يزرايل اسكەرى بۇل وپەراتسيانى قىزىل تەڭىزدەگى شابۋىلدارعا جاۋاپ رەتىندە ءتۇسىندىرىپ وتىر, دەپ جازادى Egemen.kz.
يەمەن استاناسى سانا قالاسىندا يزرايل اۋە كۇشتەرىنىڭ سوققىسىنان كەمىندە 10 ادام قازا تاپتى. تاعى 92 ادام جاراقات العان. Al Jazeera تەلەارناسىنىڭ حابارلاۋىنشا, اۋرۋحاناعا جەتكىزىلگەن 21 ادامنىڭ ءحالى وتە اۋىر.
اۋە شابۋىلدارى بارىسىندا پرەزيدەنت كەشەنى, ەكى ەلەكتر ستانساسى جانە مۇناي كومپانياسىنا تيەسىلى عيمارات قيرادى. يزرايل تاراپى بۇل نىسانداردىڭ بارلىعى اسكەري ماقساتتا قولدانىلىپ كەلگەنىن مالىمدەدى.
رەسمي دەرەكتەرگە سايكەس, يزرايل اسكەرى ساناعا 20-دان استام اۋە سوققىسىن جاساعان. اسكەري وپەراتسيا حۋسيتتەردىڭ قىزىل تەڭىزدە اقش پەن وزگە ەلدەردىڭ كەمەلەرىنە جاساعان شابۋىلىنا جاۋاپ رەتىندە جۇزەگە اسىرىلعانىن اتاپ ءوتتى.