ەل كونستيتۋتسياسىنىڭ 30 جىلدىعى قارساڭىندا جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىندە دوڭگەلەك ۇستەل باسىنداعى كەزدەسۋ ءوتتى, دەپ حابارلايدى Egemen.kz.
جيىنعا ۋنيۆەرسيتەت پرورەكتورى اقىلبەك سۇلتانوۆ, بقو قوعامدىق دامۋ باسقارماسى باسشىسىنىڭ ورىنباسارى گۇلجانار شوكەەۆا, پروفەسسور-وقىتۋشىلار قۇرامى جانە ستۋدەنتتەر قاتىستى.
- بۇل كۇن – بارشا قازاقستاندىقتىڭ قۇقىعى مەن بوستاندىعىن, بىرلىگى مەن تاتۋلىعىن ارقاۋ ەتكەن ماڭىزدى مەرەكە. وسىدان وتىز جىل بۇرىن قابىلدانعان كونستيتۋتسيا تاۋەلسىز وتانىمىزدىڭ زايىرلى, قۇقىقتىق جانە ءبىرتۇتاس مەملەكەت رەتىندەگى نەگىزىن قالاعانى بارشاعا ءمالىم. مەملەكەت باسشىسى قاسىم-جومارت توقاەۆ «اتا زاڭ – مەملەكەتتىلىگىمىزدىڭ بەرىك تۇعىرى, ەلىمىزدىڭ دايەكتى ءارى تۇراقتى دامۋىنىڭ مىزعىماس كەپىلى» دەپ اتاپ ايتقان بولاتىن. باستى قۇجاتتا ۇلتتار دوستىعى, قوعامدىق جانە رۋحاني كەلىسىم, ساياسي تۇراقتىلىق سىندى ەرەكشە قۇندىلىقتار ايقىن كورىنىس تاپقان, – دەدى ۋنيۆەرسيتەتتىڭ تاربيە جانە الەۋمەتتىك جۇمىستار جونىندەگى پرورەكتورى اقىلبەك ۇزاقباي ۇلى.
اتا زاڭدى ارداقتاۋعا ارنالعان جيىندا بقو قوعامدىق دامۋ باسقارماسى باسشىسىنىڭ ورىنباسارى گۇلجانار بولاتقىزى, جاڭگىر حان اتىنداعى تاريحي-ەتنوگرافيالىق مۋزەيدىڭ مەڭگەرۋشىسى, ماگيستر مەيرام وسپانوۆ, اعا وقىتۋشى عاليا سارقۇلوۆا, اعا وقىتۋشى, فيلوسوفيا دوكتورى (PhD) ماقسوت جانعوجيەۆتەر ءسوز سويلەپ, كونستيتۋتسيانىڭ تاريحي قالىپتاسۋ كەزەڭدەرىنە, دامۋ باعىتتارىنا, سوڭعى جىلدارى ەنگىزىلگەن وزگەرىستەر مەن تولىقتىرۋلار تۋرالى ايتتى.
باتىس قازاقستان وبلىسى