ەلىمىزدە العاش رەت قالا مەن اۋىل مەكتەپتەرىن تەڭ دامىتۋعا باعىتتالعان بارلىق وتاندىق ءبىلىم بەرۋ وپەراتورلارى «نازارباەۆ زياتكەرلىك مەكتەپتەرى» دببۇ اياسىندا باس قوستى. قاراعاندى وبلىسى وساكاروۆ اۋىلىنداعى ءاليحان بوكەيحان اتىنداعى ورتا مەكتەپكە 200-دەن استام مەكتەپ باسشىسى كەلسە, ونلاين فورماتتا 4 مىڭعا جۋىق مۇعالىم قاتىستى, دەپ حابارلايدى Egemen.kz.
جيىنعا ەلىمىزدەگى 190-نان استام تىرەك مەكتەپتىڭ وكىلدەرى جينالدى. ولار اۋىل مەكتەپتەرىن جاڭعىرتۋ تاجىريبەسىمەن ءبولىسىپ, كاسىبي كەيستەرىن ورتاعا سالدى. اباي وبلىسى اياگوز اۋدانىنداعى كوپسالالى كازاق گيمنازياسىنىڭ ديرەكتورى اينۇر قاناپيانوۆا «شاعىن مەكتەپتەر وزگەرۋدەن قورىقپاۋ كەرەك» دەسە, اقتوبە وبلىسىنان كەلگەن ەركىنبەك زيادينوۆ جاساندى ينتەللەكت پەن تسيفرلىق تەحنولوگيالاردى قولدانۋ تاجىريبەسىن تانىستىردى.
«اۋىل مەكتەبى powered by NIS» جوباسى بۇگىندە 193 تىرەك مەكتەپتى قامتىپ وتىر. باعدارلاما ينفراقۇرىلىمدى جاڭعىرتۋدى, زاماناۋي زەرتحانالار اشۋدى, تسيفرلىق ورتانى دامىتۋ مەن پەداگوگتەردى ادىستەمەلىك تۇرعىدان قولداۋدى كوزدەيدى.
NIS باسقارما توراعاسى ءانۋار جانعوزيننىڭ ايتۋىنشا, تىرەك مەكتەپتەردىڭ ميسسياسى – اۋىلداعى ءار بالانىڭ ساپالى ءبىلىم الۋىنا جول اشۋ. «بۇگىنگى تاڭدا اۋىل مەكتەپتەرى جاڭا مۇمكىندىكتەر ورتاسىنا اينالىپ وتىر», دەدى ول.
بۇل باستامانى «قازاقستان حالقىنا» قورى, ءبىلىم بەرۋ سالاسىن تۇراقتى دامىتۋ قورى جانە وزگە دە سەرىكتەستەر قولداپ كەلەدى. قور ءتورايىمى لاززات چينكيسباەۆا جوبانىڭ ءبىلىم بەرۋ جۇيەسىن قايتا تۇلەتۋگە ىقپال ەتىپ جاتقانىن اتاپ ءوتتى.
ۇلتتىق دەڭگەيدەگى فورۋمدار مەن حالىقارالىق ىنتىماقتاستىقتىڭ ارقاسىندا تىرەك مەكتەپتەر «Made in Kazakhstan» ۇلگىسىندەگى تابىستى تاجىريبەگە اينالدى.