الماتى وبلىسىنىڭ قاپشاعاي قالاسىنداعى داڭق مەموريالى جانىندا ۇلى وتان سوعىسى قۇرباندارىن ەسكە الۋعا ارنالعان ميتينگ بولدى. وعان سوعىس ارداگەرلەرى, اسكەري قىزمەتكەرلەر مەن ينتەرناتسيوناليست-جاۋىنگەرلەر, قازاقستانداعى رەسەي كونسۋلدىعىنىڭ وكىلدەرى قاتىستى.
سالتاناتتى جيىندا ەلىمىزدىڭ كوك بايراعى جەلبىرەپ, ءانۇرانى شىرقالعان سوڭ, ماڭگىلىك الاۋ وتى تۇتاتىلدى. ۆولوكولامسك قالاسىنان ارنايى اكەلىنگەن توپىراق كاپسۋلاسى بەلگىلەنگەن جەرگە سالىنىپ, گۇل شوقتارى قويىلدى.
جۇرتشىلىق الدىنا الماتى وبلىسى اكىمىنىڭ ورىنباسارى باقتيار ونەرباەۆ شىعىپ: «جەڭىس كۇنى – ءبارىمىز ءۇشىن ايرىقشا قىمبات, قاسيەتتى مەرەكە. بۇل سوعىستاعى جەڭىسكە جەتكەنىمىزدى اتاپ وتەتىن, ەڭ باستىسى, بەيبىتشىلىكتى جاقىنداتۋ ءۇشىن جان اياماي شايقاسىپ, قان مايداننان ورالماعان ارىستارىمىزدى ەسكە الاتىن كۇن. ۇلى جەڭىسكە تىل ەڭبەككەرلەرىنىڭ دە قوسقان ۇلەسى ولشەۋسىز. الدىڭعى بۋىننىڭ ارداقتى ءىسىن بۇگىنگى ۇرپاق لايىقتى تابىستارمەن جالعاستىرىپ كەلەدى, – دەدى. سودان كەيىن ول – الماتى قالاسىنىڭ تۇبىندە جاساقتالعان اتاقتى 316-شى اتقىشتار ديۆيزياسى قان مايدانعا ماسكەۋ قالاسىن جاۋدان قورعاۋعا اتتاندى. كۇشى باسىم دۇشپانمەن قورعانا وتىرىپ سوعىسقان قازاقستاندىق ەرجۇرەك جاۋىنگەرلەر ءماسكەۋگە تاياۋ ۆولوكولام اۋدانى, دۋبوسەكوۆو رازەزىندە كىشى پوليترۋك ۆ.گ.كلوچكوۆ باستاعان 28 گۆاردياشى-پانفيلوۆشى ساربازدار الەمدى ءدۇر سىلكىندىرگەن ەرەن ەرلىك كورسەتتى. بۇگىن ءبىز داڭقتى پانفيلوۆشى باتىر بابالاردىڭ رۋحى الدىنداعى پەرزەنتتىك پارىزعا ادالدىق رەتىندە سوناۋ رەسەي جەرىنەن اكەلىنگەن ءبىر ۋىس توپىراق پەن ماڭگىلىك الاۋ ۇشقىنىن قاپشاعاي قالاسىندا قابىلداپ وتىرمىز, – دەدى.
سودان كەيىن ءبىر مينۋتتىق ۇنسىزدىك جاريالاندى. بۇدان ءارى ادەبي كومپوزيتسيا جالعاستى.
سول كۇنى الماتى وبلىسى اكىمىنىڭ ورىنباسارى باقتيار ونەرباەۆ قاراساي اۋدانىنداعى ۇلى وتان سوعىسى ارداگەرىنىڭ جۇبايى, تىل ەڭبەككەرى دينار-زادە سەيدۆاليەۆاعا «اسىل ارمان» تۇرعىن ءۇي كەشەنىنەن جەكە ءپاتەر كىلتىنە قوسىپ ءتۇرلى-ءتۇستى تەلەديدار تابىس ەتتى. 91 جاستاعى سوعىس ارداگەرى سۇيىكتى نەمەرەسىمەن بىرگە جەڭىس كۇنىن قارسى الاتىن پاتەرىنە كىرىپ, ەلباسىنا جانە قازاقستاندىقتارعا اقجارما العىسىن اعىتتى.
سونداي-اق, الماتى وبلىستىق اكىمدىگى اتىنان «قازاقستان» قوناق ۇيىندە مايدانگەرلەرگە ارنالعان سالتاناتتى قابىلداۋ بولدى. وندا سالتاناتتى جاعدايدا «قۇرمەت» وردەنى 104 جاستاعى جەتىسۋلىق رابات تەگىسباي ۇلىنا, «ەرەن ەڭبەگى ءۇشىن» مەدالى ءتاڭىربەرگەن تولعانباەۆ پەن بەرلىبەك ىسقاقوۆ باستاعان 11 مايدانگەرگە تابىس ەتىلدى. قاريالارعا «قۇلانساز» فولكلورلىق-ەتنوگرافيالىق ءانسامبلىنىڭ شاعىن كونتسەرتى كورسەتىلدى. سالتاناتتى شارا ۇوس ارداگەرلەرى ماسكەۋ مەن استانادا وتەتىن جەڭىس پارادىنا قاتىسۋلارى ءۇشىن عالامات ليمۋزين باستاعان اۆتوموبيلدەرگە مىنگىزىلىپ, تەمىر-جول ۆوكزالىنا دەيىن قۇرمەتپەن شىعارىپ سالىندى.
نۇربول الدىباەۆ, «ەگەمەن قازاقستان».
الماتى وبلىسى.