الماتى وبلىسىنىڭ اكىمى اماندىق باتالوۆ ۇلى وتان سوعىسىنداعى جەڭىستىڭ 70 جىلدىعىنا وراي 100 ارداگەرمەن وبلىستىق اكىمدىكتە سالتاناتتى جاعدايدا كەزدەسىپ, ايتۋلى مەرەكەمەن قۇتتىقتادى. ءسويتىپ, ۇوس ارداگەرلەرى, ۇوس-قا قاتىسۋشىلارعا تەڭەستىرىلگەندەر, سوعىستا قازا بولعانداردىڭ جەسىرلەرى, كونتسلاگەرلەردە بولعاندار مەن تىل ەڭبەككەرلەرى – بارشانىڭ كوڭىلدەرىن اۋلاي ءبىلدى.
كەزدەسۋ بارىسىندا ارداگەرلەردىڭ بارلىعىنا 70 مىڭ تەڭگەدەن اقشالاي سىيلىق بەرىلدى. ۇلى جەڭىستىڭ 70 جىلدىعى قارساڭىندا قازاقستان رەسپۋبليكاسى پرەزيدەنتىنىڭ جارلىعىمەن ۇلى وتان سوعىسىنداعى ەرلىگى, مەملەكەتكە سىڭىرگەن ەڭبەگى مەن وسكەلەڭ ۇرپاققا پاتريوتتىق تاربيە بەرۋدەگى ايرىقشا ۇلەسى ءۇشىن جەتىسۋلىق 24 ارداگەر مەملەكەتتىك ناگرادالارعا يە بولدى. ناقتىلاي تۇسسەك, ءىىى دارەجەلى «بارىس» وردەنىمەن ەكى ارداگەر, «قۇرمەت» وردەنىمەن 10 ارداگەر, «ەرەن ەڭبەگى ءۇشىن» مەدالىمەن 8 ارداگەر جانە قازاقستان رەسپۋبليكاسىنىڭ قۇرمەت گراموتاسىمەن 4 ارداگەر ماراپاتتالدى.
جالپى, الماتى وبلىسىندا 343 سوعىس ارداگەرى, 20 مىڭنان استام تىل ەڭبەككەرى بار. جەڭىستىڭ 70 جىلدىعىنا وراي وبلىستىق بيۋدجەتتەن بارلىق ارداگەرگە 150 مىڭ تەڭگەدەن بىرجولعى الەۋمەتتىك قولداۋ كورسەتىلدى. سوعىس ارداگەرلەرى مەن تىل ەڭبەككەرلەرىنىڭ دەنساۋلىعىن تۇزەۋگە 145 ملن. تەڭگە ءبولىندى. ارداگەرلەر قاجەتتىلىگىنە قاراي ءتۇرلى قۇرالدارمەن ءبىرىنشى كەزەكتە قامتىلۋدا. بۇل ماقساتتارعا 300 ملن. تەڭگە قارجى قاراستىرىلعان. باسپانا كەزەگىندە تۇرعان 73 سوعىس ارداگەرىنە پاتەر بەرىلدى.
ارداگەرلەرگە قازاقى ءداستۇرمەن مەيرامحانادا داستارقان جايىلىپ, مەرەكەلىك كونتسەرتپەن جالعاستى.
نۇربول الدىباەۆ, «ەگەمەن قازاقستان».
تالدىقورعان.