وتكەن 11 تامىزدان باستاپ ەلەكتروندىق تسيفرلىق قولتاڭبا (ەتسق) كىلتتەرىن الۋ ءتارتىبى وزگەردى. بۇعان دەيىن جۇرتشىلىق ەتسق كىلتتەرىن ونلاين نە بولماسا حالىققا قىزمەت كورسەتۋ ورتالىعىنا (حقكو) بارىپ الاتىن. ەندى بۇل قىزمەت تولىقتاي ونلاين فورماتقا كوشتى. حقكو-عا جۇگىنۋ تەك بيومەتريالىق سايكەستەندىرۋ جۇيەسى تۇلعانى راستاي الماعان جاعدايدا عانا مۇمكىن بولادى.
ەتسق كىلتتەرىن الۋعا پايدالانۋشى eGov.kz» پورتالىندا نەمەسە ۇلتتىق كۋالاندىرۋشى ورتالىقتىڭ «pki.gov.kz» سايتىندا ءوتىنىم بەرىپ, بەت-الپەتتى تانۋ جۇيەسى ارقىلى بيومەتريالىق سايكەستەندىرۋدەن ءوتۋى قاجەت. بيومەتريا ءساتتى وتكەندە ەتسق كىلتتەرىن ونلاين الاسىز. ال ەگەر جۇيە سايكەستەندىرۋدى ورىنداي الماسا – مىسالى, بازادا فوتوسۋرەت بولماعان جاعدايدا نە تەحنيكالىق اقاۋ تۋىنداسا – پايدالانۋشىنىڭ قايتالاۋ مۇمكىندىگى بار. قىسقاسى, بيومەتريالىق تەكسەرىستەن بەس رەت وتە الاسىز. وسىدان كەيىن عانا حقكو ارقىلى ەتسق الۋعا ءوتىنىم بەرۋگە جانە وپەراتور ارقىلى جەكە باسىن راستاۋعا جول اشىلادى. ەڭ ماڭىزدىسى – بيومەتريادان وتپەي حقكو-عا ءوتىنىم بەرۋ مۇمكىن ەمەس. وپەراتور جسن بويىنشا اقپاراتتى تەكسەرەدى. سونداي-اق ينتەرنەتكە نەمەسە كومپيۋتەرگە قولجەتىمدىلىگى جوق ازاماتتارعا حقكو-داعى ءوز-وزىنە قىزمەت كورسەتۋ ايماقتارىندا بيومەتريادان ءوتۋ مۇمكىندىگى قاراستىرىلعان. ەگەر پايدالانۋشى سول جەردە سايكەستەندىرۋدەن ءساتتى وتسە, كىلتتى ونلاين الادى.
ازات ەسەن