تەاتر ونەرىنىڭ شىعارماشىلىق تىنىسىن كەڭەيتىپ, جاڭا قويىلىمداردىڭ كوركەمدىك دەڭگەيىن سارالاۋعا باعىتتالعان ءداستۇرلى «التىن ساقا-2026» VIII تەاترىشىلىك جاڭا قويىلىمدار فەستيۆالى بيىل ايرىقشا مازمۇندا ءوتتى. بۇل جولعى ونەر دوداسى عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ 80 جىلدىق مەرەيتويىمەن تۇسپا-تۇس كەلىپ, ۇجىم تاريحىنداعى ماڭىزدى مادەني وقيعالاردىڭ بىرىنە اينالدى.
عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا 2016 جىلدان بەرى تۇراقتى تۇردە وتكىزىلىپ كەلە جاتقان فەستيۆال العاشىندا بالالارعا ارنالعان قويىلىمدار بايقاۋى رەتىندە باستالىپ, ۋاقىت وتە كەلە اۋقىمى كەڭەيىپ, بۇگىندە تەاتر رەپەرتۋارىن تولىقتىرعان جاڭا سپەكتاكلدەردىڭ كاسىبي دەڭگەيىن باعالايتىن ءىرى شىعارماشىلىق الاڭعا اينالدى. اكتەرلەر مەن رەجيسسەرلەر اراسىنداعى كوركەمدىك باسەكەنى كۇشەيتتى. بيىلعى فەستيۆال وسى ءۇردىستى جالعاستىرىپ قانا قويماي, ونى مازمۇندىق تۇرعىدان تەرەڭدەتە ءتۇستى. 2025–2026 جىلدارى تەاتر رەپەرتۋارىنا ەنگەن جەتى جاڭا قويىلىم ءبىر ساحنادا توعىسىپ, كوركەمدىك ساپا مەن شىعارماشىلىق ىزدەنىستىڭ وزىندىك ولشەمىنە اينالدى.
فەستيۆال شىمىلدىعى ە.شۆارتستىڭ «كۇلبيكەش» ەرتەگىسىمەن ءتۇرىلدى. بۇل قويىلىم عانا ەمەس, تەاتردىڭ نەگىزگى مۇراتى جاس كورەرمەندى تاربيەلەۋ مەن ەستەتيكالىق تالعام قالىپتاستىرۋ يدەياسىن ايقىن كورسەتكەن رامىزدىك باستاۋ بولدى. سپەكتاكل الدىنداعى دۋماندى ءىس-شارا, تسيرك ارتىستەرىنىڭ ونەرى مەن ەرتەگى كەيىپكەرلەرىنىڭ بالالارمەن جۇزدەسۋى تەاتر كەڭىستىگىن ناعىز مەرەكەلىك الاڭعا اينالدىردى.
فەستيۆال باعدارلاماسى ودان ءارى قاراي دا الۋان باعىتتاعى قويىلىمدارمەن جالعاستى. اتاپ ايتساق, «قورعانسىز» سپەكتاكلى ۇلتتىق دراماتۋرگيانىڭ تەرەڭ پسيحولوگيالىق ءيىرىمىن اشسا, «پەرزەنتحانا» بۇگىنگى قوعامداعى ادام تاعدىرى مەن مورالدىق تاڭداۋلاردى ساحنا تىلىمەن جەتكىزدى. ال «گاملەت. سوڭعى كۇندەر» قويىلىمى كلاسسيكالىق ءماتىننىڭ زاماناۋي ينتەرپرەتاتسياسى ارقىلى كورەرمەندى جاڭا وي كەڭىستىگىنە جەتەلەدى. كلاسسيكا مەن قازىرگى زامان ۇندەستىگى «شيە باعى» مەن «رەۆيزور» قويىلىمدارىندا ايقىن كورىندى. ا.چەحوۆ دراماسىنداعى ۋاقىت پەن تاعدىر فيلوسوفياسى نازىك بەرىلسە, ن.گوگول كومەدياسى قوعامداعى كەلەڭسىز قۇبىلىستاردى وتكىر ساتيرا ارقىلى اشكەرەلەدى. ء«بارى جاقسى...» سپەكتاكلى فەستيۆالدىڭ فينالدىق اككوردىنا اينالىپ, قاراپايىم ءومىردىڭ استارىنداعى كۇردەلى ءماندى كورەرمەنگە سەزىندىرە ءبىلدى.
قويىلىمدارعا انار ەركەباي, تەمۋر راشيدوۆ, تيگران مارتيروسيان سىندى حالىقارالىق دەڭگەيدەگى ساراپشىلار كاسىبي باعا بەردى. ولاردىڭ ءار سپەكتاكلدەن كەيىنگى تالداۋلارى تەاتر ۇجىمىنا باعىت بەرەتىن ماڭىزدى باعدار بولدى. ونەر دۋمانىنىڭ مازمۇنىن بايىتقان تاعى ءبىر وقيعا – كورەرمەنمەن تىكەلەي بايلانىس ورناتۋعا باعىتتالعان اشىق الاڭدار. تەاتر فويەسىندە وتكەن فان-كەزدەسۋلەر مەن سپەكتاكلدەن كەيىنگى تالقىلاۋلار ونەردى قابىلداۋدىڭ جاڭا مادەنيەتىن قالىپتاستىردى. كورەرمەن ەندى باقىلاۋشى عانا ەمەس, شىعارماشىلىق ۇدەرىستىڭ بەلسەندى قاتىسۋشىسىنا اينالدى.
فەستيۆالدىڭ جانە ءبىر ەرەكشە جوباسى – «تەاتر ءتۇنى». بۇل كەشتە كورەرمەن ساحنا سىرتىنداعى تىرشىلىكتى كورۋگە مۇمكىندىك الىپ, سپەكتاكلدىڭ قالاي دۇنيەگە كەلەتىنىن, اكتەر مەن رەجيسسەردىڭ ىزدەنىسىن كوزبەن كوردى. وسى ارقىلى تەاتردىڭ ء«تىرى اعزا» ەكەنى تاعى ءبىر مارتە دالەلدەندى.
ال فەستيۆال اياسىندا وتكەن «80 جىلدىق تاريح پەن تاعىلىمداعى ساحنالىق ءداستۇر, اكتەرلىك مەكتەپ جانە كوركەمدىك مۇرا» اتتى دوڭگەلەك ۇستەل تەاتردىڭ وتكەنى مەن بۇگىنىن ساباقتاستىرعان تاعىلىمدى جيىن بولدى. وندا ءبايدىلدا قالتاەۆ, ماكىل قۇلانباەۆ, التىنبەك كەنجەكوۆ سىندى ساحنا ساڭلاقتارىنىڭ مۇراسى ەسكە الىنىپ, ارتىستەردىڭ ۇلتتىق تەاتر ونەرىندەگى ورنى ايرىقشا اتاپ ءوتىلدى. ايتۋلى تۇلعالار اتىنداعى ارنايى جۇلدەلەر تاعايىندالدى. اتاپ ايتساق, التىنبەك كەنجەكوۆ اتىنداعى ارنايى جۇلدە «گاملەت. سوڭعى كۇندەر» سپەكتاكلىندەگى كلاۆدي ءرولى ءۇشىن ەدىل رامازانوۆقا, ماكىل قۇلانباەۆ اتىنداعى ارنايى سىيلىق «شيە باعى» قويىلىمىنداعى لەونيد گاەۆ بەينەسى ءۇشىن جومارت زەينابىلگە, ال ءبايدىلدا قالتاەۆ اتىنداعى جۇلدە «رەۆيزور» سپەكتاكلىندەگى دۋانباسى ءرولى ءۇشىن ەرلان كارىباەۆقا تابىستالدى.
سونىمەن قاتار قورىتىندى كەشتە فەستيۆال جەڭىمپازدارى انىقتالىپ, ۇزدىك اكتەرلىك جۇمىستار مەن قويىلىمدار ارنايى ماراپاتتار يەلەندى. وسىلايشا, «التىن ساقا-2026» فەستيۆالى قويىلىمدار بايگەسى عانا ەمەس, تەاتردىڭ بۇگىنگى تىنىسى, كوركەمدىك دەڭگەيى مەن بولاشاق باعىت-باعدارىن ايقىندايتىن ماڭىزدى مادەني الاڭ ەكەنىن تاعى ءبىر مارتە دالەلدەدى.