تارازدا جۇمىسشى جاستارعا ارنالعان وبلىستىق فورۋم ءوتتى

بۇعان دەيىن «AMANAT» پارتياسى ۇكىمەتپەن بىرلەسە وتىرىپ, جۇمىسشى جاستاردىڭ الەۋمەتتىك ماسەلەلەرىن شەشۋ جانە كاسىبي الەۋەتىن ارتتىرۋعا باعىتتالعان «جۇمىسشى جاستار اماناتى» جوباسىن ىسكە قوسقان بولاتىن. جامبىلداعى بۇل فورۋم اتالعان جوبانى جۇيەلى جۇزەگە اسىرۋ جولىنداعى ناقتى ءىس-شارانىڭ ءبىرى.

العاشقى ءسوز كەزەگىن ءماجىلىس دەپۋتاتى, «AMANAT» پارتياسى فراكتسياسىنىڭ مۇشەسى مۇقاش ەسكەندىروۆ الىپ, ءوز ءىسىنىڭ شەبەرى بولۋدىڭ ءمان-ماڭىزىنا توقتالدى. ول جاستاردى ەلىمىزدىڭ دامۋى جولىندا ايانباي ەڭبەك ەتۋگە شاقىردى.

«ەلىمىزدە جىل سايىن اۋقىمدى جوبالار جۇزەگە اسىرىلىپ جاتىر. ونىڭ بىرقاتارى وسى جامبىل وبلىسىندا قولعا الىنۋدا. بۇل جوبالاردى جۇيەلى جۇزەگە اسىرۋ ءۇشىن, ارينە جۇمىسشى جاستار قاجەت. سوندىقتان قازاقستاننىڭ بولاشاعى – جۇمىسشى ماماندىق يەلەرىمەن تىكەلەي بايلانىستى. قازىردىڭ وزىندە قوعامدا ءوندىرىس سالاسىنىڭ ماماندارى ەرەكشە باعالانادى. ال وسىنداي ءىس-شارالار ارقىلى بەلسەندى جاستاردى قولداۋ ىسىنە جارقىن جول اشىلىپ وتىر. سەبەبى ومىردە بارلىق جەتىستىك تەك ادال ەڭبەكپەن, قاجىرلى قىزمەتپەن كەلەدى», دەدى دەپۋتات.

«جاستار رۋحى» جاستار قاناتىنىڭ ءتورايىمى اقەركە يسكاندەروۆا دا ءسوز سويلەپ, ەڭبەك جولىندا جۇرگەن جاستارعا مەملەكەت تاراپىنان جان-جاقتى قولداۋ كورسەتىلىپ جاتقانىن اتاپ ءوتتى.

«بۇل فورۋم – جۇمىسشى جاستاردىڭ داۋىسى ەستىلەتىن, ولاردىڭ بولاشاعىنا قاتىستى ماسەلەلەر تالقىلاناتىن الاڭ. جىل وتكەن سايىن ەلىمىزدە ەڭبەك ادامىنا دەگەن قۇرمەت پەن كاسىپتىك بىلىمگە دەگەن سۇرانىس ارتا تۇسۋدە. وسى ورايدا, «جاستار رۋحى» جاستار قاناتى ءوندىرىس سالاسىندا ەڭبەك ەتەتىن جاستاردىڭ الەۋەتىن اشۋ ماقساتىندا ناقتى جۇمىس اتقارىپ كەلەدى. ماسەلەن, ءداستۇرلى «جاستارعا جۇمىس» جوباسى اياسىندا ەلىمىزدىڭ بارلىق ايماعىندا اۋقىمدى بوس جۇمىس ورىندارى جارمەڭكەلەرى وتكىزىلەدى. جۋىردا استانا قالاسىندا وتكەن وسىنداي جارمەڭكەگە 3000-عا جۋىق ادام قاتىسىپ, 70-تەن استام كاسىپورىن 2000-نان استام بوس جۇمىس ورنىن ۇسىندى», دەدى ول.

«جاستارعا جۇمىس» جوباسى ەكى جىل ىشىندە ءوز تيىمدىلىگىن دالەلدەدى. وسى ۋاقىت ارالىعىندا 150 مىڭعا جۋىق جاس قامتىلعان 1,5 مىڭنان استام ءىس-شارا ۇيىمداستىرىلدى. 200-گە جۋىق جارمەڭكە وتكىزىلىپ, وعان 5,2 مىڭنان استام ۇيىم قاتىسقان. سونىڭ ناتيجەسىندە 55 مىڭنان اسا جاس تۇراقتى جۇمىسقا ورنالاستىرىلدى. سونداي-اق شالعاي اۋىلدارداعى جاستاردى قامتۋ ءۇشىن «جاستار رۋحى» ءموبيلدى توپتارى 150-دەن استام ەلدى مەكەنگە بارىپ, 55 مىڭ ادامعا الەۋمەتتىك جانە ەڭبەك سالاسىنا قاتىستى كەڭەستەر بەردى.

وسىعان قوسا, ايماقتىق فورۋمدار ءوتىپ, ەڭبەك نارىعىنا بايلانىستى اشىق پىكىرتالاستار جۇرگىزىلدى. ەلدىڭ سەگىز وڭىرىندە ءىرى كاسىپورىنداردا جاستار مەن مەكتەپ وقۋشىلارى ءۇشىن كاسىپتىك باعدار بەرۋ ەكسكۋرسيالارى ۇيىمداستىرىلدى. ناتيجەسىندە 5000-نان استام جاس ەڭبەك نارىعى تۋرالى تولىق مالىمەت الىپ, ولاردىڭ 180-نەن استامى تۇراقتى جۇمىسقا ورنالاستى. ال جۇمىسشى ماماندىقتارىنىڭ ابىرويىن كوتەرۋ ماقساتىندا «جاستار رۋحى» «ەڭبەك داڭقى: جۇمىسشى ماماندار اۋلەتى» اتتى ارنايى مەديا-جوبانى جۇزەگە اسىردى.

جامبىل وبلىسى اكىمىنىڭ ورىنباسارى قاناتبەك مادىبەك فورۋم بارىسىندا ايماقتا جۇمىسشى جاستارعا قولداۋ باعىتىندا ناقتى شارالار قولعا الىنىپ جاتقانىن جەتكىزدى.

«بۇگىندە جامبىل وبلىسىندا ينۆەستيتسيا تارتۋ باعىتىندا جوسپارلى جۇمىس جۇرگىزىلۋدە. الداعى ۋاقىتتا وڭىردە 62 ينۆەستيتسيالىق جوبانى قولعا الۋ كوزدەلىپ وتىر. ونى جۇزەگە اسىرۋ بارىسىندا 6 مىڭعا جۋىق جۇمىس ورنى اشىلادى. ياعني, بۇل قادام ۋنيۆەرسيتەت پەن كوللەدج تۇلەكتەرىن جىل سايىن جۇمىسقا ورنالاستىرۋعا مۇمكىندىك بەرەدى. وسى ورايدا, وڭىردەگى جوعارى وقۋ ورىندارىندا كادر دايىنداۋ جۇمىسى قولعا الىنۋدا. ءبىزدىڭ باستى مىندەتىمىز – كاسىبي مامانداردىڭ جاڭا بۋىنىن تاربيەلەۋ جانە ولاردىڭ بويىنا ادالدىق, جاۋاپكەرشىلىك سىندى اسىل قاسيەتتەردى ءسىڭىرۋ», دەدى ول. 

قازىرگى تاڭدا جامبىل وبلىسىندا 355 مىڭنان استام جاس تۇرادى, بۇل – ءوڭىر حالقىنىڭ 29,1 پايىزى. ونىڭ ىشىندە 41,8%-ى قالادا, ال 58,2%-ى اۋىلدىق جەردە ءومىر سۇرۋدە. فورۋمدا ءسوز العان جاس ماماندار دا ءوز تاجىريبەسىمەن ءبولىستى.

«TALAS INVESTMENT COMPANY» جشس-ءنىڭ قىزمەتكەرى بەكسۇلتان بولعانبەك ەڭبەك جولىن سلەسار بولىپ باستاپ, كەيىننەن قازاندىق وپەراتورى, توڭازىتقىش قوندىرعىلارى اۋماعىنىڭ شەبەرى سياقتى ءتۇرلى ساتىلاردان ءوتىپ, بۇگىندە ەنەرگەتيكا رەسۋرستارىمەن قامتاماسىز ەتۋ تسەحى باستىعىنىڭ ورىنباسارى قىزمەتىن اتقارىپ ءجۇر.

«بۇل كاسىپورىندا جۇزدەگەن مامان ەڭبەك ەتەدى. سولاردىڭ قاتارىندا مەن دە بارمىن. ەڭبەك جولىمدى سلەسار رەتىندە باستاپ, كەيىن قازاندىق وپەراتورى, كومپرەسسورلىق جانە توڭازىتقىش قوندىرعىلارى اۋماعىنىڭ شەبەرى, قازاندىق اۋماعىنىڭ شەبەرى بولىپ جۇمىس ىستەدىم. بۇگىندە ەنەرگەتيكا رەسۋرستارىمەن قامتاماسىز ەتۋ تسەحى باستىعىنىڭ ورىنباسارى قىزمەتىن ابىرويمەن اتقارىپ ءجۇرمىن. وسىنداي ءىرى ءوندىرىس ورنىندا ەڭبەك ەتۋ – جاس ماماندار ءۇشىن زور مارتەبە ءارى جوعارى جاۋاپكەرشىلىك. كومپانيا بىزگە بارىنشا قولايلى جاعداي جاساپ وتىر. مۇندا كاسىپتىك ماشىعىمىزدى جەتىلدىرۋگە قاجەت بارلىق مۇمكىندىك بار. ۇجىمىمىزعا بىلىكتى, ادال جۇمىسشى جاستار قاشان دا قاجەت», دەدى ول.

ال «كازفوسفات» جشس-نە قاراستى زاۋىتتىڭ ينجەنەرى قايسار الداحمەتوۆتىڭ ايتۋىنشا, كاسىپورىندا 35 جاسقا دەيىنگى 1128 مامان ەڭبەك ەتىپ جاتىر.

«جۇمىسشى جاستار – ادالدىق پەن تاباندىلىقتىڭ ۇلگىسى. زاۋىتتاردا, قۇرىلىس الاڭدارىندا, اۋىل شارۋاشىلىعى سالاسىندا جانە ءتۇرلى ءوندىرىس ورنىندا ەڭبەك ەتىپ جۇرگەن جاس بۋىن – ەل ەكونوميكاسىنىڭ تىرەگى. جۇمىسشى مامان بولا ءجۇرىپ, قوعام دامۋىنا دا ۇلەس قوسۋعا, بويداعى قابىلەت پەن الەۋەتتى كورسەتۋگە تولىق مۇمكىندىك بار. مىسالى, مەن قاراپايىم زاۋىت جۇمىسشىسى بولا ءجۇرىپ, تاراز قالالىق ءماسليحاتىنىڭ دەپۋتاتى رەتىندە سايلاندىم. بۇگىندە قالا تۇرعىندارىنىڭ سەنىمىن ارقالاعان ازامات رەتىندە ءوندىرىس سالاسىندا ەڭبەك ەتىپ جۇرگەن جاستاردىڭ مۇددەسىن قورعاپ, ولاردىڭ الەۋمەتتىك ماسەلەلەرىن شەشۋگە اتسالىسىپ كەلەمىن», دەدى ول.

فورۋم بارىسىندا جۇمىسشى جاستاردىڭ الەۋەتىن ارتتىرۋ, ولاردى قولداۋ جانە ەڭبەك قۇندىلىعىن دارىپتەۋ باعىتىندا ناقتى ۇسىنىستار ايتىلدى.