پارلامەنت سەناتى الەۋمەتتىك-مادەني دامۋ جانە عىلىم كوميتەتىنىڭ كەڭەيتىلگەن وتىرىسىندا «بالالاردى دەنساۋلىعى مەن دامۋىنا زاردابىن تيگىزەتىن اقپاراتتان قورعاۋ تۋرالى» زاڭ جوباسى قارالدى, دەپ حابارلادى وسى پالاتانىڭ ءباسپاسوز قىزمەتى.
زاڭ جوباسىنىڭ نەگىزگى ماقساتى بالالاردى زياندى اقپاراتتان قورعاۋدى قامتاماسىز ەتۋ, بالالاردىڭ جاسىنا سايكەس كەلەتىن اقپاراتتى الۋىنا جانە تاراتىلۋىنا قۇقىقتارىن ىسكە اسىرۋ, سونداي-اق, ولاردىڭ اقپارات كەڭىستىگىنە جاعىمسىز اقپاراتتىڭ ەنۋىنەن قورعاۋ بولىپ تابىلادى.
قۇجاتتا اقپارات ونىمدەرىنىڭ ساراپتاما جۇرگىزۋ تەتىكتەرى بەكىتىلدى, ساراپشىلارعا قويىلاتىن تالاپتار, ساراپشىلار مەن ساراپتامالىق ۇيىمداردى تىركەۋ ءتارتىبى بەلگىلەندى, وسى سالانى رەتتەيتىن مەملەكەتتىك ورگانداردىڭ قۇزىرەتتەرى اجىراتىلدى.
كوميتەت وتىرىسىندا, سونداي-اق, «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بالالاردى دەنساۋلىعى مەن دامۋىنا زاردابىن تيگىزەتىن اقپاراتتان قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا قارالدى.
زاڭ جوباسى زاڭنامانى «بالالاردى دەنساۋلىعى مەن دامۋىنا زاردابىن تيگىزەتىن اقپاراتتان قورعاۋ تۋرالى» زاڭ جوباسىنا ءسايكەس كەلتىرۋ ماقساتىندا ازىرلەنگەن بولاتىن. زاڭ جوباسىنىڭ تۇجىرىمدامالىق باعىتتارىن ەسكەرە كەلگەندە, وسى زاڭ جوباسىمەن ءبىرقاتار زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ ۇسىنىلىپ وتىر.
كوميتەت وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى دا ءبىرىنشى وقىلىمدا قارالدى. زاڭ جوباسىنىڭ ماقساتى قولدانىستاعى زاڭنامانىڭ قۇقىقتىق ولقىلىقتارىن جويۋ, دەنساۋلىق ساقتاۋ جۇيەسىن ودان ءارى جەتىلدىرۋ, سونداي-اق, ازاماتتاردىڭ تولىققاندى مەديتسينالىق قامتىلۋىنا كونستيتۋتسيالىق قۇقىقتارىن قامتاماسىز ەتۋ بولىپ تابىلادى.
زاڭ جوبالارى پالاتانىڭ قاراۋىنا جىبەرىلدى.