ى. التىنسارين اتىنداعى ۇلتتىق ءبىلىم اكادەمياسى جاڭا 2025–2026 وقۋ جىلىنىڭ باستالۋىنا وراي ءداستۇرلى ادىستەمەلىك-نۇسقاۋ حاتتى پەداگوگتەرگە, ادىسكەرلەرگە جانە مەكتەپ باسشىلارىنا ۇسىندى, دەپ جازادى Egemen.kz.
اكادەميا پرەزيدەنتى ءنازيپا ايۋباەۆانىڭ مالىمدەۋىنشە, بيىلعى قۇجاتتىڭ باستى ماقساتى – ءبىلىم ساپاسىن كوتەرۋمەن قاتار, تاربيە مەن قۇندىلىقتاردى ساباقتاستىرۋ, تسيفرلىق ءداۋىر تالاپتارىنا ساي داعدىلاردى دامىتۋ جانە ءار بالانىڭ ەرەكشەلىگىن ەسكەرە وتىرىپ قولداۋ كورسەتۋ.
«ادال ازامات» باعدارلاماسى بارلىق ءپان مازمۇنىنا كىرىكتىرىلىپ, وقۋشىلاردىڭ بويىنا ادالدىق, جاۋاپكەرشىلىك, ەڭبەكسۇيگىشتىك سياقتى قاسيەتتەردى دارىتۋعا باعىتتالادى.
سونىمەن قاتار, ماڭىزدى باعىتتاردىڭ ءبىرى – جاساندى ينتەللەكتىنى ساباق بارىسىندا قولدانۋ. بۇل مۇعالىمدەرگە وقۋشىلاردىڭ جەكە دەڭگەيىنە ساي تاپسىرما ۇسىنۋعا, وقۋ ماتەريالىن تۇرلەندىرىپ تۇسىندىرۋگە, وقۋ تراەكتورياسىن قۇرۋعا مۇمكىندىك بەرەدى.
بارلىق پاندەردە فۋنكتسيونالدىق ساۋاتتىلىقتى ارتتىرۋعا ەرەكشە نازار اۋدارىلۋدا. مىسالى: • ماتەماتيكادا – لوگيكالىق ويلاۋ, • جاراتىلىستانۋدا – تاجىريبەلىك زەرتتەۋ, • تىلدەردە – مەدياساۋاتتىلىق, • تاريحتا – سىني ويلاۋ داعدىلارى كۇشەيتىلەدى.
بۇل باعىتتار وقۋشىلاردى ومىردە ناقتى قولدانا الاتىن بىلىممەن قامتاماسىز ەتۋگە ارنالعان.
زەرتتەۋ مەن جوبالىق جۇمىستار وقۋشىلاردىڭ شىعارماشىلىعىن, دەربەستىگىن جانە توپپەن جۇمىس ىستەۋ قابىلەتتەرىن دامىتۋعا ىقپال ەتەدى.
جاڭا وقۋ جىلىنىڭ نەگىزگى ەرەكشەلىكتەرى: • 1-سىنىپتاردا وقۋ جىلى – 33 اپتا, 2–11(12)-سىنىپتاردا – 34 اپتا; • «كەلەشەك مەكتەبى» جانە «اۋىل مەكتەبى – ساپا الاڭى» جوبالارى جالعاسادى; • «جۇمىسشى ماماندىقتار جىلى» اياسىندا بەيىندىك سىنىپتار اشىلادى; • ءار مەكتەپتە پروفوريەنتاتور-پەداگوگ جۇمىس ىستەپ, بالالارعا ەرتە كاسىپتىك باعدار بەرۋگە كومەكتەسەدى; • پەداگوگتەردى اتتەستاتتاۋدىڭ جاڭا ەرەجەلەرى قولدانىسقا ەنگىزىلەدى.
اكادەميا پرەزيدەنتى ءنازيپا ايۋباەۆا پەداگوگتەردى جاڭا وقۋ جىلىنداعى ماڭىزدى باعىتتارمەن تامىز كونفەرەنتسياسىندا جانە وڭىرلىك پەدكەڭەستەردە تانىستىرعانىن اتاپ ءوتتى.
«ادىستەمەلىك-نۇسقاۋ حات – ۇستازدارعا جول كورسەتەتىن سەنىمدى قۇرال بولادى دەپ سەنەمىز. جاڭا وقۋ جىلى ءبىلىم بەرۋ ساپاسىن ارتتىرىپ, جاس ۇرپاقتىڭ بولاشاعىنا سەنىمدى باعدار بەرۋگە جول اشادى», – دەدى ءنازيپا ايۋباەۆا.