5 قىركۇيەك – قازاق حالقىنىڭ تاعدىرى مەن ءتىلى ءۇشىن كۇرەسكەن الاش ارىسى, ۇلت ۇستازى, قازاق عىلىمى مەن مادەنيەتىنىڭ شامشىراعى احمەت بايتۇرسىن ۇلىنىڭ تۋعان كۇنى. بيىل كورنەكتى اعارتۋشى, عالىم, قوعام قايراتكەرىنىڭ تۋعانىنا 153 جىل تولىپ وتىر. سونىمەن بىرگە بۇل كۇن ەلىمىزدە قازاقستان حالقى تىلدەرى كۇنى رەتىندە اتاپ وتىلەدى.
وسىعان وراي, استاناداعى قالامگەرلەر اللەياسىندا ورنالاسقان «الاش قايراتكەرلەرى» ەسكەرتكىشىنە گۇل شوقتارىن قويۋ ءراسىمى ءوتتى, دەپ جازادى Egemen.kz.
ءىس-شاراعا جازۋشى, فيلولوگيا عىلىمدارىنىڭ دوكتورى, الاشتانۋشى تۇرسىن جۇرتباي, استانا قالاسىنىڭ تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ, قوعامدىق كەڭەستىڭ توراعاسى زۇلفۇحار عايىپوۆ, قر جازۋشىلار وداعىنىڭ استانا قالالىق فيليالىنىڭ ديرەكتورى باۋىرجان باباجان ۇلى باستاعان زيالى قاۋىم وكىلدەرى, مەملەكەت جانە قوعام قايراتكەرلەرى, قالا تۇرعىندارى مەن قوناقتارى, جاستار قاتىستى.
«زيالى ادام اتاۋلى ەڭ الدىمەن ءوز تەگىنە, ءوز حالقىنا قارىزدار. احمەت بايتۇرسىن ۇلى دا ءومىر بويى قازاق ۇلتى ءۇشىن قىزمەت ەتىپ, «مەن حالقىمنىڭ الدىندا قارىزدارمىن» دەپ وتكەن تۇلعا. الايدا ۇلتتى العا سۇيرەيتىن, دامىتاتىن – وسىنداي ۇلى پەرزەنتتەر. مەنىڭ ويىمشا, كەرىسىنشە, قازاق حالقى مەن قازاق ءتىلى احاڭ الدىندا قارىزدار. ويتكەنى 1911 جىلعا دەيىنگى قازاقتىڭ سويلەۋ, جازۋ, ويلاۋ مانەرى مەن ودان كەيىنگى كەزەڭدى سالىستىرساق, اراسى جەر مەن كوكتەي. احاڭ قازاقتىڭ ويلاۋ جۇيەسىن ءبىر ىزگە ءتۇسىرىپ, ءسوز مادەنيەتىن قالىپتاستىرىپ, ۇلتتىق سانانى جاڭا دەڭگەيگە كوتەردى. ول قازاقتىڭ ءتىلىن, جازۋىن عانا ەمەس, تۇتاس دۇنيەتانىمىن جۇيەلەپ, حالىقتىڭ رۋحاني يمانىن ۇيىتقان ۇلى ۇستاز بولدى», دەدى الاشتانۋشى تۇرسىن جۇرتباي.
احمەت بايتۇرسىن ۇلى – قازاق ءتىل ءبىلىمى مەن ادەبيەتتانۋ عىلىمىنىڭ نەگىزىن سالۋشى, ۇلتتىق سانانى وياتقان اعارتۋشى, الاش قوزعالىسىنىڭ جەتەكشىسى. ونىڭ مۇراسى – ەلدىك پەن بىرلىكتىڭ, رۋحاني تاۋەلسىزدىكتىڭ ماڭگىلىك تەمىرقازىعى.