20 تامىز كۇنى استانادا قازاقستان رەسپۋبليكاسى كونستيتۋتسياسىنىڭ 30 جىلدىعىنا ارنالعان «كونستيتۋتسيالىق رەفورما جانە باق دامۋى» تاقىرىبىندا دوڭگەلەك ۇستەل ءوتتى. دوڭگەلەك ۇستەل بارىسىندا باق-تىڭ كونستيتۋتسيالىق رەفورمانى ىلگەرىلەتۋدەگى ءرولى, حالىقتىڭ قۇقىقتىق ساۋاتتىلىعىن ارتتىرۋ, مەملەكەت پەن قوعام اراسىنداعى ديالوگتى قالىپتاستىرۋ ماسەلەلەرى تالقىلاندى, دەپ حابارلايدى Egemen.kz.
«پرەزيدەنت قاسىم-جومارت كەمەل ۇلى توقاەۆ اتاپ وتكەندەي: «قوعامنىڭ قۇقىقتىق مادەنيەتىن ارتتىرۋ – ادىلەتتى قازاقستان قۇرۋدىڭ نەگىزگى العىشارتى». وسى باعىتتا كونستيتۋتسيالىق سوت پەن «باس رەداكتورلار كلۋبى» اراسىنداعى مەموراندۋم ەرەكشە ماڭىزعا يە. بۇل – باق ارقىلى حالىققا كونستيتۋتسيالىق قۇقىقتاردى ءتۇسىندىرۋدىڭ جاڭا كەزەڭىن اشادى. الدىمىزدا تۇرعان باستى مىندەت – قۇقىقتىق مادەنيەتى جوعارى, ءوز قۇقىعىن بىلەتىن جانە ونى قورعاي الاتىن قوعام قالىپتاستىرۋ. بۇل مىندەتتى جۇزەگە اسىرۋدا مەملەكەت پەن ازاماتتىق قوعام, سونىڭ ىشىندە باق ورتاق جاۋاپكەرشىلىكتى بولىسەدى», دەدى قر پارلامەنت سەناتىنىڭ دەپۋتاتى, باس رەداكتورلار قب پرەزيدەنتى ب.جەكسەنباي.
«كونستيتۋتسيالىق رەفورما بۇل تەك قۇقىقتىق جۇيەدەگى وزگەرىستەر عانا ەمەس, سونىمەن قاتار دەموكراتيالىق قۇندىلىقتاردى نىعايتۋ. بۇل رەتتە باق ەرەكشە رولگە يە, سەبەبى ولار قوعامعا رەفورمالاردىڭ ءمانىن ءتۇسىندىرىپ, ونىڭ ناتيجەلەرىنە دەگەن سەنىمدى قالىپتاستىرادى», دەدى قر پارلامەنت ءماجىلىسىنىڭ دەپۋتاتى, «حالىقارالىق زاڭگەرلەر قاۋىمداستىعى» قب پرەزيدەنتى مارات باشيموۆ.
دوڭگەلەك ۇستەلگە قاتىسقان رەسپۋبليكالىق زاڭ كونسۋلتانتتارى پالاتاسىنىڭ توراعاسى سەرىك اقىلباي دا قۇقىقتىق ساۋاتتىلىقتى ارتتىرۋ ماسەلەلەرىنە كەڭىنەن توقتالدى.
قاتىسۋشىلاردىڭ ايتۋىنشا, رەفورمالاردىڭ ءمان-ماعىناسىن كەڭ اۋديتورياعا جەتكىزۋدە جانە دەموكراتيالىق پروتسەستەرگە دەگەن سەنىمدى نىعايتۋدا باق باستى قۇرال بولىپ تابىلادى.
«حالىقارالىق تاجىريبەگە جۇگىنسەك, دامىعان ەلدەردە (گەرمانيا, كانادا, جاپونيا, سكانديناۆيا مەملەكەتتەرى) قۇقىقتىق مادەنيەت مەكتەپتەن باستاپ قالىپتاسادى. ازاماتتارعا قولجەتىمدى اقپاراتتىق رەسۋرستار, زاڭگەرلىك كونسۋلتاتسيالار, ونلاين سەرۆيستەر ارقىلى قۇقىقتىق قولداۋ كورسەتىلەدى. بۇۇ مەن ەقىۇ-نىڭ ۇسىنىمدارىندا دا حالىقتىڭ قۇقىقتىق ءبىلىمىن ارتتىرۋ – تۇراقتى دامۋدىڭ نەگىزگى فاكتورى رەتىندە بەلگىلەنگەن», دەپ اتاپ ءوتتى بيبىگۇل جەكسەنباي.
«الاتاۋ اقپارات» مەديا حولدينگىنىڭ باس ديرەكتورى ەرجان قالىمباي ۇلى وتاندىق جۋرناليستەرگە قۇقىقتىق مەديا ساۋاتتىلىققا ارنالعان وقۋ ساباقتارىنىڭ كوپ بولۋى ارتىقشىلىق ەتپەيتىنىن ەرەكشە اتاپ ءوتتى. سپيكەرلەر باق قىزمەتىنىڭ قۇقىقتىق نەگىزدەرىن نىعايتۋ, ولاردىڭ جاۋاپكەرشىلىگى مەن تاۋەلسىزدىگى, ازاماتتىق قوعام ينستيتۋتتارىمەن ءوزارا ءىس-قيمىل ماسەلەلەرىنە ەرەكشە نازار اۋداردى.
«ازاماتتىق اليانس» زتب اتقارۋشى ديرەكتورى نۇراس ەرالى, قر مادەنيەت جانە اقپارات مينيسترلىگى اقپارات كوميتەتى توراعاسىنىڭ ورىنباسارى الىشەر مۇقاجان, «اباي» تەلەارناسىنىڭ ديرەكتورى ەركىن مۇحامەدجانوۆ, «قازاق گازەتتەرى» جشس باس ديرەكتورىنىڭ ورىنباسارى قامبار احمەتوۆ, «باس رەداكتورلار كلۋبىنىڭ» ۆيتسە-پرەزيدەنتى مۇراتبەك توقتاعازين, «Qazcontent» اق ءتورايىمى اينا زادابەك, «QR news» پورتالىنىڭ ديرەكتورى نۇربول تولەباەۆ, «باس رەداكتورلار كلۋبىنىڭ» اتقارۋشى ديرەكتورى بيبىگۇل قۇلامان, جۋرناليست, مەديامەنەدجەر اباي سەيفوللا قاتىستى.
سونداي-اق كەزدەسۋگە وڭىرلەردەگى جەتەكشى بۇقارالىق اقپارات قۇرالدارىنىڭ باس رەداكتورلارى ونلاين فورماتتا قاتىستى. دوڭگەلەك ۇستەل «باس رەداكتورلار كلۋبى» قب مەن قازاقستان رەسپۋبليكاسى كونستيتۋتسيالىق سوتى اراسىنداعى ءوزارا ىنتىماقتاستىق تۋرالى مەموراندۋم اياسىندا ءوتتى. ءىس-شارا قورىتىندىسى بويىنشا قاتىسۋشىلار قۇقىقتىق مادەنيەتتى دامىتۋ جانە دەموكراتيالىق پروتسەستەردە باق ءرولىن نىعايتۋ باعىتىندا ديالوگتى ءارى قاراي جالعاستىرۋعا جانە جۋرناليستەردىڭ قۇقىقتىق ساۋاتتىلىعىن ارتتىرۋعا ارنالعان وقىتۋ ساباقتارىن وتكىزۋگە ۋاعدالاستى.