ءبىلىم كۇنىنە وراي الماتىدا ەلىمىزدە العاشقى تەگىن وقىتاتىن «جابىق ارقان الاڭى» مەن «ينكليۋزيۆتى شىعارماشىلىق ورتالىعى» اشىلدى.
بۇل يگى باستاما – ەرەكشە قاجەتتىلىكتەرى بار بالالاردىڭ ەركىن ويناپ, قوعامعا بەيىمدەلىپ, شىعارماشىلىق الەۋەتىن دامىتۋىنا باعىتتالعان.
«جابىق ارقان الاڭى» – زاماناۋي تالاپتارعا ساي جاسالعان, ەرەكشە بالالاردىڭ قوزعالىس پەن ويىن ارقىلى ەركىندىگىن سەزىنىپ, سەنىمىن نىعايتۋعا ارنالعان بىرەگەي كەڭىستىك. مۇندا بالالار تەگىن ءبىلىم الىپ, ولار قوعاممەن ارالاسۋدى ۇيرەنىپ, جاڭا مۇمكىندىكتەرىن اشادى. ال «ينكليۋزيۆتى شىعارماشىلىق ورتالىعىندا» بالالار ۆوكال, بي, سۋرەت, قولونەر ۇيىرمەلەرىنە جانە ءار جاستاعى ستۋديالارعا قاتىسىپ, ءوز دارىنىن شىڭدايدى. سونداي-اق ەرەكشە ءبىلىم بەرۋ قاجەتتىلىكتەرى بار بالالار كاسىبي پەداگوگتەردەن ءدارىس الادى.
ايتا كەتەيىك, «بالالار ينكليۋزيۆتى اكادەمياسى» كەيىنگى ءۇش جىل بويى الماتىدا تەگىن ينكليۋزيۆتى ءبىلىم بەرۋ كەڭىستىگىن دامىتىپ كەلەدى. بۇگىندە ونىڭ ەل كولەمىندە 15 فيليالى جۇمىس ىستەيدى. ولاردىڭ بەسەۋى رەسمي مەكتەپ رەتىندە ليتسەنزيا الۋعا قۇجاتىن تاپسىرعان.
ۇيىمنىڭ نەگىزىن قالاۋشى – «بالالار ينكليۋزيۆتى اكادەمياسى» قوعامدىق بىرلەستىگى ورتالىعىنىڭ باسشىسى, ۇزدىك پەداگوگ نۇرىم نۇرعاليەۆ. ونىڭ باستاماسىمەن مەكتەپتەردە ارنايى كابينەتتەر اشىلىپ, ەرەكشە بالالارعا تەگىن شىعارماشىلىق كۋرستار ۇيىمداستىرىلدى. بۇگىندە استانا, الماتى, قوستاناي, رۋدنىي, قاراعاندى قالالارىندا 500-دەن استام بالا تۇراقتى تۇردە ءبىلىم الادى. ماڭعىستاۋ وڭىرىندە دە جۇيەلى جۇمىس جولعا قويىلعان.
ورتالىقتىڭ اشىلۋ راسىمىندە نۇرىم نۇرعاليەۆ اتا-انالار مەن بالالاردى ءبىلىم كۇنىمەن قۇتتىقتاپ, ىزگى لەبىزىن ءبىلدىردى.
ء«بىزدىڭ ماقساتىمىز – ەرەكشە ءبىلىمدى قاجەت ەتەتىن بالالارعا تەڭ مۇمكىندىك بەرۋ, ولاردىڭ شىعارماشىلىق قابىلەتىن شىڭداۋعا جاعداي جاساۋ, قوعامدا ينكليۋزيا مادەنيەتىن كەڭىنەن ناسيحاتتاۋ», دەدى ول.
سونىمەن قاتار مەرەكەلىك شارادا ەسترادا ءانشىسى كەنجەبەك نۇردولداي اسەم انىمەن ەرەكشە بالالارعا شابىت سىيلادى.
قازىرگى تاڭدا «بالالار ينكليۋزيۆتى اكادەمياسىندا» 200-دەن استام بالا وقيدى. جىل سايىن بۇل كورسەتكىش ارتىپ كەلەدى. جوبانىڭ ماڭىزدى تۇسى – بالالاردى «ۇيدە وقىتۋدان» تىس, قوعامعا بەيىمدەۋ, قۇرداستارىمەن بىرگە دامۋىنا مۇمكىندىك بەرۋ. قىسقاسى, ەرەكشە بالالارعا ارنالعان بۇل باستاما – ەلىمىزدەگى ءبىلىم مەن مادەنيەت سالاسىندا ينكليۋزيانى دامىتۋداعى ماڭىزدى قادام.
ازات ەسەن