جاڭا وقۋ جىلىنىڭ قارساڭىندا الەۋمەتتىك وسال ساناتتاعى وقۋشىلاردىڭ بارلىعى «جالپىعا بىردەي ءبىلىم بەرۋ قورى» اياسىندا تولىق قامتىلىپ وتىر. جەرگىلىكتى اتقارۋشى ورگانداردىڭ دەرەكتەرىنە سايكەس مەكتەپ فورماسىن, اياق كيىم مەن وقۋ-قۇرالدارىن ساتىپ الۋعا 25,3 ملرد تەڭگە اۋدارىلعان, دەپ حابارلايدى Egemen.kz.
500 مىڭنان استام بالاعا قولداۋ كورسەتىلدى. ونىڭ ىشىندە — جەتىم بالالار مەن اتا-اناسىنىڭ قامقورلىعىنسىز قالعاندار, از قامتىلعان وتباسىلاردىڭ بالالارى, اتاۋلى الەۋمەتتىك كومەك الۋشىلار, سونداي-اق ومىرلىك قيىن جاعدايعا تاپ بولعان بالالار بار.
«جالپىعا بىردەي ءبىلىم بەرۋ قورى جىل سايىن بالالاردىڭ جاڭا وقۋ جىلىنا دايىندالۋىنا كومەكتەسەدى. بۇل اتا-انالارعا بالالارىن مەكتەپكە دايىنداۋعا مۇمكىندىك بەرەدى جانە ءاربىر وقۋشى ءۇشىن تەڭ مۇمكىندىكتەر جاسايدى. ايتا كەتۋ كەرەك, اتالعان قور – مەملەكەت تاراپىنان كورسەتىلەتىن قولداۋدىڭ نەگىزگى تەتىكتەرىنىڭ ءبىرى», دەپ اتاپ ءوتتى وقۋ-اعارتۋ مينيسترلىگىنە قاراستى بالالاردىڭ قۇقىقتارىن قورعاۋ كوميتەتىنىڭ ءتورايىمى ناسىمجان وسپانوۆا.
وقۋ-اعارتۋ مينيسترلىگىنىڭ ماولىمەتىنشە بيىلعى جىلى ءبىر بالاعا بەرىلەتىن ەڭ تومەنگى تولەم مولشەرى 46 228 تەڭگەنى قۇرايدى. سونىمەن قاتار, ءماسليحاتتاردىڭ شەشىمىمەن كەيبىر وڭىرلەردە جوعارىراق كورسەتكىشتەر بەلگىلەنگەن: الماتى قالاسىندا – 55 000 تەڭگە, جامبىل وبلىسىندا – 53 117 تەڭگە, پاۆلودار وبلىسىندا – 53 663 تەڭگە.
ايتا كەتەرلىگى, 2023 جىلدان بەرى ماتەريالدىق كومەكتىڭ كولەمى ءبىر بالاعا 17 مىڭنان 46 مىڭ تەڭگەگە دەيىن 2,5 ەسەگە ارتتى.