استانادا جاڭا قوعامدىق كولىك ءتۇرى – جەدەل اۆتوبۋستار پايدا بولادى. بۇل تۋرالى استانا قالاسىنىڭ ساۋلەت, قالا قۇرىلىسى جانە جەر قاتىناستارى باسقارماسى ءمالىم ەتتى, دەپ جازادى Egemen.kz.
باسقارمانىڭ حابارلاۋىنشا, قوعامدىق كولىك قىزمەتىن دامىتۋ ماقساتىندا استانادا 2035 جىلعا دەيىنگى كەشەندى باعدارلاما دايىندالدى. ول كەزەڭ-كەزەڭىمەن جۇزەگە اسىرىلادى. اتالمىش باعدارلاما مارشرۋتتىق جەلىنى وڭتايلاندىرۋ جانە حالىق ءۇشىن كولىك قىزمەتتەرىنىڭ قولجەتىمدىلىگىن ارتتىرۋ سەكىلدى نەگىزگى باعىتتاردى قامتيدى.
باس جوسپارعا سايكەس, 2035 جىلعا قاراي قوعامدىق كولىك سانى ەداۋىر كوبەيەدى. ال ونى قولداناتىن تۇرعىندار ۇلەسىن 41% -دان 71%-عا دەيىن ارتتىرۋ جوسپارلانىپ وتىر.
- بۇل ماقسات ءۇشىن ەلوردامىزدا قوعامدىق كولىكتىڭ جاڭا ءتۇرى – جەدەل اۆتوبۋستار پايدا بولادى. ولارعا ارنايى جولاقتار بولىنەدى. وسىعان قاراي ەلوردادا جاڭا ايالدامالار سالىنىپ, اۆتوبۋستار سانى ارتادى, ارنايى قوزعالىس جولاقتارى بولىنەدى, كولىك كوپ قاتىنايتىن ماگيسترالدارعا تۇسەتىن سالماق ازايادى. جاڭا اۆتوبۋستار كەڭ ءارى جايلى بولادى, بۇل كوبىرەك جولاۋشى تاسىمالداۋعا مۇمكىندىك بەرەدى, - دەلىنگەن حابارلامادا.
ايتا كەتەيىك, استانا قالاسىنىڭ 2035 جىلعا دەيىنگى باس جوسپارى كەلىسۋ ساتىسىندا, ول جىل سوڭىنا دەيىن اياقتالادى دەگەن بولجام بار.