پرەمەر-مينيستر ولجاس بەكتەنوۆ مەملەكەت باسشىسىنىڭ جاساندى ينتەللەكتىنى دامىتۋ ماسەلەلەرى جونىندەگى كەڭەستە بەرگەن تاپسىرماسىن جۇزەگە اسىرۋ بويىنشا تسيفرلىق شتاب وتىرىسىن وتكىزدى.
كۇن تارتىبىندە ءتورت ماسەلە قارالدى. تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ بايانداما جاسادى. جيىننىڭ قورىتىندىسىندا تسيفرلىق شتابتىڭ شەشىمىمەن, مەملەكەتتىك ورگانداردىڭ اقپاراتتىق جۇيەلەرىن ينتەگراتسيالاۋدىڭ كەشەندى جوسپارى مەن جاساندى ينتەللەكت دەرەكتەر ماسسيۆتەرىمەن جۇمىس ىستەۋ رەگلامەنتى جانە ونى جۇزەگە اسىرۋ جوسپارى بەكىتىلدى.
سونداي-اق Smart Data Ukimet مەملەكەتتىك دەرەكتەردى بىرىكتىرۋ بويىنشا جۇمىستارىن اياقتاۋدىڭ مەرزىمدەرى انىقتالدى. جاڭا حەشتەۋ ءادىسىن قولداناتىن ينتەگراتسيا الداعى 1 قىركۇيەككە دەيىن اياقتالۋى كەرەك, ال بارلىق دەرەك وسى جىلدىڭ 1 جەلتوقسانىنا دەيىن پلاتفورماعا بەرىلۋگە ءتيىس. وعان قوسا 15 قىركۇيەككە دەيىن مەملەكەتتىك ورگاندار قىزمەتكەرلەرىنىڭ AITU ۇلتتىق مەسسەندجەرىنە كوشۋى كەرەك.
پرەمەر-مينيستر قابىلدانعان قۇجاتتاردى ساپالى ءارى ۋاقتىلى ىسكە اسىرۋدىڭ ماڭىزدىلىعىن ايتتى.
«مەملەكەت باسشىسى قازاقستان ەۋرازياداعى تسيفرلىق حابقا اينالۋعا ءتيىس دەگەن ماقساتتى العا قويىپ وتىر. ناقتى مىندەتتەر بەلگىلەندى. بۇگىندە تسيفرلىق شتاب بارلىق مەملەكەتتىك ورگان مەن ۇيىمدار ءۇشىن مىندەتتى شەشىمدەر قابىلدادى. ناتيجە اقپاراتتىق قاۋىپسىزدىكتى جاقسارتۋ مەن مەملەكەتتىك اپپاراتتىڭ تيىمدىلىگىن ارتتىرۋعا باعىتتالعان», دەدى ولجاس بەكتەنوۆ.
مەملەكەتتىك ورگانداردىڭ اقپاراتتىق جۇيەلەرىن ينتەگراتسيالاۋدىڭ كەشەندى جوسپارى نەگىزىندە 224 اقپاراتتىق قۇرامداس الاڭ قۇرىلادى. بۇل ينتەگراتسيا ءۇشىن ەڭبەك شىعىندارىن ازايتۋعا, فۋنكتسيونالدىق جانە ستاتيستيكالىق ايىرماشىلىقتار تۇرعىسىنان اقپاراتتىق جۇيەلەردىڭ قايتالانۋ ماسەلەسىن شەشۋگە مۇمكىندىك بەرەدى. بۇگىندە «ەلەكتروندىق ۇكىمەت» اياسىندا مەملەكەتتىك ورگاندار مەن كۆازيمەملەكەتتىك سەكتور ۇيىمدارىنىڭ 355-تەن استام اقپاراتتىق جۇيەلەرى مەن ۆەب-رەسۋرستارى جۇمىس ىستەيدى.
جاساندى ينتەللەكت دەرەكتەر ماسسيۆتەرىمەن جۇمىس ىستەۋ ەرەجەسى مەن ونى جۇزەگە اسىرۋ جوسپارى بەكىتىلدى. قۇجات جي تەحنولوگيالارىن دامىتۋ ءۇشىن دەرەكتەر قورىن قالىپتاستىرۋ ماسەلەسىن قاراستىرادى. بۇل ەرەجەلەر اقپاراتتى جيناۋ, تەكسەرۋ جانە قۇرىلىمداۋدىڭ بىرىڭعاي ستاندارتتارىن قاراستىرادى.
Smart Data Ukimet پلاتفورماسىندا مەملەكەتتىك دەربەستەندىرىلمەگەن دەرەكتەردى توپتاۋ بويىنشا جۇمىس شەڭبەرىندە Smart Data Ukimet-كە مىندەتتى تۇردە كوشىرۋگە جاتاتىن دەرەكتەر بازالارىنىڭ ءتىزىمى بەكىتىلدى.
جيىندا AITU ۇلتتىق مەسسەندجەرىن كەڭ اۋقىمدا ەنگىزۋ ماسەلەسى قارالدى. ونىڭ قاناتقاقتى جۇمىسى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىندە كورسەتىلدى, ەندى اتالعان قىزمەت مەملەكەتتىك ورگاندار مەن كۆازيمەملەكەتتىك سەكتور ۇيىمدارىنىڭ بارلىعىنا ەنگىزىلەدى.