزدە بۇگىندە رەسمي ليتسەنزياسى بار IQ ورتالىعى جوق. قولدانىستاعى تەستىلەردىڭ كوبى – شەتەلدىك ۇلگىلەر. ولار مادەنيەتىمىزدى, ءتىلىمىزدى, ۇلتتىق دۇنيەتانىمىمىزدى ەسكەرە بەرمەيدى. بۇل – ۇلكەن ولقىلىق. ال بىزگە ۇلتتىق بولمىسقا بەيىمدەلگەن, زاماناۋي تەحنولوگيامەن تولىقتىرىلعان جۇيە كەرەك. «IQ Test Center» وسى ولقىلىقتىڭ ورنىن تولتىرادى: قازاق, ورىس, اعىلشىن تىلدەرىندە قولجەتىمدى بولادى; ءار ادامنىڭ قابىلەت دەڭگەيىنە قاراي بەيىمدەلگەن تەست ۇسىنادى; IQ-مەن قاتار ەموتسيونالدى ينتەللەكت (EQ), كرەاتيۆتىلىك پەن كاسىبي بەيىمدىلىكتى دە انىقتايدى; جاساندى ينتەللەكت پەن «Big Data» تالداۋ ارقىلى جەكە دامۋ كارتاسىن قۇراستىرادى.
بۇل – كەز كەلگەن مەكتەپ پەن ۋنيۆەرسيتەتكە, جۇمىس بەرۋشىگە, ەڭ باستىسى, ءاربىر اتا-انا مەن جاس ۇرپاققا اسا قاجەت قۇرال. جوبانىڭ تاعى ءبىر ارتىقشىلىعى – ونىڭ حالىقارالىق دەڭگەيگە شىعۋعا بەيىمدىلىگى. ءبىز الەمگە ايگىلى «Mensa» ۇيىمىمەن سەرىكتەستىك ورناتۋدى جوسپارلاپ وتىرمىز. بۇل ازاماتتارىمىزدىڭ ينتەللەكتىن حالىقارالىق ستاندارتتا باعالاۋعا مۇمكىندىك بەرەدى. سونىمەن قاتار «Astana Hub»-پەن ارىپتەستىك ارقىلى جوباعا قولداۋ الۋ كوزدەلگەن. بۇل ءوز كەزەگىندە ەلىمىزدىڭ يننوۆاتسيالىق ەكوجۇيەسىن نىعايتىپ, ستارتاپقا ينۆەستيتسيا تارتۋعا جول اشادى.
«IQ Test Center» – جەكە بيزنەس-جوبا ەمەس. ونىڭ الەۋمەتتىك اسەرى الدەقايدا كەڭ: دارىندى جاستاردى ەرتە انىقتاپ, ولاردىڭ جولىن اشۋ; ءاربىر مەكتەپ تۇلەگىنىڭ بەيىمىنە قاراي ناقتى كاسىبي باعدار ۇسىنۋ; ۋنيۆەرسيتەتتەرگە ستۋدەنتتەردىڭ قابىلەتتەرىن باعالاۋدا قولداۋ كورسەتۋ; HR-سەكتوردا مامانداردى ءادىل باعالاۋعا مۇمكىندىك بەرۋ; ەلىمىزدىڭ ۇلتتىق دەرەكتەر بازاسىن قۇرىپ, عىلىمعا ۇلەس قوسۋ.
ورتالىق جەكە تۇلعانىڭ عانا ەمەس, تۇتاس ۇلتتىڭ ينتەللەكتۋالدىق دەڭگەيىن كوتەرۋگە قىزمەت ەتپەك. قازىرگى كەزدە ءبىلىم بەرۋ مەن HR سالاسىندا وبەكتيۆتى باعالاۋ قۇرالدارىنا سۇرانىس ارتىپ كەلەدى. بۇل – تەك ەلىمىز ەمەس, ورتالىق ازيا دەڭگەيىندە دە ۇلكەن مۇمكىندىك. دەمەك ءبىزدىڭ جوبا ەل ىشىندە عانا ەمەس, ايماقتىق نارىقتا دا ءوز ورنىن تابا الادى.
جوبانىڭ يننوۆاتسيالىق سيپاتى ەرەكشە: قازاق تىلىندە بەيىمدەلگەن تۇڭعىش IQ تەست ازىرلەنەدى; ۇلتتىق مادەني ەرەكشەلىكتەرگە نەگىزدەلگەن سۇراقتار جاسالادى; جاساندى ينتەللەكت ءار ادامنىڭ دەڭگەيىنە قاراي بەيىمدەلگەن تەست قۇراستىرادى; «Big Data» تالداۋ ارقىلى ءاربىر قولدانۋشىعا جەكە دامۋ تراەكتورياسى ۇسىنىلادى. بۇل پرەزيدەنتتىڭ حالىققا جولداۋىندا ايتىلعان يننوۆاتسيا مەن جاساندى ينتەللەكتىنى دامىتۋ باعىتىنا تولىق سايكەس كەلەدى.
ءبىز ۇسىنىپ وتىرعان «IQ Test Center» جوباسى – پرەزيدەنتىمىز ايتقانداي يننوۆاتسيالىق باستاما. بۇل – ۇلتتىق مۇددەگە ساي, الەمدىك دەڭگەيدە مويىندالاتىن ينتەللەكتۋالدىق برەند. جوبا ءساتتى جۇزەگە اسسا, ماڭعىستاۋ ءوڭىرى ەلىمىزدەگى العاشقى رەسمي IQ ورتالىعى بار ايماققا اينالادى.
ارينە, ادىلدىك تەك اقىل-ويمەن ولشەنبەيتىنى بەلگىلى. ويتكەنى ءادىل بولۋ ءۇشىن IQ جوعارىلىعى جەتكىلىكسىز. وعان قوسا جۇرەك تازالىعى, ادامگەرشىلىك, ەڭبەكسۇيگىشتىك, ادالدىق قاجەت. ادىلدىك – اقىلدىڭ عانا ەمەس, اردىڭ دا ولشەمى. ءبىز اركىمنىڭ مۇمكىندىگىن دۇرىس باعالاپ, ادامدىق قاسيەتتى بيىك ۇستاساق, سول كەزدە عانا ادىلدىك ورنايدى. اقىلدىنى ارلى, ارلىنى ءادىل ەتكەن قوعام – ناعىز كەمەل قوعام. اقىلدىڭ نۇرى مەن اردىڭ شىراعى قاتار جانعاندا عانا قوعامدا شىن ادىلدىك سالتانات قۇرادى.
اقىن اباي ء«ۇش-اق نارسە ادامنىڭ قاسيەتى» دەپ ايقىنداعان «نۇرلى اقىل» – اقىلدىڭ ىزگىلىكپەن, ادىلەتپەن, ارمەن ۇيلەسكەن سيپاتىن, «ىستىق قايرات» – ەڭبەكسىز ويدىڭ السىزدىگىن, «جىلى جۇرەك» – مەيىرىمسىز اقىلدىڭ قاتالدىعىن, نۇرلى اقىل ىزگىلىكپەن نۇرلانباعان قايراتتىڭ قاۋىپتىلىگىن كورسەتەدى.
«IQ Test Center» يدەياسى دا وسى فيلوسوفيا نەگىزىندە قۇرىلعان. IQ ارقىلى اقىل-وي شاماسىن انىقتاۋ, EQ ارقىلى جىلى جۇرەكتى باعالاۋ, ال نۇرلى اقىلدى جاساندى ينتەللەكتىگە سۇيەنگەن كەشەندى باعالاۋ مەن ۇلتتىق قۇندىلىققا نەگىزدەلگەن تەست ارقىلى اشۋعا بولادى. ياعني ابايدىڭ ء«ۇش قاسيەتىن» قازىرگى عىلىم تىلىمەن ۇيلەستىرسەك, ول – IQ (اقىل), EQ (ەموتسيا), SQ (رۋحاني-ادامگەرشىلىك ولشەم).
ءبىز وسى جوبا ارقىلى ەلدىڭ ينتەللەكتۋالدىق الەۋەتىن دامىتۋعا, پرەزيدەنت ۇسىنعان باعىتتى جۇزەگە اسىرۋعا ۇلەس قوسقىمىز كەلەدى.
باقتىباي جايلاۋوۆ,
ش.ەسەنوۆ ۋنيۆەرسيتەتىنىڭ اعا وقىتۋشىسى
اقتاۋ