جەزقازعان قالاسىندا قازاقستان رەسپۋبليكاسىنىڭ ءماجىلىس دەپۋتاتتارى ەربولات ساتىبالدين مەن امانجول ءالتاي ۇلىتاۋ وبلىسىنىڭ اقساقالدار كەڭەسى جانە قالالىق ارداگەرلەر كەڭەسىنىڭ مۇشەلەرىمەن كەزدەسۋ وتكىزدى. حالىق قالاۋلىلارى ءماجىلىستىڭ اتقارىپ جاتقان جۇمىستارى تۋرالى قىسقاشا اقپارات بەردى, دەپ جازادى Egemen.kz.
وبلىستىق ارداگەرلەر كەڭەسىنىڭ توراعاسى ساعىندىق قوجامسەيتوۆ وڭىردەگى ەكولوگيا ماسەلەسىن كوتەردى. ارداگەر «وڭىردە وبىر اۋرۋى كەڭ ەتەك جايىپ بارادى. بىراق ونكولوگيالىق ديسپانسەردىڭ ماسەلەسى شەشىمىن تاپپاي وتىر. سونىمەن قاتار جاس بالالار اراسىنداعى اۋتيزم سيندرومى كوبەيىپ بارادى, وعان مەملەكەت تاراپىنان ءالى دە بولسا دۇرىس كوڭىل بولىنبەيدى»,- دەدى. وسى اڭگىمەدەن كەيىن جامان اۋرۋمەن اۋىرعان ەكى ەڭبەك ارداگەرى ءوزىنىڭ نازىن جەتكىزدى.
ارداگەرلەر كەڭەسىنىڭ مۇشەلەرى جەزقازعان مەن ساتباەۆ قالاسىنىڭ اراسىنداعى تاس جولدىڭ مەملەكەتتىك ستاندارتقا سايكەس كەلمەۋى سالدارىنان كوپتەگەن جول اپاتى بولادى جانە بىرنەشە رەت ادام ءولىمى بولعانىن ايتتى.
تاعى ءبىر ۇلكەن ماسەلە - ۇلتتىق تاريحقا دەگەن كوزقاراستىڭ تۇزەلمەۋى. قازاقستان تاريحىندا وشپەستەي ءىز قالدىرعان بۇلانتى شايقاسىنا 2027 جىلى 300 جىل تولادى. بۇل جەڭىس سول كەزدەگى «اقتابان شۇبىرىندى القاكول سۇلاما» زامانىنداعى ساعى سىنىپ جۇرگەن قازاق حالقىنىڭ رۋحىن كوتەرگەن ۇلى جەڭىس! وكىنىشكە وراي وسىناۋ تاريحي مەرەيتويعا الدىن الا دۇرىس دايىندىق جۇمىستارى جوق ەكەنىن جەتكىزدى.
كەزدەسۋ ءبىر ساعاتتان ارتىق ۋاقىتقا سوزىلدى.