اۋىل شارۋاشىلىعى سالاسىنا بولىنگەن مەملەكەتتىك قولداۋ قارجىسى قىلمىستىق جولمەن قولدى بولعانى انىقتالدى. جەتىسۋ وبلىسىندا ءسۇت ونىمدەرىن وڭدەۋگە ارنالعان 300 ميلليون تەڭگەدەن استام سۋبسيديا جىمقىرىلىپ, ونىڭ ءبىر بولىگى قۇمار ويىندارعا پايدالانىلعان, دەپ جازادى Egemen.kz.
اگەنتتىك مالىمەتىنشە, وبلىستىق افم دەپارتامەنتى ەكى جىلعا سوزىلعان الاياقتىق فاكتىسىن تەرگەپ جاتىر. تەرگەۋ بارىسىندا بەلگىلى بولعانداي, جەرگىلىكتى سەرىكتەستىك باسشىسى جالعان قۇجاتتاردى پايدالانىپ, مەملەكەتتىك سۋبسيديانى زاڭسىز الىپ وتىرعان. بۇل قارجى اۋىل شارۋاشىلىعى باسقارماسى ارقىلى ءسۇتتى قايتا وڭدەۋگە بولىنگەن.
زەرتتەۋ كورسەتكەندەي, كاسىپكەر شىعىنداردى راستاۋ ءۇشىن جالعان ەسەپ-قيساپ قۇجاتتارىن تاپسىرعان. وندا جەكە كاسىپكەرلەردەن شيكى ءسۇت ساتىپ الىنعانى جونىندە جانە ماي ءوندىرىسى تۋرالى شىندىققا جاناسپايتىن دەرەكتەر كورسەتىلگەن.
قارجى مونيتورينگى اگەنتتىگى زاڭسىز الىنعان قاراجاتتىڭ ءبىر بولىگى – 110 ميلليون تەڭگەنىڭ قۇمار ويىندارعا, ياعني كازينوعا جۇمسالعانىن حابارلادى.
سوتتىڭ سانكتسياسىمەن قۇنى 300 ميلليون تەڭگەدەن اساتىن زاۋىتتىڭ مۇلكىنە تىيىم سالىندى. قازىرگى تاڭدا كۇدىكتىگە قاتىستى بۇلتارتپاۋ شاراسى رەتىندە ۇيقاماق قولدانىلىپ وتىر.
اگەنتتىك تەرگەۋ جالعاسىپ جاتقانىن اتاپ وتتى.