قورعانىس ءمينيسترى اۆياتسيا گەنەرال-لەيتەنانتى داۋرەن قوسانوۆ اياگوز گارنيزونىنا جۇمىس ساپارىمەن باردى. ساپار جاۋىنگەرلىك دايىندىق, اسكەري ينفراقۇرىلىمنىڭ جاي-كۇيى جانە اسكەري قىزمەتشىلەردىڭ وتباسىلارىن الەۋمەتتىك قولداۋ ماسەلەلەرىن قامتىدى, دەپ جازادى Egemen.kz.
قورعانىس ۆەدومستۆوسىنىڭ باسشىسى «مايلين» وقۋ-جاتتىعۋ پوليگونىندا بولىپ, تانك اتىس قالاشىعىن, وعان قوسا «وڭتۇستىك» اسكەري قالاشىعىنداعى وقۋ كورپۋسىن ارالادى. مينيستر وقۋ ساباقتارىن باقىلاپ, جەكە قۇرامنىڭ تۇرمىستىق جاعدايىمەن تانىسىپ, وقۋ پروتسەسىن جەتىلدىرۋ جانە قىزمەتتى ۇيىمداستىرۋ جونىندە بىرقاتار نۇسقاۋلار بەردى. سونىمەن قاتار, گارنيزوندا ول اسكەري تەحنيكانىڭ جاعدايىن, وق-دارىلەردى ساقتاۋ شارتتارىن دا تەكسەردى.
مينيستر الەۋمەتتىك سالاعا ەرەكشە نازار اۋداردى. «مەكتەپكە جول» قايىرىمدىلىق اكتسياسى اياسىندا ول №4 جالپى ءبىلىم بەرەتىن ورتا مەكتەپتە بولىپ, كوپ بالالى اسكەري قىزمەتشىلەر وتباسىلارىنىڭ بالالارىنا مەكتەپكە كەرەك-جاراق زاتتاردى تابىس ەتتى.
«سەندەردىڭ اتا-انالارىڭ ەلدىڭ تىنىشتىعى مەن قاۋىپسىزدىگىن قورعاپ ءجۇر, ال سەندەر مەملەكەتتىڭ بولاشاعىسىڭدار. بۇل وقۋ قۇرالدارى سەندەردىڭ بولاشاقتارىڭا تامشىداي ۇلەس. سەندەرگە زور دەنساۋلىق, وقۋدا وزات جانە ۇلكەن جەتىستىكتەر تىلەيمىن», دەدى داۋرەن قوسانوۆ بالالارعا.
گارنيزون باسشىلىعىمەن سويلەسكەن مينيستر جاۋىنگەرلىك دايىندىقتىڭ جوعارى دەڭگەيىن ساقتاۋدىڭ جانە اسكەري قىزمەتشىلەرگە قامقورلىق جاساۋدىڭ ماڭىزدىلىعىنا نازار اۋداردى:
«اسكەري قىزمەتشىلەردىڭ ءومىر ءسۇرۋ جاعدايى مەن الەۋمەتتىك-تۇرمىستىق ماسەلەلەرى ۇنەمى نازاردا بولۋى ءتيىس. تاماقتانۋ ساپاسىن, كازارماداعى تازالىق پەن جايلىلىقتى, مەديتسينالىق قىزمەت كورسەتۋدى قامتاماسىز ەتۋدى قاداعالاۋ, سول سەكىلدى اسكەري قىزمەتشىلەردىڭ وتباسىلارىن قولداۋ شارالارىن كۇشەيتۋ قاجەت», دەپ اتاپ ءوتتى ول.
شىعىس قازاقستانعا ساپارىنىڭ سوڭىندا اۆياتسيا گەنەرال-لەيتەنانتى داۋرەن قوسانوۆ وسكەمەن گارنيزونىندا بولىپ, وبلىس اكىمىمەن جانە قارۋلى كۇشتەر ارداگەرلەرى كەڭەسىنىڭ وكىلدەرىمەن كەزدەستى. قورعانىس ءمينيسترى ارداگەرلەر جاستارمەن ءجيى كەزدەسىپ, ءوز تاجىريبەلەرىن بەرۋى كەرەك ەكەنىن اتاپ ءوتتى.
«بۇگىنگى تاڭدا ءبىزدىڭ باستى مىندەتتەرىمىزدىڭ ءبىرى – جاستاردى پاتريوتيزم رۋحىندا, ادال جانە ءتارتىپتى ەتىپ تاربيەلەۋ. سەندەردىڭ بىلىمدەرىڭ مەن داستۇرلەرىڭ – اسكەرىمىزدىڭ بەرىك نەگىزى», دەدى مينيستر.
ساپار قورىتىندىسىنا سايكەس قورعانىس ۆەدومستۆوسىنىڭ باسشىسى گارنيزوندار قولباسشىلىعىنىڭ الدىنا جاۋىنگەرلىك ازىرلىكتى نىعايتۋ, اسكەري ينفراقۇرىلىمدى جەتىلدىرۋ جانە اسكەري قىزمەتشىلەر مەن ولاردىڭ وتباسىلارىن الەۋمەتتىك قولداۋ ساپاسىن ارتتىرۋ جونىندە ناقتى مىندەتتەر قويدى.