1 قىركۇيەك – ءبىلىم كۇنى قارساڭىندا ماڭعىستاۋ وبلىسىندا بەس جاڭا مەكتەپ پايدالانۋعا بەرىلدى. ونىڭ تورتەۋى مەملەكەت باسشىسى قاسىم-جومارت توقاەۆتىڭ باستاماسىمەن جۇزەگە اسىرىلعان «كەلەشەك مەكتەپ» ۇلتتىق جوباسى اياسىندا سالىنسا, بىرەۋى دەمەۋشىلەردىڭ قولداۋىمەن بوي كوتەردى, دەپ حابارلايدى Egemen.kz.
جاڭا ءبىلىم وشاقتارىنىڭ ءبىرى – بەينەۋ اۋدانى سام اۋىلىنداعى 300 ورىندىق مەكتەپ. اشىلۋ راسىمىنە وبلىس اكىمى نۇرداۋلەت قيلىباي, ارداگەرلەر, ۇستازدار مەن اۋىل تۇرعىندارى قاتىستى. سالتاناتتى جيىندا ءوڭىر باسشىسى جينالعانداردى ءبىلىم كۇنىمەن قۇتتىقتاپ, جاڭا مەكتەپتەردىڭ ءوڭىر ءۇشىن ماڭىزدىلىعىنا توقتالدى.
«مەملەكەت باسشىسى ءبىلىم سالاسىن دامىتۋعا ارقاشان ايرىقشا كوڭىل بولەدى. بۇگىن پايدالانۋعا بەرىلىپ وتىرعان جاڭا مەكتەپتەر – وسى قامقورلىقتىڭ ناقتى ناتيجەسى. پرەزيدەنتتىڭ تاپسىرماسىمەن سالىنعان زاماناۋي ءبىلىم وردالارى شالعايدا جاتقان اۋىلدارعا دا جەتىپ, بالالاردىڭ ساپالى ءبىلىم الۋىنا مۇمكىندىك بەرىپ وتىر. بۇل ءبىلىم ورداسىندا شاكىرتتەردىڭ جان-جاقتى دامۋىنا, مۇعالىمدەردىڭ شىعارماشىلىقپەن ەڭبەك ەتۋىنە بارلىق جاعداي جاسالعان. وسى شاڭىراقتان تۇلەپ ۇشاتىن تۇلەكتەر ەلىمىزدىڭ دامۋىنا ۇلەس قوساتىن ءبىلىمدى دە وتانشىل ازامات بولادى دەپ سەنەمىن. بارشاڭىزدى ءبىلىم كۇنىمەن قۇتتىقتايمىن, جاڭا وقۋ جىلى ءساتتى ءارى تابىستى بولسىن», دەدى نۇرداۋلەت قيلىباي.
سام اۋىلىنداعى جاڭا مەكتەپتە قازىرگى تاڭدا 151 وقۋشى ءبىلىم الادى, 40 پەداگوگ ەڭبەك ەتەدى. مەكتەپ 27 وقۋ كابينەتىمەن, 18 قوسىمشا بولمەمەن, سونداي-اق حيميا, بيولوگيا, ينفورماتيكا, روبوتوتەحنيكا, STEM, ونەر جانە مۋزىكا سىنىپتارىمەن قامتىلعان. بۇدان بولەك, لوگوپەد پەن پسيحولوگ كابينەتتەرى, سپورت جانە اكت زالى, اسحانا, كىتاپحانا, شەبەرحانا, مەديتسينالىق بولمە جانە مۇراجاي بار.
سونىمەن قاتار جاڭا وقۋ جىلى قارساڭىندا اقتاۋ قالاسىنىڭ «راۋان» شاعىن اۋدانىندا – 300 ورىندىق, مۇنايلى اۋدانىنىڭ باتىر اۋىلىنداعى «سامال» شاعىن اۋدانىندا – 1200 ورىندىق, بەينەۋ اۋىلىندا – 600 ورىندىق جانە تۇپقاراعان اۋدانىنىڭ سايىن-شاپاعاتوۆ اۋىلىندا دەمەۋشىلەردىڭ قولداۋىمەن 1200 ورىندىق مەكتەپ اشىلدى. بۇل نىسانداردىڭ ىسكە قوسىلۋى مۇنايلى مەن تۇپقاراعان اۋداندارىندا ءۇش اۋىسىمدى وقىتۋدى تولىق جويىپ, بەينەۋ اۋدانىنداعى اپاتتى مەكتەپتىڭ ماسەلەسىن شەشتى.
جاڭا وقۋ جىلىندا ماڭعىستاۋ وبلىسىندا 157 مەكتەپ جۇمىسىن باستادى. وڭىردە 213 مىڭنان استام وقۋشى ءبىلىم الۋدا. ولاردىڭ ىشىندە 19 مىڭ بالا العاش رەت مەكتەپ تابالدىرىعىن اتتادى. سونىمەن بىرگە وقۋ جىلىنىڭ العاشقى توقسانىندا تاعى بەس جاڭا مەكتەپ پايدالانۋعا بەرىلەدى.