اسا كۇردەلى 90-جىلداردىڭ ورتاسىنان بەرى ۇلت ءباسپاسوزىنىڭ العى شەبىندە ءجۇرىپ, بار ءبىلىمى مەن بىلىگىن زامانداستارىمىزدى اعارتۋعا, ينتەللەكتۋالدىق دەڭگەيىن كوتەرۋگە ايانباي جۇمساعان ايگۇل احانبايقىزىنىڭ اۋىر قازاسىن كۇيزەلىسپەن قابىلدادىم.
وتباسىنا, جاقىن تۋىستارىنا سابىر بەرسىن. حالىقتىڭ قابىرعاسى قايىسىپ كوڭىل ايتۋى ول كىسىلەردىڭ قايعىسىن جەڭىلدەتسىن.
ايگۇل احانبايقىزى – ءبىر وتباسى-اۋلەتتىڭ ەمەس, ەلدىڭ ەلەۋلى پەرزەنتى ەدى. ول ۇشقىر قالامىمەن دە, ادامشىلىعىمەن دە, جەكە ونەگەسىمەن دە قازاقتىڭ قايسار قىزى قانداي بولاتىنىن دالەلدەپ ءوتتى. جامان دەرت قانشا دەندەسە دە, بەس جىل بويى قالامىن قولىنان تاستامادى. قارلىعاشتىڭ قاناتىمەن سۋ تاسىعانىنداي مادەنيەت, رۋحانيات تاقىرىبىن زامان تالابىنا ساي وقىرمانعا ءۇزىلىسسىز جەتكىزۋمەن بولدى.
ايگۇل احانبايقىزى قالامگەرلىك قولتاڭباسى «جەتىسۋ», «جاس الاش», «قازاق ادەبيەتى», «ايقىن», «حالىق ءسوزى», «Egemen Qazaqstan» گازەتتەرىندە ماڭگىلىككە قالدى. ول ۇلت باسىلىمىنداعى وزەكتى, ساۋاتتى, بىلىكتى ماقالالارىمەن ءوزى دە ءوستى, قازاق جۋرناليستيكاسىن دا جاڭا دەڭگەيگە كوتەردى.
وسىناۋ قارالى كۇندە اسىل جارىنا, ۇل-قىزىنا, اعايىنىنا قايعىرا كوڭىل ايتا وتىرىپ, قالىڭ ەلى, جاناشىر ارىپتەستەرى تۇرعاندا مارقۇم ايگۇل احانبايقىزىنىڭ ءىسى دە, ءىزى دە وشپەيدى دەگىم كەلەدى.
مارقۇمنىڭ الدى – پەيىش, سوڭى كەنىش بولسىن!
ايدا بالاەۆا,
مادەنيەت جانە اقپارات ءمينيسترى