قازاق جۋرناليستيكاسى تالانتتى ءبىر اياۋلى جاننان ايىرىلدى. تانىمال جۋرناليست, «Egemen Qazaqstan» گازەتىنىڭ قىزمەتكەرى ايگۇل احانبايقىزى دۇنيە سالدى.
قالامى قارىمدى ارىپتەسىمىز قازىرگى جەتىسۋ وبلىسى, اقسۋ اۋدانى, ويتوعان اۋىلىندا ومىرگە كەلگەن. بۇل – قازاق جىرىنىڭ قۇلاگەرى ءىلياس جانسۇگىروۆ تۋعان مەكەن. جاس كۇنىنەن اتاقتى اقىن ولەڭدەرىنەن ءنار العان ايگۇل قارا ءسوزدى ءپىر تۇتىپ ءوستى. وقۋشى كەزىنەن اۋداندىق گازەتتەرگە ماقالالارى جاريالاندى. الماتىعا ارمان قۋىپ كەلىپ, ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىنە ءتۇستى. جوعارى وقۋ ورنىندا وقىپ ءجۇرىپ, ەڭبەك جولىن الماتى وبلىستىق «جەتىسۋ» گازەتىندە ءتىلشى بولىپ باستادى. وسىنداعى اعا بۋىن وكىلدەرىنىڭ ءتالىمىن الدى. قولتاڭباسىن قالىپتاستىردى. سودان كەيىن رەسپۋبليكالىق «جاس الاش» باسىلىمىنا اۋىستى. توقسانىنشى جىلداردىڭ سوڭىندا جاستار گازەتى جاڭا تىنىسپەن جارقىراپ شىقتى. ونى وقىرماندار ىزدەپ وقيتىن. ايگۇلدىڭ دە وسى گازەتتە جۇلدىزى جاندى. ەسىمى ەلگە تانىلدى. ونىڭ الەۋمەت, رۋحانيات, مادەنيەت تاقىرىبىنداعى ماقالالارىن جۇرت ءسۇيىپ وقىدى. ونەر مايتالماندارىنان العان سۇحباتتارى ەلدىڭ قولىنان تۇسپەدى. كەز كەلگەن ماسەلەنى تەرەڭنەن تولعاپ جازدى. تەاتردى بۇگە-شىگەسىنە دەيىن ءبىلدى. ودان سوڭ «قازاق ادەبيەتى», «ايقىن», «حالىق ءسوزى» باسىلىمدارىندا ەڭبەك ەتتى. م.اۋەزوۆ اتىنداعى قازاق مەملەكەتتىك اكادەميالىق تەاترىنىڭ ءباسپاسوز قىزمەتىندە ىستەدى. ول قانداي باسىلىمدا قىزمەت اتقارسا دا جايدارى مىنەزىمەن, ادەمى كۇلكىسىمەن, پاراساتتى بولمىسىمەن, ەڭبەكقورلىق قاسيەتىمەن سىيلى بولدى. وزىنەن كەيىنگى جاستارعا ۇلگى كورسەتتى.
شىن مانىندە, ول – قولتاڭباسى ايشىقتى جۋرناليست ەدى. سىرشىل قالام يەسى بولاتىن. ونىڭ جازعان دۇنيەسىنەن تۇنىق سۋداي مولدىرلىك, تازالىق, شىنايىلىق ەسىپ تۇراتىن. ايگۇل سايىن مۇراتبەكوۆ تۋرالى جازعان ماقالاسىندا: «زەر قادىرىن زەرگەر بىلەر» دەگەن زەردەلى ءسوز قادىرىن سايىنداي بىلگەن جازۋشى كەمدە-كەم شىعار دەگەن وي كەلەدى. اعىلعان-توگىلگەن ءسوز تاسقىنىنان تۋاتىن كەرە قارىس رومانداردى جازۋ ءبىر باسقا دا, قىسقا əڭگىمە جازۋدىڭ باستى ەرەكشەلىگى – كوپ سوزگە ۇرىنباي, بەيىمبەتشە وندىققا دəل تيگىزىپ جازۋ – ول باسقا. قازاق پروزاسىنداعى قىسقا əڭگىمە جازۋ جانرىندا بۇل ءتəسىلدى دəل سايىن مۇراتبەكوۆتەي مەڭگەرگەن ەشكىم جوق», دەپ باعا بەرەدى. ءدال وسى ءسوزدى اۋىسپالى ماعىنادا اۆتوردىڭ وزىنە دە قاراتىپ ايتۋعا بولادى. ول دا كوپ سوزگە ۇرىنباي, ويىن وندىققا ءدال جەتكىزەتىن.
بەلگىلى ءجۋرناليستىڭ وسىدان ون ءۇش جىل بۇرىن شىققان «وقىرمان كۇتكەن اڭگىمە» اتتى كىتابىن وقىرماندار وتە جىلى قابىلدادى. مۇندا اۆتور قازاقتىڭ قابىرعالى اقىن-جازۋشىلارىنىڭ شىعارمالارى جايىندا سىر شەرتەدى. ولاردىڭ جازۋ شەبەرلىگىنە ۇڭىلەدى. كەيىپكەرلەرىنىڭ تاريحىنا توقتالادى. اسىرەسە ەشكىمگە سىر اشا قويمايتىن اسا كورنەكتى سۋرەتكەر مۇحتار ماعاۋيننەن العان سۇحباتىن قىزىعىپ وقيسىز.
ايگۇل احانبايقىزى ءومىرىنىڭ سوڭىنا دەيىن «Egemen Qazaqstan» گازەتىندە ايانباي قىزمەت ەتتى. اۋىر دەرت قانشا قيناسا دا ەشكىمگە سىر بىلدىرمەدى. باسىلىم بەتىندە ويلى سۇحباتتارى مەن مازمۇندى ماقالالارى ءجيى جارىق كوردى. ەڭبەگى دە ەسكەرۋسىز قالمادى. بىلتىر اقوردادا پرەزيدەنت قولىنان «قۇرمەت» وردەنىن الدى. سوندا ەرەكشە قۋانىپ ەدى. بىراق حالقىمىز «جازمىشتان وزمىش جوق» دەپ ايتادى. ارينە, ونىڭ جۋرناليستيكادا قالدىرعان ءىزى ەشقاشان وشپەيدى دەپ سەنەمىز. مارقۇمنىڭ جۇبايىنا, ۇلى مەن قىزىنا, اعايىنىنا قالامگەر ارىپتەستەرى اتىنان كوڭىل ايتا وتىرىپ, ايگۇل احانبايقىزى قالام قۋاتىمەن, ادامشىلىعىمەن سوڭىنا ىزگى جول, ءورىستى ونەگە قالدىردى, ەندى جاراتقان يە وسىنى ۇمىتپاۋدى, اركەز جادىمىزدا جاڭعىرتۋدى ءناسىپ ەتسىن دەگىمىز كەلەدى.
«قازاق گازەتتەرى»
سەرىكتەستىگىنىڭ ۇجىمى