مادەنيەت جانە اقپارات ءمينيسترى ايدا بالاەۆا الماتىداعى ءابىلحان قاستەەۆ اتىنداعى مەملەكەتتىك ونەر مۋزەيىنىنىڭ نەلىكتەن ۋاقىتشا جابىلعانىن ءتۇسىندىردى, دەپ حابارلايدى Egemen.kz.
ءمينيستردىڭ ايتۋىنشا, مۋزەيدى جاڭعىرتۋ شەڭبەرىندە شاتىردى اۋىستىرۋ, زاماناۋي كليماتتىق جۇيەلەردى ورناتۋ, پاركەت جابىندىسىن قالپىنا كەلتىرۋ جانە وزگە دە تەحنيكالىق جەتىلدىرۋلەر جوسپارلانعان.
«بۇل شارالار كەلۋشىلەر ءۇشىن بارىنشا قولايلى جاعداي جاساپ قانا قويماي, ونەر تۋىندىلارىن ساقتاۋدىڭ زاماناۋي تالاپتارىن قامتاماسىز ەتەدى», دەدى ايدا بالاەۆا.
وسىعان بايلانىستى 5 تامىزدان باستاپ مۋزەي ۋاقىتشا جابىلدى. مۇنداي شەشىم ەڭ الدىمەن ەل قازىناسىنا اينالعان قۇندى جادىگەرلەردىڭ قاۋىپسىزدىگىن قامتاماسىز ەتۋ ءۇشىن قابىلدانعان.
جوبانى جۇزەگە اسىرۋعا قولداۋ كورسەتكەن Senim Qogamy قورى مەن باس دەمەۋشى «سامۇرىق-قازىنا» اق-نا العىس ءبىلدىرىلدى. جوندەۋ جۇمىستارىن مەردىگەر ۇيىم – «Lucky Build Company» جشس اتقارىپ جاتىر.
ءمينيستردىڭ ايتۋىنشا, بارلىق جۇمىستار اياقتالعان سوڭ مۋزەي قوناقتارىن جاڭا زامانعا ساي, شابىت سىيلايتىن, ءوز مارتەبەسىنە لايىق كەڭىستىكتە قارسى الادى.