پرەزيدەنت قاسىم-جومارت توقاەۆ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى جولداۋىندا تسيفرلىق وزگەرىستەر مەن جي-دى ەنگىزۋدىڭ ماڭىزىنا ايرىقشا باسىم ءمان بەردى. مەملەكەت باسشىسى «قازاقستاندى ءۇش جىل ىشىندە تولىققاندى تسيفرلىق ەلگە اينالدىرۋ» ستراتەگيالىق مىندەتىن قويىپ, بۇل ءۇردىستىڭ ەلدىڭ بولاشاعى ءۇشىن اسا ماڭىزدى ەكەنىن اتاپ ءوتتى.
الەمدە جالعان اقپاراتتىڭ تارالۋى باستى پروبلەمالاردىڭ بىرىنە اينالدى. اسىرەسە, اقپاراتتىڭ جىلدام اعىنى مەن جاڭالىقتاردىڭ تولاسسىز لەنتاسى ورىستەپ تۇرعاندا سول اقپارات پەن دەرەكتەردى تەكسەرمەي قابىلداۋ ءۇردىسى باسىم. وسىعان وراي, قازاقستان مەديا ساۋاتتىلىقتى ارتتىرۋعا باعىتتالعان بىرەگەي جوبا ىسكە قوسىلۋدا. ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىندە قر عىلىم جانە جوعارى ءبىلىم مينيسترلىگى گرانتتىق قارجىلاندىرۋ ناتيجەسىندە ازىرلەنگەن «RasInfo» – جاساندى ينتەللەكت ينتەگراتسيالانعان العاشقى مەديارەسۋرس جاسالدى.
اتالمىش رەسۋرس عىلىم جانە جوعارى ءبىلىم مينيسترلىگى عىلىم كوميتەتىنىڭ گرانتتىق قارجىلاندارۋ جوباسى بويىنشا ورىندالدى. بۇل باستامانىڭ ماقساتى – جاستارعا تسيفرلىق ساۋاتتىلىق پەن فاكتچەكينگ داعدىلارىن ۇيرەتۋ.
قازاقستاندا جاس زەرتتەۋشىلەر ءۇشىن جاساندى ينتەللەكت سالاسىندا زەرتتەيتىن كوپتەگەن باعىتتار بار. اسىرەسە, قازاق ءتىلىن جي-عا بەيىمدەۋ ۇلكەن ۇلەس قوسۋعا مۇمكىندىك بەرەتىن باستى باعىتتاردىڭ ءبىرى. بۇل تەك عىلىم ءۇشىن عانا ەمەس, ۇلتتىق مۇرانى ساقتاۋ ءۇشىن دە ماڭىزدى قادام بولماق.
وسى تۇرعىدان العاندا, قازۇۋ جۋرناليستيكا فاكۋلتەتىنىڭ عالىمدارى ازىرلەگەن «RasInfo» جوباسى پرەزيدەنت جولداۋىندا ايتىلعان باسىمدىقتارمەن تولىق سايكەس كەلەدى. بۇل ەلىمىزدەگى جاساندى ينتەللەكت ينتەگراتسيالانعان العاشقى ءموبيلدى مەديارەسۋرس. ونىڭ نەگىزگى ماقساتى ازاماتتارعا تسيفرلىق ساۋاتتىلىق نەگىزدەرى مەن فاكتچەكينگتى ۇيرەتۋ.
بۇل باستاما مەملەكەت باسشىسى قاسىم-جومارت توقاەۆتىڭ «جاستاردىڭ جي-دى ساۋاتتى قولدانۋى – ەلدىڭ تسيفرلىق ترانسفورماتسياسىنىڭ نەگىزگى شارتى» دەگەن پىكىرىنە تىكەلەي جاۋاپ بولىپ تابىلادى.
بۇگىنگى جولداۋدا: تسيفرلىق ترانسفورماتسيا تەك ەكونوميكانى مودەرنيزاتسيالاۋعا عانا ەمەس, سونىمەن بىرگە مەملەكەتتىك باسقارۋ جۇيەسىن جەتىلدىرۋگە دە باعىتتالعان. وسى ماقساتتا جاساندى ينتەللەكت جانە تسيفرلىق دامۋ مينيسترلىگىن قۇرۋ تۋرالى ۇسىنىس جاسالدى. بۇل قادام جي-دى ەل ەكونوميكاسىنىڭ بارلىق سالالارىنا جاپپاي ەنگىزۋگە مۇمكىندىك بەرەدى.
وسى وزگەرىستەر اياسىندا قازۇۋ عالىمدارىنىڭ تاعى ءبىر ءىرى باستاماسى – قازاق ءباسپاسوزىن تولىق تسيفرلاندىرۋ جوباسى ەرەكشە مانگە يە. 1889 جىلدان باستاپ جارىق كورگەن باسىلىمداردى جيناقتاپ, بىرىڭعاي تسيفرلىق مۇراعات جاساۋ – تەك تاريحي قۇندىلىقتى ساقتاۋ عانا ەمەس, سونىمەن قاتار جاساندى ينتەللەكت ارقىلى عىلىمي زەرتتەۋلەرگە جاڭا سەرپىن بەرۋ. بۇل جوبا قازاقستانداعى تسيفرلىق مادەني مۇرانى قالىپتاستىرۋعا ۇلكەن ۇلەس قوسادى.
جاساندى ينتەللەكت قارقىندى دامىپ, ادامداردىڭ دۇنيەتانىمىنا, اسىرەسە جاستاردىڭ سانا-سەزىمىنە اسەر ەتۋدە. بۇل پروتسەستى توقتاتۋ مۇمكىن ەمەس, سوندىقتان وعان دايىن بولۋ قاجەت. ەل پرەزيدەنتىنىڭ سوزىنشە, «باستى مىندەت – كىدىرىسسىز, باتىل ارەكەت ەتۋ», ويتكەنى كەشىگۋدىڭ سالدارى وتە اۋىر بولۋى مۇمكىن.
ەلىمىزدىڭ قازىرگى مىندەتى – جاساندى ينتەللەكتىڭ مۇمكىندىكتەرىن پايدالانىپ, ەلدى قاۋىپسىز ءارى دامىعان قوعامعا اينالدىرۋ.
گۇلميرا سۇلتانباەۆا,
ءال-فارابي اتىنداعى قازۇۋ
پروفەسسور-زەرتتەۋشىسى