تسيفرلىق دامۋ مينيسترلىگى قوعامدا تارالىپ جاتقان WhatsApp, Telegram جانە باسقا دا شەتەلدىك مەسسەندجەرلەردى قولدانۋعا تىيىم سالىناتىنى تۋرالى اقپاراتتىڭ شىندىققا جاناسپايتىنىن حابارلادى, دەپ جازادى Egemen.kz.
مينيسترلىك مالىمەتىنشە, Aitu مەسسەندجەرىن ەنگىزۋ باستاماسى تەك ورتالىق جانە جەرگىلىكتى مەملەكەتتىك ورگاندارعا, سونداي-اق كۆازيمەملەكەتتىك سەكتور ۇيىمدارىنا قىزمەتتىك كوممۋنيكاتسيا ءۇشىن عانا ۇسىنىلادى. ول مەملەكەتتىك قىزمەتكەرلەر تەك جۇمىس بارىسىندا پايدالاناتىن اقپاراتپەن قاۋىپسىز الماسۋدى قامتاماسىز ەتۋ ماقساتىندا قولدانىلادى. «Aitu قىزمەتتىك حات الماسۋدىڭ, جۇمىس چاتتارىنىڭ, جەدەل حابارلامالاردىڭ جانە مەملەكەتتىك تسيفرلىق پلاتفورمالارمەن ءوزارا ارەكەتتەسۋدىڭ نەگىزگى قۇرالىنا اينالادى. ونىڭ باستى ارتىقشىلىعى – بارلىق سەرۆەرلەر قازاقستان اۋماعىندا ورنالاسقان, بۇل دەرەكتەردى قورعاۋ تالاپتارىنا سايكەس كەلەدى جانە جۇيەنى مەملەكەتتىك ورگاندار ءۇشىن سەنىمدىرەك ەتەدى. Aitu شەتەلدىك مەسسەندجەرلەردى ازاماتتاردىڭ جەكە ومىرىندە الماستىرمايدى جانە وعان «كەدەرگى كەلتىرمەيدى», ول تەك مەملەكەتتىك سەكتورداعى جۇمىس پروتسەستەرى ءۇشىن قورعالعان ارنانى قامتاماسىز ەتەدى», دەلىنگەن حابارلامادا.