پرەزيدەنت قاسىم-جومارت توقاەۆ «ادىلەتتى قازاقستان: زاڭ مەن ءتارتىپ, ەكونوميكالىق ءوسىم, قوعامدىق وپتيميزم» اتتى جولداۋىندا حالىق دەنساۋلىعىن جاقسارتۋعا جانە الەۋمەتتىك قولداۋ جۇيەسىن جاڭعىرتۋعا باعىتتالعان كەشەندى مىندەتتەردى ايقىندادى, دەپ حابارلايدى Egemen.kz.
قازاقستاندا دەنساۋلىق ساقتاۋ سالاسىن دامىتۋعا باسىمدىق بەرىلىپ, كادر دايارلاۋدى كۇشەيتۋ, ءدارى-دارمەك باعاسىن تومەندەتۋ جانە تسيفرلىق ترانسفورماتسيانى ىلگەرىلەتۋ شارالارى جۇزەگە اسىرىلىپ جاتىر.
اسىرەسە كادر تاپشىلىعىن جويۋعا ەرەكشە نازار اۋدارىلىپ وتىر. «پەدياتريا» ماماندىعى قايتا ەنگىزىلىپ, وتە تاپشى 14 بالالاردى ەمدەۋ ماماندىعى بويىنشا رەزيدەنتۋرا اشىلدى.
دەنساۋلىق ساقتاۋ ءمينيسترى اقمارال ءالنازاروۆانىڭ ايتۋىنشا, مەديتسينالىق ءبىلىم بەرۋدى كۇشەيتىپ, ناۋقاستاردى جەكە قابىلداۋعا باسىمدىق بەرۋ ارقىلى مەيىربيكەلىك تاجىريبە دامىتىلادى. بۇل رەتتە ۇزدىكسىز كاسىبي بىلىكتىلىكتى ارتتىرۋ سيمۋلياتسيالىق ورتالىقتارى مەن قاشىقتان وقىتۋ پلاتفورمالارى قولدانىسقا ەنگىزىلەدى.
2025 جىلى مەديتسينالىق جوعارى وقۋ ورىندارىنىڭ تۇلەكتەرى 11 600 ماماندى قۇرادى. ولاردىڭ ۇشتەن ەكىسى وڭىرلەردەگى مەديتسينالىق ۇيىمدارعا جولدانعان. جاس دارىگەرلەردى اۋىلدىق جەرلەرگە تارتۋ ءۇشىن مەملەكەت تاراپىنان قولداۋ شارالارى قاراستىرىلعان. مەملەكەت باسشىسىنىڭ تاپسىرماسىمەن اسا تاپشى ماماندىق بويىنشا اۋىلعا بارعان دارىگەرلەرگە 8,5 ميلليون تەڭگە كولەمىندە الەۋمەتتىك تولەم بولىنەدى.
بۇل قادامدار ەلىمىزدەگى مەديتسينالىق كادر تاپشىلىعىن جويۋعا جانە حالىققا ساپالى مەديتسينالىق قىزمەت كورسەتۋدى قامتاماسىز ەتۋگە مۇمكىندىك بەرەدى.