سەناتورلاردىڭ وڭىرلەرگە ساپارى اياسىندا دەپۋتاتتار سەرگەي كارپليۋك پەن بيبىگۇل اققوجينا قوستاناي وبلىسىنىڭ سارىكول اۋدانىنا ات باسىن بۇردى. جۇمىس ساپارى بارىسىندا پارلامەنتشىلەر اۋداننىڭ الەۋمەتتىك-ەكونوميكالىق جاعدايىمەن, اگرارلىق كاسىپورىنداردىڭ قىزمەتىمەن جانە الەۋمەتتىك ينفراقۇرىلىم نىساندارىنىڭ جۇمىسىمەن تانىستى.
سارىكول اۋىلىندا سەناتورلار اۋىلدىڭ دامۋىنا بەلسەندى ۇلەس قوسىپ جۇرگەن «اگرو پاراسات» جشس-عا باردى. كەيىنگى ەكى جىلدا كومپانيا ءوز قاراجاتى ەسەبىنەن سپورت الاڭدارىن, حوككەي كورتىن سالىپ, «تازا قازاقستان» رەسپۋبليكالىق باعدارلاماسى اياسىندا اۋىل كوشەلەرىن جوندەگەن.
سونىمەن قاتار دەپۋتاتتار تاگيل اۋىلىنداعى ءبىرىنشى رەپرودۋكتسيالى تۇقىم وندىرۋگە ماماندانعان «ساتاەۆ ب.ح.» شارۋا قوجالىعىنىڭ جۇمىسىمەن تانىستى. ساپار بارىسىندا دەنساۋلىق ساقتاۋ سالاسىنا دا ەرەكشە كوڭىل ءبولىندى. سەناتورلار سارىكول اۋداندىق اۋرۋحاناسىنا بارىپ, مەديتسينا قىزمەتكەرلەرىمەن كەزدەسىپ, مەكەمەنىڭ وزەكتى ماسەلەلەرىن تالقىلادى. دەپۋتات س.كارپليۋك اۋداندىق اۋرۋحاناداعى كارىز جۇيەسىنىڭ ماسەلەسىن شەشۋدىڭ ماڭىزدىلىعىن اتاپ ءوتتى.
«اۋرۋحاناعا سۋ بۇرۋ جۇيەسىن ورناتۋ جوباسىن اياقتاۋ – كۇن تارتىبىندەگى ەڭ وزەكتى ماسەلە. ول كەشەندى شەشىمدى جانە قاجەتتى قارجىلاندىرۋدى تالاپ ەتەدى. بۇل ماسەلەنى ءبىز رەسپۋبليكالىق دەڭگەيدە كوتەرەمىز», دەدى ول.
ءوز كەزەگىندە سەناتور ب.اققوجينا الەۋمەتتىك نىسانداردى مەملەكەت تاراپىنان قولداۋ ماڭىزدىلىعىنا توقتالدى.
«اۋىلداعى ءاربىر مەديتسينالىق نىسان – تۇرعىندار ءۇشىن ومىرلىك ماڭىزدى رەسۋرس. مۇنداي ينفراقۇرىلىمدىق جوبالاردى كەيىنگە قالدىرۋعا بولمايدى, سەبەبى ولار حالىقتىڭ ءومىر ساپاسىنا تىكەلەي اسەر ەتەدى», دەدى ول.
ساپار قورىتىندىسىندا پارلامەنتشىلەر اۋداندىق ءماسليحات دەپۋتاتتارىمەن جانە جەرگىلىكتى قاۋىمداستىق وكىلدەرىمەن كەزدەسىپ, اۋرۋحانا عيماراتىن جوندەۋ, سۋ بۇرۋ جۇيەسىن جەتىلدىرۋ جانە جوبالىق-سمەتالىق قۇجاتتامانى قارجىلاندىرۋ ماسەلەلەرىن تالقىلادى. جۇمىس ساپارى بارىسىندا كوتەرىلگەن بارلىق ۇسىنىس پەن ماسەلە الداعى بيۋدجەت قالىپتاستىرۋ مەن زاڭ شىعارۋ قىزمەتىندە ەسكەرىلەتىنىن اتاپ ءوتتى.
سونداي-اق سەناتورلار بەكبولات ورىنبەكوۆ پەن ساكەن ارۋباەۆ جامبىل وبلىسىنىڭ شۋ اۋدانىنا بارىپ, قۇرىلىس جۇمىستارىنىڭ بارىسىمەن جانە بىرقاتار ماڭىزدى الەۋمەتتىك ءارى وندىرىستىك نىسانداردىڭ جاعدايىمەن تانىستى.
العاشقى نىسان – «Fufeng» كومپانياسىنىڭ جۇگەرى وڭدەۋ زاۋىتى بولدى. بۇل جوبا ءوڭىردىڭ اگروونەركاسىپتىك كەشەنىن دامىتۋدا جانە جاڭا جۇمىس ورىندارىن اشۋدا ستراتەگيالىق ماڭىزعا يە. كەيىن دەپۋتاتتار شۋ قالاسىنىڭ تەمىرجول ۆوكزالىندا بولىپ, ونىڭ جاڭعىرتۋ جوباسىمەن تانىستى. اتالعان جوبا اۋداننىڭ كولىك-لوگيستيكالىق الەۋەتىن ارتتىرىپ, جولاۋشىلارعا كورسەتىلەتىن قىزمەت ساپاسىن جاقسارتۋعا مۇمكىندىك بەرەدى.
دەپۋتاتتار «گورگاز» شاعىن اۋدانىنداعى اۋىزسۋ جۇيەسىنە ەرەكشە نازار اۋداردى. بۇل نىسان تۇرعىنداردى ساپالى اۋىزسۋمەن قامتاماسىز ەتۋگە جانە كوممۋنالدىق قىزمەتتەردىڭ دەڭگەيىن كوتەرۋگە باعىتتالعان. سونداي-اق سەناتورلار جيەنبەت اۋىلىندا سالىنىپ جاتقان 100 ورىندىق جاڭا مەكتەپتىڭ قۇرىلىسىمەن تانىستى. بۇل ءبىلىم وشاعى اۋىل بالالارىنا قولايلى ءارى زاماناۋي جاعدايدا ءبىلىم الۋعا مۇمكىندىك بەرىپ, اۋداننىڭ ءبىلىم بەرۋ سالاسىن دامىتۋعا ەلەۋلى ۇلەس قوسپاق.
ساپار قورىتىندىسىندا دەپۋتاتتار كوتەرىلگەن بارلىق ماسەلە مەن ۇسىنىس نازارعا الىنىپ, ءتيىستى دەڭگەيدە شەشىم قابىلداناتىنىن اتاپ ءوتتى.