قورعانىس مينيسترلىگىندە قازاقستان رەسپۋبليكاسى قورعانىس ءمينيسترىنىڭ ءبىرىنشى ورىنباسارى – قارۋلى كۇشتەرى باس شتابىنىڭ باستىعى گەنەرال-لەيتەنانت سۇلتان قامالەتدينوۆتىڭ توراعالىعىمەن ۆەدومستۆوارالىق كەڭەس ءوتتى, دەپ حابارلايدى Egemen.kz.
جيىندا كوكتەمگى كەزەڭدە قارۋلى كۇشتەردى, باسقا دا اسكەرلەر مەن اسكەري قۇرالىمداردى جاساقتاۋ قورىتىندىلارى شىعارىلىپ, الداعى كۇزگى اسكەرگە شاقىرۋ ناۋقانىنا قويىلاتىن مىندەتتەر بەلگىلەندى.
كەڭەسكە قارۋلى كۇشتەر تۇرلەرىنىڭ باس قولباسشىلارى, ۆەدومستۆونىڭ دەپارتامەنتتەرى مەن باس باسقارمالارىنىڭ باسشىلارى, قازاقستان رەسپۋبليكاسى ۇلتتىق قورعانىس ۋنيۆەرسيتەتى, باس اسكەري پروكۋراتۋرا, دەنساۋلىق ساقتاۋ, ىشكى ىستەر, توتەنشە جاعدايلار مينيسترلىكتەرى, مەملەكەتتىك كۇزەت قىزمەتى, ۇقك شەكارا قىزمەتى مەن ۇلتتىق ۇلاننىڭ وكىلدەرى قاتىستى. سونىمەن قاتار وڭىرلىك شاقىرۋ جانە مەديتسينالىق كوميسسيالاردىڭ توراعالارى مەن وزگە دە لاۋازىمدى تۇلعالار بەينەكونفەرەنتسيا بايلانىسى ارقىلى قوسىلدى.
باستى بايانداما جاساعان قر قارۋلى كۇشتەرى باس شتابى ۇيىمداستىرۋ-جۇمىلدىرۋ جۇمىستارى دەپارتامەنتىنىڭ باستىعى گەنەرال-مايور الماس يسابەكوۆ ۇكىمەتتىڭ اسكەرگە شاقىرۋدى ۇيىمداستىرۋ جونىندەگى تاپسىرمالارىن ورىنداۋدىڭ ماڭىزدىلىعىن ەسكە سالدى.
اسكەرگە شاقىرۋ كوميسسيالارىنىڭ توراعالارى – الماتى قالاسى اكىمى اپپاراتىنىڭ باسشىسى ەرلان يسابەكوۆ پەن قوستاناي وبلىسى اكىمىنىڭ ورىنباسارى باقىتجان نارىمبەتوۆ تاپسىرمالاردىڭ ورىندالۋى جونىندە ەسەپ بەردى.
كەڭەستى قورىتىندىلاعان قورعانىس ءمينيسترىنىڭ ءبىرىنشى ورىنباسارى گەنەرال-لەيتەنانت سۇلتان قامالەتدينوۆ مەديتسينالىق كوميسسيالاردى قاجەتتى دارىگەر-ماماندارمەن تولىقتىرۋ, شاقىرۋ پۋنكتتەرىن مەديتسينالىق قۇرال-جابدىقتارمەن قامتاماسىز ەتۋ ماسەلەلەرىنىڭ ءالى دە وزەكتى ەكەنىن اتاپ ءوتتى. الىس ايماقتاردا شاقىرۋ پۋنكتتەرىنىڭ دەنساۋلىق ساقتاۋ مينيسترلىگىنىڭ اقپاراتتىق جۇيەلەرىنە قوسىلۋ ماسەلەسى تولىق شەشىلمەگەن.
وسىعان بايلانىستى گەنەرال-لەيتەنانت سۇلتان قامالەتدينوۆ كۇزگى شاقىرۋ ناۋقانىن ۇيىمداستىرۋ جانە وتكىزۋ بويىنشا نەگىزگى مىندەتتەردى اتاپ ءوتتى. اسكەرگە شاقىرىلۋشىلاردىڭ مەديتسينالىق تەكسەرۋ ساپاسىن ارتتىرۋ, كوميسسيالاردى تار بەيىندى بىلىكتى ماماندارمەن قامتاماسىز ەتۋ قاجەتتىلىگىنە ەرەكشە نازار اۋدارىلدى.
قۇقىقتىق ءتارتىپتى قامتاماسىز ەتۋ مەن شاقىرۋعا قاتىستى زاڭنامالىق راسىمدەردىڭ ورىندالۋىنا ىشكى ىستەر ورگاندارى مەن اسكەري پوليتسيا بولىمشەلەرى جاۋاپتى.
سونداي-اق قورعانىس مينيسترلىگىنىڭ تاربيە جانە يدەولوگيالىق جۇمىس دەپارتامەنتى مەن ورتالىق مەملەكەتتىك, جەرگىلىكتى اتقارۋشى ورگانداردىڭ اسكەري-پاتريوتتىق تاربيەنى ۇيىمداستىرۋدا تىعىز ىقپالداستىقتا جۇمىس ىستەۋىنىڭ ماڭىزدىلىعى اتاپ ءوتىلدى.
جەرگىلىكتى اتقارۋشى ورگانداردىڭ اسكەرگە شاقىرۋ كوميسسيالارى جۇمىسىنىڭ ساپاسىنا باعا كەلەسى ۆەدومستۆوارالىق كەڭەستە بەرىلەتىنى ايتىلدى.