وبلىستىق ىشكى ىستەر دەپارتامەنتىنىڭ مۇراجايىندا ۇلى جەڭىستىڭ 70 جىلدىعىنا ارنالعان يگى شارا ءوتتى. وعان ارداگەرلەر كەڭەسىنىڭ مۇشەلەرى مەن دەپارتامەنت باسشىلارى قاتىستى. بۇل كەزدەسۋدىڭ ماقساتى ۇلى وتان سوعىسىنىڭ جانە ىشكى ىستەر ورگاندارىنىڭ ارداگەرلەرىنە قۇرمەت كورسەتۋ بولىپ تابىلادى.
وبلىستىق ىشكى ىستەر دەپارتامەنتىنىڭ باستىعى, پوليتسيا پولكوۆنيگى ماحسۋدحان ابلازيموۆ ارداگەرلەردى الدا كەلە جاتقان ۇلى جەڭىستىڭ 70 جىلدىعىمەن جەكە قۇرامنىڭ اتىنان قۇتتىقتادى, ولاردىڭ ەرەن ەرلىكتەرى مەن ادال ەڭبەكتەرى ءۇشىن العىس سەزىمىن ءبىلدىردى. ۇلى وتان سوعىسىنىڭ ءتورت جانە ەڭبەك مايدانىنىڭ قىرىق ەكى ارداگەرىنە قازاقستان رەسپۋبليكاسى پرەزيدەنتىنىڭ جارلىعى نەگىزىندە «1941-1945 جىلدارداعى ۇلى وتان سوعىسىنداعى جەڭىستىڭ 70 جىلدىعى» مەرەكەلىك مەدالىن تاپسىردى. سونداي-اق, ۇلى وتان سوعىسىنىڭ ارداگەرلەرىنە 100 مىڭ تەڭگەدەن, ال تىلدا ەڭبەك ەتكەن ارداگەرلەرگە 35 مىڭ تەڭگەدەن اقشالاي سىيلىق ۇسىندى.
قاتارى سيرەپ قالعان سوعىس ارداگەرلەرى جۇماي الىشەۆ, نىعمەت مەيىرمانوۆ, ميحايل ديدەنكو, گريگوري پريحنو مۇنداي قۇرمەتكە شىن جۇرەكتەن ريزا بولدى. ۇلى جەڭىستىڭ كوزى ءتىرى كۋاگەرلەرى ەلىمىزدە تىنىشتىق پەن بىرلىك بولۋىن تىلەدى. ارداگەرلەر ءوزارا اڭگىمە قۇرىپ, وتكەن-كەتكەندى ەسكە ءتۇسىرىپ, ءبىر جاساپ قالدى. بالالىق شاقتارى سوعىستىڭ قيىن جىلدارىمەن تۇسپا-تۇس كەلگەن تىل ارداگەرلەرى دە ۇرپاقتار ساباقتاستىعىنىڭ التىن ارقاۋى ۇزىلمەيتىنىن اڭعارتتى. بۇل كەزدەسۋ ەرلىكتىڭ ەسكىرمەيتىنىنىڭ, ەڭبەكتىڭ ۇمىتىلمايتىنىنىڭ ادەمى كورىنىسى بولدى.
سالتاناتتى شارانىڭ سوڭىندا ءىىد عيماراتىنىڭ الدىنداعى الاڭعا ارداگەرلەر ءوز قولدارىمەن اعاش كوشەتتەرىن وتىرعىزىپ, بۇل اللەيانى ۇلى جەڭىستىڭ 70 جىلدىعىنا ارناپ «جەڭىس اللەياسى» دەپ اتادى.
ساتىبالدى ءساۋىرباي, «ەگەمەن قازاقستان».
اقتوبە وبلىسى.